សម្តេចតេជោ ហ៊ុន សែន អំពាវនាវឲ្យពលរដ្ឋខ្មែរ កុំចល័តឆ្លងដែន ពេលនេះ!
- ភ្នំពេញ
ភ្នំពេញ៖ នៅព្រលប់ថ្ងៃទី២០ ខែធ្នូ ឆ្នាំ២០២០ សម្តេចតេជោ ហ៊ុន សែន បានចេញសារជាសំឡេង ផ្ញើជូនបងប្អូនជនរួមជាតិ អំពី…
ភ្នំពេញ៖ នៅព្រលប់ថ្ងៃទី២០ ខែធ្នូ ឆ្នាំ២០២០ សម្តេចតេជោ ហ៊ុន សែន បានចេញសារជាសំឡេង ផ្ញើជូនបងប្អូនជនរួមជាតិ អំពី…
ភ្នំពេញ៖ នៅព្រលប់ថ្ងៃទី២០ ខែធ្នូ ឆ្នាំ២០២០ សម្តេចតេជោ ហ៊ុន សែន បានចេញសារជាសំឡេង ផ្ញើជូនបងប្អូនជនរួមជាតិ អំពី ស្ថានភាព និងការផ្ទុះឡើងនូវការឆ្លងជំងឺកូវីដ១៩ នៅក្នុងប្រទេសថៃ រួមទាំងណែនាំដល់ប្រជាពលរដ្ឋ និងមន្ត្រីរាជការ ដើម្បីទប់ស្កាត់បង្កាជំងឺកូវីដ១៩។
សម្តេចតេជោ ហ៊ុន សែន លើកឡើងថា នៅប្រទេសថៃ ពេលនេះ ឆ្លង ១ថ្ងៃ ចំនួន ៥៧៦នាក់។ បើគិតជាចំនួនប្រជាជនថៃសរុប គឺចំនួននេះ មិនជាធ្ងន់ធ្ងរទេ ក្នុងប្រទេសថៃ។ តែវាបានបង្កើត ជាបញ្ហាចិត្តសាស្ត្រដល់ពលករខ្មែរ ដែលកំពុងធ្វើការ នៅក្នុងប្រទេសថៃ។
សម្តេចតេជោ ហ៊ុន សែន បានអំពាវនាវដល់បងប្អូនកម្មករកម្មការិនី ដែលកំពុងធ្វើការក្នុងប្រទេសថៃ សុំទុកចិត្តលើរាជរដ្ឋាភិបាលថៃ។ ថៃ ដែលមានបទពិសោធន៍ទប់ទល់នឹងជំងឺកូវីដ១៩ កន្លងមក។ ក្នុងប្រទេសថៃ មកដល់ថ្ងៃទី២០ ខែធ្នូនេះ ទើបតែមានអ្នកឆ្លង ចំនួន ៤៩០៧នាក់ និងស្លាប់ ៦០នាក់ ដែលអាចចាត់ទុកថា ជាប្រទេស ដែលគ្រប់គ្រងកូវីដបានល្អ។
សម្តេចតេជោ ហ៊ុន សែន បានប្រកាសអំពាវនាវ សូមឲ្យបងប្អូនពលករខ្មែរ ជឿលើសមត្ថកិច្ចរបស់ថៃ ហើយមិនគួររត់ចាកចេញពីប្រទេសថៃ ក្នុងពេលថៃ មានការលំបាក។ ដូចសម្តេច ដែលធ្លាប់ប្រកាសថា ស្រឡាញ់គ្នាក្នុងគ្រាក្រ ស្គាល់មិត្តល្អ ក្នុងគ្រាលំបាក។
ដូច្នេះសម្តេចតេជោ ហ៊ុន សែន លើកឡើងថា យើងគួរតែស្ថិតនៅទីនោះ ម្ខាងដើម្បីរក្សា ការពារខ្លួន នៅនឹងកន្លែង។ មួយផ្នែកទៀត ជៀសវាងការនាំចូលមកក្នុងប្រទេសកម្ពុជាយើង ប្រសិនបើមានកូវីដ។ នេះជាការអំពាវនាវទៅកាន់បងប្អូនពលករ ដែលកំពុងរស់នៅក្នុងប្រទេសថៃ។
សម្តេចតេជោ ក៏បានយកឱកាសនេះ អំពាវនាវទៅកាន់ក្រុមគ្រួសារ ឪពុកម្តាយ ដែលមានកូនចៅ ប្តីប្រពន្ធបងប្អូន ដែលកំពុងធ្វើការនៅក្នុងប្រទេសថៃ លើកទឹកចិត្តឲ្យបន្តធ្វើការនៅប្រទេសថៃទៀត ដើម្បីរក្សាឲ្យបានការងារធ្វើរបស់យើងនៅទីនោះ។
សម្តេចតេជោ សង្ឃឹមថា បងប្អូនពលរដ្ឋខ្មែរយើង នៅបន្តធ្វើការងារនៅទីនោះ ជាមួយនឹងប្រជាជនថៃ។ បើសិនជាយើងចល័ត ពីកន្លែងមួយ ទៅកន្លែងមួយ ពិតជាមិនល្អទេ។ ក្នុងរយៈពេលនេះ បងប្អូនប្រជាពលរដ្ឋខ្មែរ ក៏សូមពន្យារការចូលទៅកាន់ប្រទេសថៃសិន។ បើចូល ដោយខុសច្បាប់ ក៏កាន់តែលំបាក ដោយត្រូវថៃ ចាប់បញ្ជូនមកវិញ ហើយបើទោះបីជាចូលត្រូវច្បាប់ ក៏ត្រូវធ្វើចត្តាឡីស័ក ១៤ថ្ងៃ ដែរ៕
ចែករំលែកព័តមាននេះ