ខេត្តក្រចេះ ៖ នៅទីបញ្ជាការវរសេនាតូចការពារព្រំដែនគោកលេខ៦១៩ កាលពីព្រឹកថ្ងៃទី៣ មីនា មានរៀបចំពិធីបើកវគ្គបណ្តុះបណ្តាលហ្វឹកហ្វឺននៅនឹងកន្លែងរយៈពេលខ្លីដល់នាយ នាយរង និងពលនគរបាល ក្រោមការអញ្ជើញចូលរួមជាអធិបតីភាពពីសំណាក់លោកវរសេនីយ៍ឯកយិន ចំណាន ស្នងការរងទទួលបន្ទុកព្រំដែននៃស្នងការដ្ឋាននគរបាលខេត្ត ។
លោកវរសេនីយ៍ទោឃ្លាំង ណារឹទ្ធ នាយការិយាល័យបណ្តុះបណ្តាលនៃស្នងការដ្ឋាននគរបាលខេត្ត បានឡើងអានរបាយការណ៍ឱ្យដឹងថា ការបើកវគ្គបណ្តុះបណ្តាលហ្វឹកហ្វឺននាពេលនេះគឺមានរយៈពេល១៥ថ្ងៃ ដែលមានមុខជំនាញសរុប៧វិញ្ញាសាជំនាញ ក្នុងនោះរួមមាន ជំនាញផ្នែកសេនាធិការ បទវិន័យរបស់កងកម្លាំងនគរបាលជាតិ និងលំហាត់របៀបផែនការការពារព្រំដែន ដើរល្បាតព្រំដែន ការងាររដ្ឋបាល និងសេនាធិការជំនាញក្រមព្រហ្មទណ្ឌ ជំនាញអន្តោប្រវេសន៍ជំនាញការងារប្រឆាំងការជួញដូរមនុស្ស និងការពារអនីតិជន ព្រមទាំងជំនាញការងារប្រឆាំងគ្រឿងញៀន ។
មានប្រសាសន៍ទៅកាន់សិក្ខាកាមនាព្រឹកថ្ងៃបើកវគ្គបណ្តុះបណ្តាលនោះ លោកវរសេនីយ៍ឯកយិន ចំណាន ស្នងការរងទទួលបន្ទុកព្រំដែននៃស្នងការដ្ឋាននគរបាលខេត្តបានថ្លែងថា តបទៅតាមគោលនយោបាយរបស់អគ្គស្នងការនគរបាលជាតិ និងក្រោមការយកចិត្តទុកដាក់ពីសំណាក់លោកស្នងការនគរបាលខេត្ត មន្ត្រីនគរបាលជាសិក្ខាកាម ទទួលបាននូវវិជ្ជាជីវៈ លើជំនាញពិតប្រាកដប្រកបដោយបច្ចេកវិទ្យាទំនើប និងមានសមត្ថភាពគ្រប់គ្រាន់ ដើម្បីបំពេញភារកិច្ចក្នុងស្មារតីទទួលខុសត្រូវខ្ពស់ ការគោរពប្រតិបត្តិច្បាប់ រក្សាសន្តិសុខ សណ្តាប់ធ្នាប់សង្គម រក្សាការពារអាយុជីវិត ទ្រព្យសម្បត្តិ និងបម្រើសេវាជូនប្រជាពលរដ្ឋដោយមានភាពស្មោះត្រង់ក្នុងទីតាំងឈរជើង ពិសេសទៅលើកិច្ចប្រតិបត្តិការការពារសន្តិសុខជាតិ និងសន្តិសុខនយោបាយ ជាមួយនឹងការអនុវត្តតាមទិសដៅផែនការជាយុទ្ធសាស្ត្ររបស់លោកឧត្តមសេនីយ៍ស្នងការនគរបាលខេត្តសម្រាប់ឆ្នាំ២០១១ ។
លោកវរសេនីយ៍ឯកបានបន្តថា ការបើកវគ្គបណ្តុះបណ្តាលហ្វឹកហ្វឺននៅនឹងកន្លែងរយៈពេលខ្លីនេះ ដើម្បីឱ្យនាយ នាយរង និងពលនគរបាលការពារព្រំដែនទាំងអស់យល់ដឹងកាន់តែច្បាស់អំពីភារកិច្ច និងតួនាទីរបស់នគរបាលជាតិ ដូច្នេះសិក្ខាកាមត្រូវយកចិត្តទុកដាក់រាល់មុខវិជ្ជាវិញ្ញាសា គោរពគ្រូបង្គោលឱ្យបានម៉ឺងម៉ាត់កុំឱ្យមានតែបរិមាណគឺឱ្យមានគុណភាពត្រឹមត្រូវច្បាស់លាស់ ៕
ចែករំលែកព័តមាននេះ