រាជធានីភ្នំពេញ ៖ សេចក្តីជូនព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ចុះថ្ងៃទី២ កក្កដា ឆ្នាំ២០១៥ បានឱ្យដឹងថា តាមការអញ្ជើញរបស់លោកឧត្តមសេនីយ៍ ថាណៈសាក់ ប៉ាទីម៉ាប្រាកន ឧបនាយករដ្ឋមន្ត្រី រដ្ឋមន្ត្រីការបរទេសនៃព្រះរាជាណាចក្រថៃ លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេស និងសហប្រតិបត្តិអន្តរជាតិនៃព្រះរាជាណាចក្រកម្ពុជា នឹងដឹកនាំគណៈប្រតិភូមួយអញ្ជើញទៅបំពេញទស្សនកិច្ចផ្លូវការនៅប្រទេសថៃពីថ្ងៃទី១០ ដល់ថ្ងៃទី១២ កក្កដា ដើម្បីជំរុញទំនាក់ទំនងប្រទេសទាំង២ឱ្យកាន់តែស៊ីជម្រៅលើគ្រប់វិស័យបន្ថែមទៀត ។
តាមសេចក្តីជូនព័ត៌មានបញ្ជាក់ថា គណៈប្រតិភូអមដំណើររួមមាន លោក វ៉ា គឹមហុង ទេសរដ្ឋមន្ត្រី ទទួលបន្ទុកកិច្ចការព្រំដែន និងលោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ។
ក្នុងអំទ្បុងពេលទស្សនកិច្ចជាផ្លូវការនេះ ដែលស្របពេលនឹងខួបលើកទី៦៥ នៃទំនាក់ទំនងការទូតរវាងប្រទេសទាំង២ លោកឧបនាយករដ្ឋមន្ត្រី ហោ ណាំហុង នឹងជួបសម្តែងការគួរសមជាមួយលោកឧត្តមសេនីយ៍ ប្រាយុទ្ធ ច័ន្ទអូចា នាយករដ្ឋមន្ត្រីនៃព្រះរាជាណាចក្រថៃ និងជួបពិភាក្សាទ្វេភាគីជាមួយលោកឧត្តមសេនីយ៍ ថាណៈសាក់ ប៉ាទីម៉ាប្រាកន ។
ក្នុងអំទ្បុងពេលស្នាក់នៅប្រទេសថៃ លោកឧបនាយករដ្ឋមន្ត្រី ហោ ណាំហុង នឹងអញ្ជើញចូលរួមក្នុងពិធីប្រគល់វត្ថុបុរាណខ្មែរចំនួន១៦ ជូនដល់កម្ពុជាដោយភាគីថៃ និងពិធីចុះហត្ថលេខាលើវិសោធនកម្មនៃកិច្ចព្រមព្រៀងស្តីពីការឆ្លងកាត់ព្រំដែន និងសេចក្តីប្រកាសបើកប៉ុស្តិ៍ត្រួតពិនិត្យព្រំដែនទ្វេភាគី អានសេះ (ខេត្តព្រះវិហារ-កម្ពុជា) -អាន់ម៉ា (ខេត្តអ៊ូប៊ុន រាជថានី-ថៃ) ជាប៉ុស្តិ៍ត្រួតពិនិត្យព្រំដែនអន្តរជាតិ ។
ការចុះហត្ថលេខាលើកិច្ចព្រមព្រៀងស្តីពីការឆ្លងកាត់ព្រំដែន នឹងអនុញ្ញាតឱ្យប្រជាជនដែលរស់នៅតំបន់ព្រំដែន និងមានប័ណ្ណឆ្លងដែនអាចធ្វើដំណើរ និងស្នាក់នៅក្នុងតំបន់ព្រំដែនថៃ និងតំបន់ព្រំដែនកម្ពុជា (សម្រាប់ជនជាតិថៃ) រយៈពេល៧ថ្ងៃ ហើយសម្រាប់អ្នកកាន់ប័ណ្ណឆ្លងដែន ដែលបានបំពេញតាមលក្ខខណ្ឌ និងបែបបទផ្ទៃក្នុងរបស់ប្រទេសម្ចាស់ផ្ទះ អាចស្នាក់នៅរយៈពេល១៥ថ្ងៃ និង៣០ថ្ងៃ ៕
ចែករំលែកព័តមាននេះ