AFP ផ្សាយថា កូរ៉េខាងត្បូងកាលពីថ្ងៃទី១ កក្កដា ២០១៥ ប្រកាសលើកលែងទិដ្ឋាការដល់អ្នកទេសចរពីចិន និងប្រទេសមួយចំនួននៅតំបន់អាស៊ានក្នុងនោះមានកម្ពុជាផងដែរដើម្បីទាក់ទាញអ្នកទេសចរបរទេសជាក្រុមកាលពីថ្ងៃទី១ កក្កដា ក្រោយពីជួបវិបត្តិការរាតត្បាតវីរុសតាមផ្លូវដង្ហើម(MERS) បង្កឱ្យអ្នកទេសចរធ្លាក់ចុះខ្លាំង ។ ការប្រកាសរបស់រដ្ឋាភិបាលក្រុងសេអូ៊លនោះ ខណៈពេលចំនួនអ្នកឆ្លងវីរុស MERS ថ្មីនៅកូរ៉េខាងត្បូងស្ថិតក្នុងចំណុចសូន្យក្នុងរយៈពេល៤ថ្ងៃជាប់គ្នា ដោយបច្ចុប្បន្នមានអ្នកឆ្លងវីរុស MERS សរុប១៨២នាក់ និងស្លាប់ចំនួន៣៣នាក់ ។
ក្រសួងយុត្តិធម៌កូរ៉េខាងត្បូងឱ្យដឹងថា ទិដ្ឋាការដែលបានចេញកាលពីពេលមុននេះនឹងបន្តរយៈពេល៣ខែទៀតដើម្បីស្វាគមន៍អ្នកទេសចរនៅក្នុងអំឡុងខែកក្កដា និងសីហា ។ នៅក្នុងសេចក្តីថ្លែងការណ៍របស់ក្រសួងបញ្ជាក់ថា បទដ្ឋាននោះស្ថិតក្នុងទិសដៅដើម្បីជំរុញដល់ឧស្សាហកម្មទេសចរណ៍ដែលទទួលផលប៉ះពាល់ពីបញ្ហាវីរុស MERS ។
ក្នុងអំឡុងខែមិថុនា កន្លងមក នៅកោះ «ជេជូ» ដែលជាទីតាំងស្រូបយកខ្យល់អាកាសធម្មជាតិដ៏ល្បីរបស់កូរ៉េខាងត្បូង មានអ្នកទេសចរទៅកម្សាន្តធ្លាក់ចុះប្រហែល៤៦% ។ លោកគីម ស៊ុង រដ្ឋមន្ត្រីក្រសួងទេសចរណ៍ធ្លាប់ក្រើនរំឭកថា កូរ៉េខាងត្បូងអាចបាត់បង់ចំណូលដល់ទៅ២.៣០០លានដុល្លារ ប្រសិនបើចំនួនអ្នកទេសចរធ្លាក់ចុះ៥០% ។ កូរ៉េខាងត្បូងនឹងលើកលែងទិដ្ឋាការ១៥ដុល្លារ ចាប់ពីថ្ងៃទី៦ កក្កដា ដល់ថ្ងៃទី៣០ កញ្ញា ចំពោះអ្នកទេសចរដែលធ្វើដំណើរជាក្រុម ។ ប្រទេសដែលបានទទួលការលើកលែងទិដ្ឋាការនេះរួមមាន ចិន កម្ពុជា ឥណ្ឌូណេស៊ី ហ្វ៊ីលីពីន និងវៀតណាម ។ ចំពោះទិដ្ឋាការដែលចេញក្នុងអំឡុងពីថ្ងៃទី១ មីនា ដល់ថ្ងៃទី៣០ មិថុនា នឹងបន្តរយៈពេលដោយស្វ័យប្រវត្តិ៣ខែទៀត សរុបមានចំនួន៦ខែ និងសម្រាប់អ្នកទេសចរចិនដែលធ្វើដំណើរជាក្រុមកាន់ទិដ្ឋាការជប៉ុនអាចស្នាក់នៅកូរ៉េខាងត្បូងបានចំនួន១៥ថ្ងៃ ៕
ចែករំលែកព័តមាននេះ