អាយ៉ៃឆ្លើយឆ្លងរវាងអ្នកប្រើប្រាស់ថាមពលអគ្គិសនីក្នុងក្រុងសៀមរាប ជាមួយអង្គភាពអគ្គិសនីខេត្តសៀមរាប បានបង្ហាញចេញយ៉ាងច្របូកច្របល់ ដូចដំរីដើរជាន់មីនតោនអ៊ីចឹង វាឮសូរលាន់រំពង ក្តុងក្តាំង យ៉ាងស្រគៀត្រចៀក ។ ឥឡូវនេះ អ្នកប្រើប្រាស់ថាមពលអគ្គិសនីក្នុងក្រុងសៀមរាប មិនត្រឹមតែរអ៊ូទេ គឺស្រែកតែម្តងថា អង្គភាពអគ្គិសនីខេត្តសៀមរាប ផ្លុំផេះមិនហុយទេ ១ថ្ងៃៗដាច់ភ្លើងរាប់ភ្លេច ។
ចំណែកឯអង្គភាពអគ្គិសនីខេត្តសៀមរាបវិញ ស្រែកតបវិញថា មានដឹងទេ? ដាច់ភ្លើង១នាទី គេខាតចំណូលប៉ុន្មាន? តើអ្នកណាគេចង់ឲ្យដាច់នោះ? សូមបញ្ជាក់ថា កំណាព្យជីវិតដែលចែងថា ដាច់ភ្លើង១នាទីអគ្គិសនីខាតលុយមិនតិចម៉ឺនទេ វាគឺជាបទចម្រៀង ប្រចាំត្រកូលរបស់អគ្គិសនីខេត្តសៀមរាបទៅហើយ ។
ជាមួយនឹងបទអាយ៉ៃឆ្លើយឆ្លងនេះ ត្រូវបានផ្ទុះឡើង គេសង្កេតឃើញក្រុមជាងអ្នកជួលជុលគ្រឿងសម្ភារបរិក្ខារអគ្គិសនីរកស៊ីបានកាក់កបមែនទែន ។ អតិថិជនអ្នកប្រើប្រាស់ថាមពលអគ្គិសនី នៅក្នុងក្រុងសៀមរាបភាគច្រើន បានក្លាយខ្លួនជាជនរងគ្រោះ ដោយសារតែទូរទស្សន៍ ម៉ាស៊ីនត្រជាក់ ទូរទឹកកក ត្រូវបានហុយផ្សែងជាបន្តបន្ទាប់ នេះមិនរាប់បញ្ចូលអំពីអំពូលភ្លើងផងទេ ។
ក្រុមហ៊ុនផលិតអំពូលភ្លើងណាដែលអួតថា ផលិតផលរបស់ខ្លួនធានាគុណភាព ប្រើប្រាស់បានយូរនោះ ទាន់មានឱកាសល្អ សូមមេត្តាអញ្ជើញមកវិនិយោគលក់អំពូលភ្លើងនៅក្រុងសៀមរាបផងចុះ ធានាថា រកស៊ីកាក់កបដូចក្រុមជាងជួសជុលសម្ភារបរិក្ខាអគ្គិសនីអ៊ីចឹង ។
បងប្អូនអើយ ! បើបានទទួលព័ត៌មាននេះហើយ សូមមេត្តាអនុមោទនា ទទួលយកផង អ្នកផ្តល់ព័ត៌មានឥតមានគិតទឹកតែទេ គឺសុំយកតែបុណ្យប៉ុណ្ណោះ ។ ហើយសូមឲ្យអានិសង្ឃកើតចេញពីព័ត៌មាននេះ បានក្លាយជាផលវិជ្ជមាន ជួយទ្រទ្រង់ថែរក្សា អភិវឌ្ឍន៍វិស័យអគ្គិសនីខេត្តសៀមរាប ឆ្ពោះទៅរកការរីកចម្រើន ចូលហោប៉ាវ ឱ្យបានច្រើនកុំបីឃ្លៀងឃ្លាតឡើយ….!!!
ចែករំលែកព័តមាននេះ