ខេត្តព្រះសីហនុ ៖ យោងតាមរបាយការណ៍របស់សមត្ថកិច្ច មូលដ្ឋានកងរាជអាវុធហត្ថស្រុកស្ទឹងហាវ នៃទីបញ្ជាការកងរាជអាវុធហត្ថខេត្តព្រះសីហនុ បានឲ្យដឹងថា កាលពីវេលាម៉ោង៧និង៥០នាទីព្រឹកថ្ងៃទី២៥ ខែធ្នូ ឆ្នាំ២០២០ មានករណីបុរសម្នាក់ជាជាងផ្សារដែកបានបាត់បង់ជីវិត នៅចំណុចទីតាំងជួសជុលទូកនេសាទផលសមុទ្រមួយកន្លែង ស្ថិតនៅក្រុម១ ភូមិ៤ ឃុំទំនប់រលក ស្រុកស្ទឹងហាវ ខេត្តព្រះសីហនុ បន្ទាប់ពីជនរងគ្រោះកំពុងជួសជុលផ្សាស៊ីទែនប្រេងទូកដែលលិច ស្រាប់តែផ្ទុះលាន់ដូចគ្រាប់បែក បណ្តាលឱ្យបាត់បង់ជីវិតភ្លាមៗនៅនឹងកន្លែងកើតហេតុតែម្តង ។
យោងតាមរបាយការណ៍របស់សមត្ថកិច្ចបានបញ្ជាក់ឲ្យដឹងថា ជនរងគ្រោះឈ្មោះញ៉ឹល សំណាង ភេទប្រុស អាយុ២២ឆ្នាំ មុខរបរជាងផ្សារដែក ស្នាក់នៅបណ្ដោះអាសន្នផ្ទះលោក ព្រហ្ម បន ស្ថិតនៅក្រុម១ ភូមិ៤ ឃុំទំនប់រលក ស្រុកស្ទឹងហាវ ខេត្តព្រះសីហនុ មាន ស្រុកកំណើត ភូមិរកាថ្មី ឃុំស្រែសំរោង ស្រុកជុំគីរី ខេត្តកំពត។
តាមរបាយការណ៍ដដែលបានបន្តឱ្យដឹងបន្តថា មុនពេលកើតហេតុ បុរសរងគ្រោះខាងលើបានទទួលការងារពីម្ចាស់ទូក ដើម្បីជួសជុលផ្សាស៊ីទែនប្រេងដែលលិច ខណៈកំពុងអង្គុយផ្សារ ស្រាប់តែផ្ទុះលាន់ដូចផ្ទុះគ្រាប់បែក បង្ករឱ្យមានការភ្ញាក់ផ្អើលឡើង ខណៈនោះជាងឈើដែលកំពុងជួសជុលទូកនាំគ្នារត់ទៅមើល ក៏ឃើញជនរងគ្រោះហូរឈាមចេញពីមាត់ និងត្រចៀក បាត់បង់ជីវិតទៅហើយ ។
ក្រោយពេលកើតហេតុភ្លាមៗនោះ សមត្ថកិច្ចនគរបាលនៃអធិការដ្ឋានស្រុកស្ទឹងហាវបានចុះត្រួតពិនិត្យ និងធ្វើកោសល្យវិច្ចយ័លើសពជនរងគ្រោះ និងបានបញ្ជាក់ថា ជនរងគ្រោះពិតជាបាត់បង់ជីវិត ដោយសារករណីផ្ទុះពេលកំពុងផ្សាស៊ីទែនប្រេងទូកប្រាកដមែន ។
បច្ចុប្បន្ន សពជនរងគ្រោះត្រូវបានសមត្ថកិច្ចប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណីនៅស្រុកកំណើត ៕ (កែសម្រួលដោយ ៖ ធីតា)
ចែករំលែកព័តមាននេះ