រាជធានីភ្នំពេញ ៖ ក្រុមប្រឹក្សាធម្មនុញ្ញបានអះអាងថា ការកាត់ក្តីលើ សំណុំរឿងរបស់គណបក្សសម្ព័ន្ធ ដើម្បីប្រជាធិបតេយ្យ (បក្សជួង)ធ្វើឡើងតាមភស្តុតាង ដែលភាគីផ្ញើមក និងសម្រេចបានអង្គហេតុ និងអង្គច្បាប់…
រាជធានីភ្នំពេញ ៖ ក្រុមប្រឹក្សាធម្មនុញ្ញបានអះអាងថា ការកាត់ក្តីលើ សំណុំរឿងរបស់គណបក្សសម្ព័ន្ធ ដើម្បីប្រជាធិបតេយ្យ (បក្សជួង)ធ្វើឡើងតាមភស្តុតាង ដែលភាគីផ្ញើមក និងសម្រេចបានអង្គហេតុ និងអង្គច្បាប់ ។
លោក ព្រហ្ម វិចិត្រអក្ខរា អគ្គលេខាធិការរងក្រុមប្រឹក្សាធម្មនុញ្ញាបានលើកឡើងនៅក្នុងសន្នីសីទសារព័ត៌មាន នាព្រឹកថ្ងៃទី២២ ខែធ្នូ ឆ្នាំ២០២០ថា ក្រុមប្រឹក្សាធម្មនុញ្ញកាត់ក្តីចំពោះសំណុំរឿងរបស់ គ.ជ.ប ពាក់ព័ន្ធនឹងបណ្តឹងរបស់គណបក្សសម្ព័ន្ធ ដើម្បីប្រជាធិបតេយ្យធ្វើឡើងតាមភស្តុតាង និងធ្វើតាមអង្គហេតុនឹងអង្គច្បាប់ទាំងអស់ ។
លោកបញ្ជាក់ថា«យើងធ្វើការពិចារណាយ៉ាងស៊ីជម្រៅបំផុត ហើយមានអង្គហេតុ និងច្បាប់ ។ អ្វីដែលតវ៉ាសម្រាប់អ្នកចាញ់នោះ គឺស្ទើតែទាំងពិភពលោកទៅហើយ មិនថា តែកម្ពុជានោះទេ ជាក់ស្តែង គឺអ្នកចាញ់ គឺស្រែកអយុត្តិធម៌ ។ ប៉ុន្តែអ្នកដែលបានសិក្សាផ្នែកច្បាប់ហើយសិក្សាពីអង្គហេតុ និងច្បាប់គេ និងយល់» ។
ចំណែកលោក តាំង រតនាអគ្គលេខាធិការក្រុមប្រឹក្សាធម្មនុញ្ញបានលើកឡើងថា ការបញ្ចេញមតិជាសិទ្ធរបស់គេ ប៉ុន្តែបើការបញ្ចេញមតិប៉ះពាល់ដល់សិទ្ធិអ្នកដ៏ទៃគេអាចប្តឹងទៅស្ថាប័នមានសមត្ថកិច្ច ដើម្បីចាត់វិធានការតាមផ្លូវច្បាប់បាន ។ លោកបញ្ជាក់ថា«ក្នុងច្បាប់របស់ក្រុមប្រឹក្សាធម្មនុញ្ញការមិនគោរពសេចក្តីក្រុមប្រឹក្សាធម្មនុញ្ញនឹងមានទោសតាមច្បាប់ក្រមរដ្ឋប្បវេណី» ។
ជាមួយគ្នានោះដែរ លោក រតនា ក៏បានលើកឡើងថា លោកកំពុងធ្វើសំណើរទៅកាន់ក្រុមប្រឹក្សាធម្មនុញ្ញ ដើម្បីធ្វើការដាក់សំណើរទៅកាន់សមត្ថកិច្ចចាត់វិធានការចំពោះករណីគណបក្សសម្ព័ន្ធ ដើម្បីប្រជាធិតេយ្យហើយ ។ លោកអគ្គលេខាធិកាក៏បានធ្វើការបកស្រាយចំពោះអ្នកដែលនិយាយនៅក្នុងសវនាការមានការមានការរឹតត្បិត និងមិនឲ្យថតសម្លេងនោះ គឺជាការមិនត្រឹមនោះទេព្រោះថា នៅក្នុងសវនាការគេមិនដែលអនុញ្ញាតក្នុងបន្ទប់សវនាការ ដូច្នេះនៅក្រុមប្រឹក្សាធម្មនុញ្ញក៏មិនអនុញ្ញាតដូចគ្នា ។
លោកបញ្ជាក់ថា«យើងមិនអនុញ្ញាតឲ្យថតសម្លេង ឬវីឌីអូនៅក្នុងបន្ទប់សវនាការទេ ។ ខ្ញុំបញ្ជាក់ថា នៅប្រទេសដ៏ទៃទៀតគេបានជួលអ្នកគូរូបទៅគូរ អីញ្ចឹងទេ អ្នកសារព័ត៌មានអាចយករូបសវនាការដែលមានចៅក្រម ក្រឡាបញ្ជី និងអ្នកពាក់ព័ន្ធជារូបគំនូ ដើម្បីផ្សាយ» ។ លោកបន្តថា នៅសវនាការក៏មិនអនុញ្ញាតឲ្យមានការសួរឆ្លើយឆ្លងរបស់អ្នកទោសនោះទេ គឺចៅក្រមសួរអ្វីត្រូវឆ្លើយនឹង ។ ប៉ុន្តែរាល់ការស្នើសុំ គឺត្រូវស្នើទៅក្រុមប្រឹក្សាជំនុំជម្រះទាំងអស់ ។
លោក តាំងរតនា ក៏បានលើកឡើងថា អ្នកដែលនិយាយក្រុមប្រឹក្សាធម្មនុញ្ញអយុត្តិធម៌នោះក្រុមប្រឹក្សា គឺក្រុមប្រឹក្សាមិនអាចទទួលយកបានទេ ព្រោះថា ក្រុមប្រឹក្សាធ្វើអ្វីតាមអង្គច្បាប់ និងអង្គហេតុ ។ ក្រុមប្រឹក្សាធម្មនុញ្ញាតធ្វើការដោយហ្មត់ចត់ណាស់ ព្រោះជាសេចក្តីសម្រេចចុងក្រោយបិទផ្លូវការតវ៉ា ។ លោកបញ្ជាក់ថា«យើងធ្វើការសម្រេច គឺឈរលើស្មារតី និងឧត្តមគតិមួយដែរ យើងយកច្បាប់ និងការទទួលខុសត្រូវជាធំក្នុងនាមជាស្ថាប័នឯករាជ និងអព្យាក្រឹត្យ ។ អីញ្ចឹងរាល់ការសម្រេច គឺមានការប្រយ័ត្នប្រយែងណាស់ ចំពោះការសម្រេចដែលផ្អែកតាមស្មារតីច្បាប់ ។ ហើយបណ្តឹងដែលអ្នកប្តឹងមកភ្ជាប់នឹងភស្តុតាង គឺក្រុមប្រឹក្សាធម្មនុញ្ញពិនិត្យយ៉ាងយកចិត្តទុកដាក់ដោយគ្មានចន្លោះនោះទេ» ។ លោកអគ្គលេខាធិការក៏បានលើកឡើងទៀតថា ក្រុមប្រឹក្សាក៏មាននីតិវិធីក្នុងដោះស្រាយបណ្តឹងដោយពេលខ្លះក៏ចុះទៅដល់កន្លែងកើតហេតុ ដើម្បីសិក្សាផងដែរ ។
បើតាមលោកតាំង រតនាបានលើកឡើងថាសវនាការរបស់ក្រុមប្រឹក្សាធម្មនុញ្ញបានបើកសវនាការមានវត្តមានទាំង៩រូបនៃសមាជិកក្រុមប្រឹក្សាធម្មនុញ្ញដោយធ្វើការពិនិត្យរាល់បណ្តឹងយ៉ាងល្អិតល្អន់។
សូមជម្រាបថា គណៈកម្មាធិការជាតិរៀបចំការបោះឆ្នោត(គ.ជ.ប) កាលពីពេលកន្លងមកបានប្តឹងអនុប្រធានគណបក្សសម្ព័ន្ធដើម្បីប្រជាធិបតេយ្យ ពីបទចោទប្រកាន់ចំនួន៣ គឺ«បរិហារកេរ្តិ៍ជាសាធារណៈ ជេរប្រមាថជាសាធារណៈ និងញុះញង់ឲ្យប្រព្រឹត្តបទឧក្រិដ្ឋជាអាទិ៍ ពាក់ព័ន្ធនឹងការថ្លែងជាសាធារណៈរបស់មន្ត្រីគណបក្សនេះ ។ គ.ជ.ប បានចោទលោក អ៊ី សាំងឡេង អនុប្រធាននៃគណបក្សសម្ព័ន្ធ ដើម្បីប្រជាធិបតេយ្យថា បានផ្តល់ការអធិប្បាយតាមប្រព័ន្ធផ្សព្វផ្សាយពាក់ព័ន្ធនឹងការចុះឈ្មោះប្រជាពលរដ្ឋបោះឆ្នោត កាលពីអំឡុងខែវិច្ឆិកា ដែលស្ថាប័នបោះឆ្នោតអះអាងថា ជាការបរិហារកេរ្តិ៍ឈ្មោះ កិត្តិយស និងសេចក្តីថ្លៃថ្នូររបស់ស្ថាប័នគ.ជ.ប ។
កាលពីថ្ងៃទី២១ ធ្នូ ឆ្នាំ២០២០ ក្រុមប្រឹក្សាធម្មនុញ្ញាបានសម្រេចតម្កល់សេចក្តីសម្រេចរបស់គណៈកម្មាធិការជាតិរៀបចំការបោះឆ្នោត (គ.ជ.ប)ទុកជាបានការដដែលជុំវិញបណ្តឹងតវ៉ារបស់តំណាងគណបក្សសម្ព័ន្ធដើម្បីប្រជាធិតេយ្យ(LDP)ពាក់ព័ន្ធនឹងការបន្លំចុះឈ្មោះអ្នកបោះឆ្នោត ។ លោកអ៊ី សាំងឡេង អនុប្រធាន និងជាអ្នកនាំពាក្យគណបក្សសម្ព័ន្ធដើម្បីប្រជាធិតេយ្យ(LDP) បានអះអាងថា សេចក្តីសម្រេចនេះ គឺអយុតិ្តធម៌ណាស់គណបក្សរបស់លោក ៕
ចែករំលែកព័តមាននេះ