ខេត្តកំពង់់ស្ពឺ ៖ រាជរដ្ឋាភិបាល បានសម្ពោធដាក់ឲ្យប្រើប្រាស់សមិទ្ធផលនានា នៅរមណីយដ្ឋានវីគិរីរម្យ ផាញរីសត និងបើកការដ្ឋានសាងសង់ជាផ្លូវការក្នុងតំបន់អភិវឌ្ឍទេសចរណ៍ធម្មជាតិគិរីរម្យក្រោមការអភិវឌ្ឍរបស់ក្រុមហ៊ុន A 2 A Town Cambodia LTd ។
លោក សាយ សំអាល់ រដ្ឋមន្ត្រីក្រសួង បរិស្ថាន បានមានប្រសាសន៍ក្នុងពិធីបើកសម្ពោធដាក់ឲ្យប្រើប្រាស់សមិទ្ធផលនានា និងបើកការដ្ឋានសាងសង់ជាផ្លូវការក្នុងតំបន់រមណីយដ្ឋានគិរីរម្យ កាលពីថ្ងៃទី២៧ មិថុនាថា នៅខេត្តកំពង់ស្ពឺមិនអាចពឹងផ្អែកតែទៅលើការដាំស្រូវសម្រាប់ប្រកួតប្រជែងជាមួយតំបន់បានទេ ប៉ុន្តែខេត្តកំពង់ស្ពឺជាកន្លែងដែលសម្បូរតំបន់ទេសចរណ៍ ដូច្នេះយើងត្រូវធ្វើវាឲ្យក្លាយទៅជាតំបន់ទេសចរណ៍ដ៏មានសក្តានុពលដែលជាឱកាសមាសប្រាក់សម្រាប់ប្រជាជនក្នុងខេត្តនេះ ។
លោករដ្ឋមន្ត្រីបញ្ជាក់ថា «ឧទាហរណ៍គិរីរម្យនេះស្រាប់ គឺជាកន្លែងរកលុយរបស់ខេត្តកំពង់ស្ពឺ ហើយគិរីរម្យជាកន្លែងទេសចរណ៍បែបថ្មីមួយដែលកាលពីមុនភ្ញៀវទេសចរបរទេសចូលចិត្តទៅទស្សនាអង្គរវត្ត មើលប្រាង្គប្រាសាទរបស់យើង ។ ឯនៅគិរីរម្យនេះជនបរទេសមិនច្រើនទេដែលមកទស្សនាគឺខ្មែរយើងច្រើនជាងបរទេស ហើយអ្នកដែលមកនោះភាគច្រើន មកជាលក្ខណៈគ្រួសារ គឺចំណុចនេះហើយដែលយើងត្រូវការនោះ និងជាឱកាសរកប្រាក់សម្រាប់អ្នកខេត្តកំពង់ស្ពឺ»។
ជាមួយគ្នានេះដែរ លោក សាយ សំអាល់ ក៏បានថ្លែងអំណរគុណម្ចាស់ក្រុមហ៊ុន A 2 A Town Cambodia LTd ដែលបានអភិវឌ្ឍនៅលើភ្នំគិរីរម្យនេះឲ្យកាន់តែមានភាពទាក់ទាញភ្ញៀវទេសចរជាតិ និងអន្តរជាតិ ។ លោកទទួលយកសំណូមពររបស់ក្រុមហ៊ុន ដែលបានស្នើសុំក្រសួងអនុញ្ញាតឲ្យក្រុមហ៊ុនអាចដឹកភ្ញៀវតាមឧទ្ធម្ភាគចក្រត្រង់ពីភ្នំពេញ ដោយក្រសួងនឹងឲ្យគេធ្វើ និងពង្រីកចំណតយន្តហោះនៅលើខ្នងភ្នំដែលមានស្រាប់ពីជំនាន់ព្រះបរមរតនកោដ្ឋ ឲ្យកាន់តែធំបន្ថែមទៀត ងាយស្រួលអាចចុះចតនិងផ្ទុកឧទ្ធម្ភាគចក្របានច្រើនគ្រឿង ។
លោកស្រី កេត រ៉ាឌី នាយិកាក្រុមហ៊ុន TOP Whisky (Cambodia) Co.,Ltd, បានមានប្រសាសន៍ថា កាលពីថ្ងៃទី១៣ ខែធ្នូ ឆ្នាំ២០១១កន្លងទៅ ក្រុមហ៊ុនវិនិយោគធំមួយមកពីប្រទេសជប៉ុន ដែលមានលោកអុីស៊ូកា តាកាស៊ី ជាប្រធានក្រុមប្រឹក្សាភិបាលក្រុមហ៊ុន A 2 A Town Cambodia LTd បានបោះទុនវិនិយោគសរុបចំនួនប្រហែល៥០០លានដុល្លារអាមេរិក ជាមួយដៃគូកម្ពុជា អភិវឌ្ឍតំបន់ទេសចរណ៍ធម្មជាតិនេះ ដើម្បីចូលរួមជំរុញកំណើនសេដ្ឋកិច្ចជាតិតាមរយៈការអភិវឌ្ឍរមណីយដ្ឋានទេសចរណ៍ធម្មជាតិ ដ៏ស្រស់ល្អត្រកាលនេះ ។
លោកស្រីបន្តថា បច្ចប្បន្ន ក្រុមហ៊ុនបាននិងកំពុងប្រែក្លាយតំបន់នេះឲ្យកាន់តែសំបូរបែប ដើម្បីទាក់ទាញភ្ញៀវទេសចរជាតិ-អន្តរជាតិ និងចូលរួមចំណែកលើកតម្កើងវិស័យទេសចរណ៍នៅកម្ពុជាឲ្យមានសន្ទុះកាន់តែខ្លាំងក្លាថែមទៀត ។
ចំណែកលោក អុីស៊ូកា តាកាស៊ី ប្រធានក្រុមប្រឹក្សាភិបាលក្រុមហ៊ុន A 2 A Town Cambodia LTd មានប្រសាសន៍ថា គិរីរម្យជាកន្លែងដ៏សំខាន់សម្រាប់ប្រទេសកម្ពុជា នេះជាមូលហេតុដែលធ្វើឲ្យយើងដាក់ឈ្មោះនៅតំបន់ទេសចរណ៍មួយនេះថា «វីគិរីរម្យ» ដែលមានន័យថា គិរីរម្យសម្រាប់សេចក្តីសុខសាន្តរបស់មនុស្សគ្រប់ថ្នាក់ ។
លោកបន្តថា ដើមស្រល់នៅគិរីរម្យវាស្រដៀងដើមកាហ្កាវ៉ា នៅប្រទេសជប៉ុន ដូច្នេះហើយយើងទាំងអស់គ្នាត្រូវថែរក្សាបរិស្ថាននៅក្នុងវីគិរីរម្យនេះឲ្យបានល្អ នេះជាគោលការណ៍មូលដ្ឋានរបស់យើង ។
សូមបញ្ជាក់ថា រមណីយដ្ឋានគិរីរម្យ ត្រូវបានរាជរដ្ឋាភិបាលកម្ពុជាអនុញ្ញាតឲ្យក្រុមហ៊ុន A 2 A Town Cambodia LTd អភិវឌ្ឍទៅជាតំបន់ទេសចរណ៍ធម្មជាតិ ដែលដីសម្បទានសេដ្ឋកិច្ចនេះ មានចំនួន ២.០០០ហិកតា ។ ដើម្បីអភិវឌ្ឍន៍តំបន់នេះឲ្យក្លាយទៅជាតំបន់ទេសចរណ៍ធម្មជាតិពេញលេញនោះ ក្រុមហ៊ុនបានរៀបចំអភិវឌ្ឍន៍ចំនួន២ដំណាក់កាល ។
ដំណាក់កាលទី១-ចាប់ផ្តើមរហូតដល់បច្ចុប្បន្ន ក្រុមហ៊ុនបានសាងសង់បឹងកាឡូចំនួន៤, ភោជនីយដ្ឋាន១, អគារលោកគ្រូ អ្នកគ្រូស្នាក់នៅ១, ផ្ទះវីឡាគំរូ១, អគារលក់គ្រឿងវត្ថុអនុស្សារីយ៍១, អគារបោកគក់ខោអាវ១, ផ្ទះតង់ទំនើប៤, ខ្ទមខ្មែរ១២, ភូមិកម្មករមួយកន្លែងមាន១២ផ្ទះ, ផ្ទះគំរូតូច៦, ផ្ទះទទួល ភ្ញៀវ១, ទីតាំងបោះជំរំចំនួន១៤០កន្លែង, ស្ថានីយចម្រោះនិងផ្គត់ផ្គង់ទឹកស្អាត១កន្លែង, ទីតាំងកសិកម្ម១កន្លែង, ទីលានកីឡា៤កន្លែង, អង់តែនវិទ្យុទាក់ទង១ និងផ្លូវក្រាលក្រួសក្រហមប្រវែង៩គីឡូម៉ែត្រ ។
ដំណាក់កាលទី២-ក្នុងរយៈពេល២០ឆ្នាំ ក្រុមហ៊ុននឹងមានការសាងសង់សំណង់ចំនួន ២.២០៨អគារថែមទៀត ៕
ចែករំលែកព័តមាននេះ