ធនាគារដ៏ល្បីរបស់កាតា (QNB) បានឱ្យដឹងកាលពីពេល ថ្មីៗកន្លងមកថា កាតានៅមានបរិមាណប្រេង និងឧស្ម័នធម្មជាតិសម្រាប់បម្រុងទុកដ៏មហាសាល អាចប្រើបានក្នុងរយៈពេលយូរដល់ទៅ១៣៨ឆ្នាំឯណោះ ។
ធនាគារដ៏ល្បីរបស់កាតា (QNB) បានឱ្យដឹងកាលពីពេល ថ្មីៗកន្លងមកថា កាតានៅមានបរិមាណប្រេង និងឧស្ម័នធម្មជាតិសម្រាប់បម្រុងទុកដ៏មហាសាល អាចប្រើបានក្នុងរយៈពេលយូរដល់ទៅ១៣៨ឆ្នាំឯណោះ ។ នោះជាផ្នែកមួយនៃលទ្ធផលអង្កេតដែលរៀបចំឡើងដោយអ្នកស្រាវជ្រាវរបស់ក្រុមហ៊ុនថាមពលដ៏ល្បីនៅលើពិភពលោក «BP»។
របាយការណ៍បញ្ជាក់ថា ប្រទេសមហាសេដ្ឋីនៅឈូងសមុទ្រពែរ្ស៍នេះ នៅមានបរិមាណប្រេង និងឧស្ម័នធម្មជាតិសម្រាប់បម្រុងទុកច្រើនលើសលប់ អាចប្រើបានរយៈពេលដល់ទៅ១៣៨ឆ្នាំឯណោះ ។ តាមការអង្កេតរបស់ BP រកឃើញថា កាតានៅតែកាន់តំណែងជាប្រទេសផលិតប្រេងដ៏ធំ ដោយមានបរិមាណ «ប្រេងបម្រុងទុកច្រើន» គិតជាមធ្យមគឺមានប្រហែល៨៣.៦០០ធុងសម្រាប់ពលរដ្ឋម្នាក់នៅឆ្នាំ២០១៤ ។
ចំណែកកាសែត «Gulf Times» ស្ថិតនៅក្រុងដូហាផ្សាយថា កាតាស្ថិតនៅលំដាប់ទី៣ក្នុងនាមជាប្រទេសផលិតឧស្ម័នធម្មជាតិដ៏ធំនៅលើពិភពលោកក្នុងពេលបច្ចុប្បន្នបន្ទាប់ពីអាមេរិក និងរុស្ស៊ី ។ ឧស្ម័នធម្មជាតិដែលកាតាផលិតមានប្រហែល៥,១%នៃបរិមាណឧស្ម័នធម្មជាតិដែលផលិតបាននៅទូទាំងពិភពលោក ។
សម្រាប់ទិន្នន័យចុងក្រោយនៃលទ្ធផលអង្កេតរបស់ BP និងការអង្កេតរបស់ GuffTimes បញ្ជាក់ស្របគ្នាថា កាតានៅតែគ្រប់គ្រងជើងឯកក្នុងនាមប្រទេសនាំចេញឧស្ម័នធម្មជាតិប្រភេទរាវ (LNG) ដ៏ធំនៅលើពិភពលោកក្នុងពេលបច្ចុប្បន្ន ដោយមានបរិមាណប្រហែល៣១%នៅលើពិភពលោកក្នុងឆ្នាំ២០១៤ ។
នៅមុនពេលរុករកឃើញប្រេង និងឧស្ម័នធម្មជាតិនៅកាតា កាលពីឆ្នាំ១៩៤០ ប្រជាជនកាតាភាគច្រើនស្ថិតក្នុងភាពក្រីក្ររស់នៅដោយការប្រកបមុខរបរជាអ្នកនេសាទ និងរកងាវនៅក្នុងសមុទ្រជារបរចម្បង ។ ចំពោះភាពមានស្តុកស្តម្ភ និងមានចំណូលដ៏មហាសាលពីឧស្សាហកម្មប្រេង បង្កឱ្យសេដ្ឋកិច្ចរបស់កាតាមានការរីកចម្រើនយ៉ាងឆាប់រហ័ស រហូតធ្វើឱ្យអត្រាអ្នកគ្មានការងារធ្វើរបស់កាតានៅសល់មិនដល់០,១%ទេ ក្នុងពេលបច្ចុប្បន្នពីអត្រាគ្មានការងារដែលកើនខ្ពស់ជាង៥០%នៅមុនពេលរកឃើញប្រេង និងឧស្ម័នធម្មជាតិ ៕
ចែករំលែកព័តមាននេះ