រាជធានីភ្នំពេញ ៖ ដោយមានការណែនាំពីលោកកែប ជុតិមា អភិបាលរាជធានីភ្នំពេញអង្គភាពលូទឹកនៃមន្ទីរសាធារណការរាជធានីភ្នំពេញ បាននិងកំពុងសំរុកស្តារបូម លាង អណ្តូងលូ និងជួសជុលកែលំអគម្របលូគ្រប់ផ្លូវក្នុងរាជធានីភ្នំពេញដើម្បីត្រៀមរដូវវស្សាមកដល់ ។ កាលពីព្រឹកថ្ងៃសៅរ៍ ទី២៦ មីនា ឆ្នាំ២០១១ នេះ លោកនៅ សារឿន ប្រធានអង្គភាពលូទឹកបូមទឹកនៃមន្ទីរសាធារណការ និងដឹកជញ្ជូនរាជធានីភ្នំពេញបានទៅពិនិត្យមើល និងជំរុញឱ្យជំនាញធ្វើការបូមស្តារ លាងលូអណ្តូងលូនៅកំណាត់ផ្លូវលេខ៤៧ ក្នុងសង្កាត់ស្រះចក និងសង្កាត់វត្តភ្នំ ខណ្ឌដូនពេញ ។
លោកប្រធានអង្គភាពលូទឹកបូមទឹកបានបញ្ជាក់ថា អង្គភាពបាបបញ្ចេញរថយន្តចំនួន៥គ្រឿងចាប់ផ្តើមស្តារបូម លាង លូ អណ្តូងលូកាយភក់ និងកាកសំណល់ចេញពីលូដោយដាក់រថយន្ត២គ្រឿងបូមនៅកំណាត់ផ្លូវលេខ៦៣ និងមហាវិថីព្រះនរោត្តម តាំងពីដើមខែមីនា ឆ្នាំ២០១១ មកម្ល៉េះ ។ រថយន្ត២គ្រឿងទៀតដាក់ធ្វើសកម្មភាពបូមស្តារលាងលូនៅផ្លូវលេខ៦៩២ ផ្លូវលេខ៣៣៧ ផ្លូវលេខ៥៦៦ ផ្លូវលេខ៥២៨ និងកំណាត់ផ្លូវមួយចំនួនទៀតនៅតំបន់សាលាសន្ធរម៉ុក ។ល។ ធ្វើយ៉ាងណាឱ្យរួចរាល់មុនរដូវភ្លៀងខាងមុខនេះ ពិសេសការការកកស្ទះលូទឹក លែងហូរចាល់លិចផ្លូវ ។
លោកនៅ សារឿន បានបន្តទៀតថា លោកកែប ជុតិមា អភិបាលរាជធានីភ្នំបេញបានណែនាំឱ្យមន្ទីរសាធារណការ និងដឹកជញ្ជូនរាជធានីភ្នំពេញ និងអង្គភាពទឹកបូមទឹករបស់លោកធ្វើការបូមស្តារ លាងលូ កាយភក់ចេញពីលូ និងជួសជុលកែលំអលូគ្រប់ផ្លូវទាំងអស់ជាបន្តបន្ទាប់ធកវើយ៉ាងណាឱ្យរួចរាល់នៅមុនរដូវភ្លៀងខាងមុខនេះ ។ លោកប្រធានអង្គភាពបានបន្តថា លោកអភិបាលរាជធានីភ្នំពេញបានណែនាំដល់អង្គភាពលូទឹកបូមទឹកត្រូវដាក់កម្លាំងត្រៀមពិនិត្យមើល ស្ថានភាពទឹកជាប្រចាំគ្រប់ស្ថានីយទាំងអស់ អន្តរាគមន៍បូមទឹកតំបន់ទួលគោក តំបន់ទឹកទំពុន តំបន់បឹងត្របែក និងតំបន់មាត់ទន្លេចតុមុខទាំង៤ស្ថានីយថ្មីក្នុងខណ្ឌដូនពេញ ។
លោកប្រធានបានសំណូមពរដល់បងប្អូនប្រជាពលរដ្ឋដែលមានលំនៅឋានជាប់មាត់លូក៏ដូចជាក្រុមហ៊ុនឯកជនរដ្ឋនានាដែរ ។ ធ្វើយ៉ាងណាកុំនាំគ្នាយកសំរាម និងកាកសំណល់យកមកញាត់ចូលលូបណ្តាលឱ្យកកស្ទះនាំទៅដល់ការលិចលង់ដោយជំនន់ទឹកភ្លៀងដោយសារតែការមិនយកចិត្តទុកដាក់ ។ បច្ចុប្បន្ននេះសាលារាជធានីភ្នំពេញបានយកចិត្តទុកដាក់យ៉ាងខ្លាំងលើការងារស្តារបូមលាងលូ និងអណ្តូងលូបានល្អមានសោភ័ណភាពផង បរិស្ថានល្អផង ធ្វើឱ្យសុខភាពប្រជាជនកាន់តែមានអនាម័យល្អប្រសើរថែមទៀត ហើយការងារទាំងអស់នេះ ដើម្បីចូលរួមអបអរសាទរបុណ្យចូលឆ្នាំខ្មែរឆ្នាំ២០១១ ខាងមុខនេះផងដែរ ៕
ចែករំលែកព័តមាននេះ