រាជធានីភ្នំពេញ ៖ វគ្គបំប៉នគ្រូបង្វឹកកីឡាវាយសីកម្រិត១ ដែលបានចាប់ផ្តើមធ្វើតាំងពីថ្ងៃ ទី២២ មិថុនា នៅទីស្នាក់ការគណៈកម្មាធិការជាតិអូឡាំពិកកម្ពុជា បានបញ្ចប់ជាស្ថាពរហើយពិធីបិទត្រូវបានរៀបចំធ្វើកាលពីថ្ងៃទី៣០ មិថុនា ក្រោមអធិបតីភាពលោកឧត្តមសេនីយ៍ឯក លី កុសល ប្រធានសហព័ន្ធកីឡាវាយសីកម្ពុជា ។
តាមរបាយការណ៍របស់គណៈគ្រប់គ្រងវគ្គបានឱ្យដឹងថា វគ្គបំប៉ននេះរៀបចំឡើងក្រោមការជួយឧបត្ថម្ភរបស់សហព័ន្ធកីឡាវាយសីអាស៊ី និងមានសិក្ខាកាមចូលរួមចំនួន៣២នាក់ មកពីតាមបណ្តាក្លិប និងសមាគមនានាចំនួន១៥ ទូទាំងប្រទស ។
វគ្គបំប៉នដ៏មានសារសំខាន់មួយនេះទទួលបានការចូលរួមពីលោកគ្រូ Sambenthan Sivape Vumal ជនជាតិម៉ាឡេស៊ី ជាមន្ត្រីអភិវឌ្ឍន៍របស់សហព័ន្ធកីឡាវាយសីអាស៊ី និងជាអ្នកសម្របសម្រួលរបស់សហព័ន្ធកីឡាវាយសីពិភពលោក ។
ក្រោយពីបានចូលរួមវគ្គបំប៉នរយៈពេល៩ថ្ងៃ ដែលមានការសិក្សាទ្រឹស្តី និងការអនុវត្តជាក់ស្តែងនៅលើទីលានរួចមក តាមការវាយតម្លៃជាទូទៅបង្ហាញឱ្យឃើញថា សិក្ខាកាមទទួលបានលទ្ធផលល្អមានចំនួន៦០% មធ្យម៣០% និងបឋម១០% ។ ក្រោយពីបញ្ចប់វគ្គបំប៉ននេះទៅ សិក្ខាកាមទាំងអស់បានប្តេជ្ញាថា នឹងយកចំណេះដឹងទាំងនេះទៅអភិវឌ្ឍធនធានមនុស្សក្នុងវិស័យកីឡាវាយសីនៅតាមក្លិប សាលារៀន និងបណ្តាខេត្តនានាក្នុងប្រទេសកម្ពុជាឱ្យមានសក្តានុពលដូចជាបណ្តាប្រទេសជិតខាងនៅក្នុងតំបន់ ។
លោកឧត្តមសេនីយ៍ឯក លី កុសល បានមានប្រសាសន៍ថា វគ្គបំប៉ននេះថ្វីដ្បិតតែមានរយៈពេលខ្លីមែន បុ៉ន្តែលោកសង្កេតឃើញថា សិក្ខាកាមទាំងអស់មានការខិតខំប្រឹងប្រែងយកចិត្តទុកដាក់ត្រងត្រាប់ស្តាប់យ៉ាងខ្លាំងនូវខ្លឹមសារមេរៀន មិនតែបុ៉ណ្ណោះថែមទាំងបានលះបង់ពេលវេលាដ៏មានតម្លៃមកចូលរួមដោយពុំគិតពីការនឿយហត់ឡើយ ។
លោកមានប្រសាសន៍បន្ថែមថា វគ្គនេះជាថ្នាលបណ្តុះបណ្តាលថ្មីមួយទៀត និងជាលើកទី៣ហើយសម្រាប់វគ្គគ្រូកម្រិត១ ។ អ្វីដែលពិសេសជាងវគ្គមុននោះគឺនៅត្រង់ថា វគ្គនេះបានប្រារព្ធចំពេលដែលសហព័ន្ធទទួលជំនួយជារ៉ាកែតពីសមាគមកីឡាវាយសីហុងកុង ដើម្បីចែកជូនទៅតាមសាលា ។ ទន្ទឹមនឹងនោះ ក្រុមការងារផ្សព្វផ្សាយកីឡាវាយសីរបស់សហព័ន្ធវាយសីពិភពលោកមានឈ្មោះថា Badminton Unlimited បានចុះមកថតជាខ្សែវីដេអូអំពីសកម្មភាពបំផុសកីឡាវាយសីកម្ពុជា ដើម្បីផ្សព្វផ្សាយទៅកាន់ពិភពលោកផងដែរ ៕
ចែករំលែកព័តមាននេះ