រាជធានីភ្នំពេញ ៖ រដ្ឋមន្ត្រីក្រសួងយុត្តិធម៌បានដាក់បញ្ជាឲ្យតុលាការរាជធានីភ្នំពេញចាត់វិធានការឲ្យតឹងរឹងបំផុត ចំពោះ លោក សម រង្ស៊ី អតីតប្រធានគណបក្សសង្គ្រោះជាតិ ដែលជេរប្រមាថព្រះមហាក្សត្រ ។ យោងតាមលិខិតរបស់ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ នៅថ្ងៃទី២៥ ខែធ្នូ ឆ្នាំ២០២០បានលើកឡើងថា«ជម្រាបមកឯកឧត្តម ចឹង ខ្មៅ ព្រះរាជអាជ្ញាអមសាលាដំបូងរាជធានីភ្នំពេញ សំណើរចាត់វិធានការផ្លូវច្បាប់ជាបន្ទាន់ និងតឹងរឹងបំផុតលើឈ្មោះ សម រង្ស៊ី ចំពោះករណីប្រមាថយ៉ាងធ្ងន់ធ្ងរចំពោះអង្គព្រះមហាក្សត្រនៃព្រះរាជាណាចក្រកម្ពុជា»។
លិខិតលើកឡើងថា យោងការចាត់វិធានការនេះយោងតាមមាត្រា៧ នៃរដ្ឋធម្មនុញ្ញនៃព្រះរាជាណាចក្រកម្ពុជា ។ មាត្រា៤៣៧ ស្ទួននៃក្រមព្រហ្មទណ្ឌនៃព្រះរាជាណាចក្រកម្ពុជា និងមាត្រា២៩ នៃក្រមនីតិវិធីព្រហ្មទណ្ឌនៃព្រះរាជាណាចក្រកម្ពុជា ។ ក្នុងលិខិតរដ្ឋមន្ត្រីក្រសួងយុត្តិធម៌បានសរសេរទៀតថា«ខ្ញុំសូមជម្រាប ឯកឧត្តមព្រះរាជអាជ្ញា ជ្រាបថាឈ្មោះ សម រង្ស៊ី បានបង្ហោះសារតាមរយៈគណនី Facebook របស់ខ្លួន កាលពីថ្ងៃទី ២០-១២-២០២០ ដែលមានខ្លឹមសារថា ឥឡូវនេះហ៊ុន សែន ស្ងាត់ជ្រាបក្នុងរឿងនេះ ហើយគាត់ត្រៀមសងលុយសប្បុរសជនដែលចាញ់បោកគាត់មានទាំងស្តេចទីងមោងផងដែរ» ។
ឯកឧត្តមរដ្ឋមន្ត្រីថា ខ្លឹមសារនៃសារដែលឈ្មោះ សម រង្ស៊ី បាន និងកំពុងផ្សព្វផ្សាយជាសាធារណៈ តាមរយៈបណ្តាញសង្គមនេះ គឺជាការប្រមាថចំពោះអង្គព្រះមហាក្សត្រ ដោយបានធ្វើឱ្យប៉ះពាល់យ៉ាងធ្ងន់ធ្ងរ ដល់សេចក្តីថ្លៃថ្នូរ និងព្រះកិត្តិនាមរបស់ព្រះមហាក្សត្រនៃព្រះរាជាណាចក្រកម្ពុជាជាទីគោរពសក្ការៈដ៏ខ្ពង់ខ្ពស់បំផុតរបស់ប្រជារាស្ត្រខ្មែរទូទាំងប្រទេស ។ ទង្វើនេះ គឺជាការរំលោភបំពានលើរដ្ឋធម្មនុញ្ញនៃ ព្រះរាជាណាចក្រកម្ពុជា និងត្រូវបានកំណត់ជាបទល្មើសព្រហ្មទណ្ឌដែលមានចែង និងផ្តន្ទាទោសតាមបញ្ញត្តិមាត្រា៤៣៧ ស្ទួន នៃក្រមព្រហ្មទណ្ឌ ។ នៃយោងតាមមាត្រា២៩ នៃក្រមនីតិវិធីព្រហ្មទណ្ឌនៃព្រះរាជាណាចក្រកម្ពុជា ក្រសួងយុត្តិធម៌សូម ឯកឧត្តមព្រះរាជអាជ្ញា ចាត់វិធានការផ្លូវច្បាប់ជាបន្ទាន់ និងតឹងរឹងបំផុតចំពោះអំពើប្រមាថចំពោះអង្គព្រះមហាក្សត្រខាងលើ ដោយអនុវត្តស្របតាមនីតិវិធីជាធរមាន។
សូមជម្រាបថាលោក សម រង្ស៊ី ដែលកំពុងនិរទេសខ្លួននៅក្រៅប្រទេសបានបានសរសេរលើបណ្តាញសង្គម នៅថ្ងៃទី២០ ធ្នូឆ្នាំ២០២០ថា«ហ៊ុន សែន ត្រូវទទួលស្គាល់ថា គម្រោងភ្លីភ្លើរបស់គាត់ ដែលអះអាងថា រៃអង្គាសលុយពីប្រជាពលរដ្ឋ ដើម្បីទិញវ៉ាក់សាំង ចាក់បង្ការជំងឺកូវីដ-១៩ គម្រោងនោះ បរាជ័យហើយ ពីព្រោះគ្មាននរណាអាចយួរកន្ត្រកទៅផ្សារ ទិញវ៉ាក់សាំង ដូចទិញនំអាកោរទេ» ។ អតីតមេបក្សប្រឆាំងរូបនេះក៏បានរិះគន់ប្រមុខរដ្ឋាភិបាលទៀតថា«ហ៊ុន សែន មិនដឹងថា វ៉ាក់សាំងប្រឆាំងជំងឺកូវីដ-១៩នេះ អត់មានលក់រាយទេ ហើយបើចង់កុម្ម៉ង់ជាដុំ ពីក្រុមហ៊ុនឱសថ និងមន្ទីរពិសោធន៍ក្នុងលោកសេរី ដែលផលិតវ៉ាក់សាំងទាំងនោះត្រូវកក់លុយឲ្យគេរាប់ពាន់លានដុល្លារ ជាមុនសិន ។
ឥឡូវនេះ ហ៊ុន សែន ស្ងាត់ជ្រាបក្នុងរឿងនេះ ហើយគាត់ត្រៀមសងលុយសប្បុរសជន ដែលចាញ់បោកគាត់ មានទាំងស្តេចទីងមោងផងដែរ ។ ប្រទេសកម្ពុជា ដែលមិនទាន់មានមនុស្សស្លាប់ម្នាក់ផង ដោយសារជំងឺកូវីដ-១៩ នេះ គួររង់ចាំតែបន្តិច ច្បាស់ជានឹងទទួលបានជំនួយអន្តរជាតិក្នុងការផ្តល់វ៉ាក់សាំងបង្ការជំងឺកូវីដ-១៩ ដោយមិនគិតថ្លៃ ។
ជាពិសេស ការផ្តល់វ៉ាក់សាំង ដោយមិនគិតថ្លៃនេះនឹងធ្វើឡើងតាមរយៈអង្គការសហប្រជាជាតិ (UN) និងអង្គការសុខភាពពិភពលោក (WHO) តាមរូបភាពកម្មវិធី COVAX ដែលទើបតែចាប់ផ្តើមអនុវត្តន៍ ។ បន្ទាប់ពីហ៊ុន សែន ប្រកាសរៃអង្គាសលុយពីប្រជាពលរដ្ឋ ដើម្បីទៅទិញវ៉ាក់សាំងដូចទិញនំអាកោរ សារព័ត៌មានអន្តរជាតិ The Diplomat បានលាតត្រដាងបំណងបោកបញ្ឆោតរបស់ ហ៊ុន សែន ក្នុងអត្ថបទខាងក្រោមនេះ មានចំណងជើង «Cambodia’s COVID-19 Vaccine Boondoggle» មានន័យថា «គម្រោងទិញវ៉ាក់សាំង បង្ការជំងឺកូវីដ-១៩ នៅកម្ពុជា ជាទង្វើឥតប្រយោជន៍ និងបោកបញ្ឆោត»៕
ចែករំលែកព័តមាននេះ