រាជធានីភ្នំពេញ ថ្ងៃទី៣០ ខែមិថុនា ឆ្នាំ២០១៥ ៖ ការសិក្សាថ្មីមួយដែលត្រូវបានរៀបចំផ្សព្វផ្សាយនៅថ្ងៃនេះនៅក្នុងទីក្រុងភ្នំពេញ ដោយទីភ្នាក់ងារសហរដ្ឋអាមេរិកសម្រាប់អភិវឌ្ឍន៍អន្តរជាតិ (USAID) តាមរយៈគម្រោងគាំទ្រព្រៃឈើ
រាជធានីភ្នំពេញ ថ្ងៃទី៣០ ខែមិថុនា ឆ្នាំ២០១៥ ៖ ការសិក្សាថ្មីមួយដែលត្រូវបានរៀបចំផ្សព្វផ្សាយនៅថ្ងៃនេះនៅក្នុងទីក្រុងភ្នំពេញ ដោយទីភ្នាក់ងារសហរដ្ឋអាមេរិកសម្រាប់អភិវឌ្ឍន៍អន្តរជាតិ (USAID) តាមរយៈគម្រោងគាំទ្រព្រៃឈើ និងជីវចម្រុះអះអាងថា ព្រៃឡង់របស់ប្រទេសកម្ពុជាមានជីវៈចម្រុះដ៏សំខាន់បំផុតមួយក្នុងចំណោមតំបន់មានជីវៈចម្រុះសំខាន់ៗទាំង១០ នៅលើពិភពលោក ដែលមានប្រភេទសត្វ និងរុក្ខជាតិកំពុងរស់នៅជិត១.០០០ប្រភេទ ។ ការសិក្សាស្រាវជ្រាវដែលអនុវត្តដោយអង្គការអភិរក្សអន្តរជាតិ សហការជាមួយរដ្ឋបាលព្រៃឈើ គឺជាអាទិភាពមួយតាមរយៈការស្នើសុំរបស់រដ្ឋបាលព្រៃឈើដើម្បីឆ្លើយតបទៅនឹងអាទិភាពថ្នាក់ជាតិ ដើម្បីការពារតំបន់ព្រៃឡង់នេះ ។ ជាមួយនឹងការស្រាវជ្រាវនេះ រដ្ឋបាលព្រៃឈើអាចរៀបចំដំណើរព្រាងអនុក្រឹត្យដើម្បីដាក់ទំហំផ្ទៃដី៣០០.០០០ហិកតារបស់ព្រៃឡង់ជាតំបន់ព្រៃការពារ ។
លោកស្រី Rebecca Black នាយិកាទីភ្នាក់ងារសហរដ្ឋអាមេរិកសម្រាប់អភិវឌ្ឍន៍អន្តរជាតិប្រចាំនៅកម្ពុជា បានមានប្រសាសន៍ថា ការយកចិត្តទុកដាក់ចំពោះបរិស្ថាន ការការពារជីវៈចម្រុះ និងការអភិរក្សធនធានធម្មជាតិ ជាការងារអាទិភាពរបស់ប្រទេសកម្ពុជា និងត្រូវបានដាក់បញ្ចូលទៅក្នុងយុទ្ធសាស្ត្រចតុកោណរបស់រាជរដ្ឋាភិបាល ។ លោកស្រីបន្តថា USAID ពិតជារីករាយនឹងផ្តល់ថវិកាគាំទ្រដល់ការសិក្សាស្រាវជ្រាវ និងលទ្ធផលរកឃើញដ៏អស្ចារ្យនេះ។ វាបង្ហាញថា មានមូលហេតុសំខាន់ៗជាច្រើនដើម្បីអភិរក្ស និងដាក់ព្រៃឡង់ជាបេតិកភណ្ឌធម្មជាតិ ។
ជាមួយនឹងការរកឃើញនូវប្រភេទសត្វ និងរុក្ខជាតិជិត១.០០០ប្រភេទ ព្រៃឡង់គឺជាគំរូដ៏អស្ចារ្យមួយនៃតំបន់ទំនាបព្រៃស្រោងតំបន់ឥណ្ឌូភូមា ហើយក៏ជាតំបន់ជីវៈចម្រុះដ៏សំខាន់បំផុតមួយក្នុងចំណោមតំបន់មានជីវៈចម្រុះសំខាន់ៗទាំង១០ នៅលើពិភពលោក ។ សត្វ និងរុក្ខជាតិរកឃើញទាំងអស់នោះមានរុក្ខជាតិ៥៣០ប្រភេទ ថនិកសត្វ៦០ប្រភេទ សត្វស្លាប២៦៦ប្រភេទ និងឧរង្គសត្វ និងថលជលិក៦៧ប្រភេទ ។
ព្រៃឡង់ គឺជាគំរូដ៏អស្ចារ្យមួយនៃទំនាបព្រៃស្រោងក្នុងតំបន់ឥណ្ឌូភូមា និងជាតំបន់មានជីវៈចម្រុះលំដាប់ថ្នាក់អន្តរជាតិមួយ ។ ការស្រាវជ្រាវបានរកឃើញប្រភេទរុក្ខជាតិចំនួន៥៣០ប្រភេទ ថនិកសត្វចំនួន៦០ប្រភេទ និងថលជលិក និងឧរង្គសត្វចំនួន៧៦ប្រភេទ ។
តំបន់ព្រៃឡង់មានទីតាំងស្ថិតនៅភាគខាងលិចនៃទន្លេមេគង្គ ចំភាគកណ្តាលនៃប្រទេសកម្ពុជា និងលាតសន្ធឹងលើខេត្តចំនួន៤គឺ ខេត្តក្រចេះ កំពង់ធំ ស្ទឹងត្រែង និងព្រះវិហារ ព្រមទាំងស្ថិតនៅលើទីជម្រាលចំនួន៣ ដូចជា ស្ទឹងសែន ស្ទឹងជីនិត និងសៀមបូក និងជាផ្លូវទឹកបែងចែករវាងបឹងទន្លេសាប និងអាងទន្លេមេគង្គ។ ព្រៃឡង់ គឺជាទីជម្រាលរបស់បឹងទន្លេសាប ដែលបម្រើសេចក្តីត្រូវការរបស់ប្រជាជនកម្ពុជារាប់លាននាក់ និងរួមចំណែកមួយភាគធំដល់ការអភិវឌ្ឍសេដ្ឋកិច្ចជាតិ ។ ជាងនេះទៅទៀត
ប្រជាសហគមន៍ជាង២៥០.០០០នាក់រស់នៅក្នុងភូមិចំនួន៣៤០ ស្ថិតនៅក្នុងនិងជុំវិញតំបន់ព្រៃឡង់ ពឹងអាស្រ័យស្ទើរតែទាំងស្រុងទៅលើតំបន់ព្រៃឡង់នេះសម្រាប់ការចិញ្ចឹមជីវិត ។ ការប្រមូលក្រវាញ ជ័រទឹក ឃ្មុំព្រៃ ផ្តៅ ឫស្សី និងផ្លែឈើព្រៃ គឺជាសកម្មភាពដែលរកប្រាក់ចំណូលសម្រាប់ពួកគាត់នៅក្នុងព្រៃឡង់ ។
លោកស្រី Tracy Farrell នាយិកាបច្ចេកទេសរបស់អង្គការអភិរក្សអន្តរជាតិ មានប្រសាសន៍ថា បើទោះបីជាតម្លៃផ្នែកជីវៈចម្រុះគួរឱ្យកត់សម្គាល់ជាងឃ្លាំងស្តុកទឹក និងឱកាសសេដ្ឋកិច្ចដ៏សំខាន់ ព្រៃឡង់នៅតែទទួលរងការកាប់បំផ្លាញព្រៃឈើក្នុងអត្រាកើនឡើងមួយខ្ពស់។ ការកាប់ឈើខុសច្បាប់ និងការជួញដូរសត្វព្រៃកំពុងរីកខ្លាំងនៅក្នុងតំបន់ព្រៃឡង់ និងកើតមានយ៉ាងប្រត្យក្សនៅទូទាំងតំបន់ព្រៃឡង់ក្នុងអត្រាមួយខ្ពស់ ។
លោកស្រី Tracy Farrell បន្តថា ប្រសិនបើមិនមានការធ្វើសកម្មភាពជាបន្ទាន់ណាមួយដើម្បីការពារព្រៃឡង់ទេ តំបន់ព្រៃដែលមានជីវៈចម្រុះដ៏មានតម្លៃ និងសេវាកម្មព្រៃឈើដែលផ្តល់កម្រៃច្រើនមួយនេះនឹងត្រូវបាត់បង់ជារៀងរហូត ៕
ចែករំលែកព័តមាននេះ