រាជធានីភ្នំពេញ ៖ ក្រុមហ៊ុនអេសស៊ីធី បានយកអំណោយជាថ្នាំពេទ្យទៅចែកជូនប្រជាពលរដ្ឋចំនួន១១០គ្រួសារ នៅក្នុងសង្កាត់ត្រពាំងក្រសាំង ខណ្ឌដង្កោ កាលពីថ្ងៃទី១១ កញ្ញា ឆ្នាំ២០១០ ។ អញ្ជើញចូលរួមក្នុងពិធីចែកអំណោយនេះមានលោកស្រីប៉ាត់ ថាក់ម៉ាសិរីគុល ប្រធានក្រុមហ៊ុនអេសស៊ីធី តំណាងអាជ្ញាធរដែនដីថ្នាក់សង្កាត់-ខណ្ឌ និងតំណាងមន្ទីរសុខាភិបាល ព្រមទាំងប្រជាពលរដ្ឋយ៉ាងច្រើនកុះករ ។ ក្នុងឱកាសនោះលោកស្រីប្រធានក្រុមហ៊ុនអេសេស៊ីធីបានថ្លែងថា ក្រុមហ៊ុនអេសស៊ីធីតែងតែបានធ្វើសកម្មភាពសង្គមកិច្ច ដើម្បីរួមចំណែកលើកកំពស់សុខភាពប្រជាពលរដ្ឋទាំងនៅប្រទេសថៃ ក៏ដូចជាប្រទេសកម្ពុជា ។
ពេលនេះក្រុមហ៊ុនដោយមានការសហការជាមួយមន្ទីរពេទ្យរ៉ូយ៉ាល់រតនៈបានយកថ្នាំពេទ្យ និងក្រុមគ្រូពេទ្យមួយចំនួនមកចែកនិងពិនិត្យជំងឺជូនប្រជាពលរដ្ឋដោយមិនគិតថ្លៃ ដែលនេះបញ្ជាក់ពីសេចក្តីស្រឡាញ់រាប់អានរវាងក្រុមហ៊ុនជាមួយប្រជាពលរដ្ឋ ។ លោកស្រីប្រធានក្រុមហ៊ុនអេសស៊ីធីបានជូនពរប្រជាពលរដ្ឋទាំងអស់ឱ្យមានសុខភាពល្អគ្រប់ៗគ្នា ។
ថ្នាំពេទ្យដែលយកទៅចែកជូនប្រជាពលរដ្ឋនាឱកាសនោះក្នុង១គ្រួសារទទួលបាន១ប្រអប់ ដែលមានថ្នាំឈឺក្បាល ឆ្អល់ពោះ ឈឺក្រពះ ថ្នាំលាងរបួស ក្អករាក់ ហើម ថ្លោះ គ្រេច រមាស់ ថ្នាំក្តៅខ្លួន និងថ្នាំការពារនៅពេលមានប្រតិកម្ម ។ ថ្នាំពេទ្យទាំងអស់នេះសុទ្ធតែបានសរសេរប្រាប់ពីរបៀបប្រើប្រាស់ និងពេលវេលាកំណត់យ៉ាងច្បាស់លាស់ ។ ដោយឡែក សំរាប់វត្តសែនអារុណវតី សាលាបឋមសិក្សាត្រពាំងក្រសាំង និងសាលាសង្កាត់ត្រពាំងក្រសាំង ក៏ទទួលបានថ្នាំពេទ្យ១ប្រអប់ធំផងដែរ ។
ក្រុមហ៊ុនអេសស៊ីធីជាក្រុមហ៊ុនពាណិជ្ជកម្មធំមួយដែលមានឈ្មោះបោះសម្លេងទាំងក្នុងនិងក្រៅប្រទេសលើសកម្មភាពពាណិជ្ជកម្មប្រកបដោយគុណភាព ។ ដើម្បីឆ្លើយតបទៅនឹងតំរូវការនៅលើទីផ្សារ ក្រុមហ៊ុនអេសស៊ីធីបានព្យាយាមពង្រឹងយុទ្ធសាស្ត្ររបស់ខ្លួនដើម្បីក្លាយជាក្រុមហ៊ុនពាណិជ្ជកម្មនាំមុខគេនៅក្នុងតំបន់អាស៊ីដោយផ្តោតសំខាន់ទៅលើផ្នែកថាមពលកាកសំណល់ ដែលអាចយកមកប្រើការឡើងវិញនិងគ្រឿងសំណង់គ្រប់ប្រភេទសំរាប់ផ្នែកឧស្សាហកម្ម ៕
ចែករំលែកព័តមាននេះ