ប្រទេសចិន ៖ ប្រទេសចិនកាលពីថ្ងៃទី១៧ ធ្នូ បាននាំដោយគ្មានបញ្ហានូវបណ្ដាគំរូដីភពព្រះចន្ទ ដែលជាបេសកកម្មប្រភេទនេះលើកដំបូងពុំធ្លាប់មានចាប់តាំងពីជាង៤០ឆ្នាំមកហើយ ។ យានរូ៉បូអវកាសចិនឈ្មោះ CHANG’E 5…
ប្រទេសចិន ៖ ប្រទេសចិនកាលពីថ្ងៃទី១៧ ធ្នូ បាននាំដោយគ្មានបញ្ហានូវបណ្ដាគំរូដីភពព្រះចន្ទ ដែលជាបេសកកម្មប្រភេទនេះលើកដំបូងពុំធ្លាប់មានចាប់តាំងពីជាង៤០ឆ្នាំមកហើយ ។
យានរូ៉បូអវកាសចិនឈ្មោះ CHANG’E 5 ដែលហោះវិលត្រឡប់មកពីភពព្រះចន្ទវិញ បានចុះដោយជោគជ័យនាពេលយប់ក្នុងតំបន់ម៉ុងហ្គោលីក្នុងភាគខាងជើងចិន ។ នេះជាការអះអាង
ក្នុងសេចក្ដីប្រកាសមួយរបស់ទីភ្នាក់ងារអវកាសចិន CNSA ។ បណ្ដាគំរូដីភពព្រះចន្ទក្រោយការ
វិភាគនឹងអាចឲ្យគេយល់កាន់់តែប្រសើរនូវប្រវត្តិភពព្រះចន្ទ ។ បេសកកម្មនោះក៏អាចជាពន្លឺសម្រាប់ការបង្កើតបច្ចេកវិទ្យាចាំបាច់នានា ក្នុងការបញ្ជូនអវកាសយានិកចិនទៅកាន់ភពព្រះចន្ទជាទិសដៅរបស់ក្រុងប៉េកាំង រហូតដល់ឆ្នាំ២០៣០ ។
ទូរទស្សន៍រដ្ឋចិន CCTV បានចេញផ្សាយបណ្ដារូបភាពរបស់យាននោះដែលចុះពីលើមេឃនាពេលយប់ជាមួយជំនួយរបស់ឆ័ត្រយោងមួយមុនពេលប៉ះដីដែលក្រាលដោយព្រិល ។ បន្ទាប់មកបណ្ដារថយន្តកាំមីញ៉ុង និងបណ្ដាអ្នកវិទ្យាសាស្ត្របានមកដល់យាននោះ ហើយដោតទង់ជាតិចិនក្បែរយាន ។
ជាមួយប្រតិបត្តិការនេះ ប្រទេសចិនក្លាយជាប្រទេសទី៣លើពិភពលោកដែលនាំគំរូដីភពព្រះចន្ទមកកាន់ផែនដីបន្ទាប់ពីសហរដ្ឋអាមេរិក និងអតីតសហភាពសូវៀត កាលពីទសវត្សឆ្នាំ១៩៦០
និង១៩៧០ ។
ប្រធានាធិបតីចិនលោកស៊ីជិនពីងបានបញ្ជូនសារអបអរសាទរដ៏កក់ក្ដៅបំផុត ចំពោះបណ្ដាក្រុមដែលទទួលបន្ទុកបំពេញបេសកកម្មនោះ ។ លោកថ្លែងថាការស្រាវជ្រាវដ៏ត្រចះត្រចង់របស់លោកអ្នកនឹងស្ថិតជាប់ជានិច្ចក្នុងដួងចិត្តរបស់មាតុភូមិនិងប្រជាជនយើង ។
នេះជាការប៉ុនប៉ងលើកដំបូងនាំយកគំរូដីភពព្រះចន្ទចាប់តាំងពីបេសកកម្មរបស់សូវៀត LUNA 24 ដែលបំពេញដោយជោគជ័យកាលពីឆ្នាំ១៩៧៦មក ។ សហរដ្ឋអាមេរិកក៏បាននាំយកគំរូដីភពព្រះចន្ទបានមកដែរ ក្នុងបេសកកម្មមានមនុស្សទៅរបស់យាន APOLLO 17 កាលពីឆ្នាំ១៩៧២ តែគំរូដីភពព្រះចន្ទនោះត្រូវបាននាំមកដោយអវកាសយានិកដែលមិនចាំបាច់មានការចាត់ចែងពីចម្ងាយទៅ ។
រ៉ូបូអវកាសចិននោះជាបច្ចេកវិទ្យា ដែលអាចឲ្យចិនមានទំនុកចិត្តកាន់តែខ្លាំងលើបច្ចេកវិទ្យារបស់ខ្លួន ។ បេសកកម្មបែបនោះពិតជាលំបាកស្មុគ្រស្មាញ និងប្រាកដណាស់លំបាកខ្លាំងទៀតផងដែលបានធ្វើនាពេលនេះក៏ទោះសម្រាប់អាមេរិករុស្ស៊ី និងមហាអំណាចដទៃៗទៀត ។
យានរ៉ូបូចិននោះបានចុះលើភពព្រះចន្ទកាលពីថ្ងៃទី១ ធ្នូ ក្នុងតំបន់ភ្នំដែលនៅមិនទាន់មានការស្រាវជ្រាវ ។ បេសកកម្មរបស់យាននោះដែលបង្ហោះចេញពីផែនដីកាលពីថ្ងៃទី២៤ វិច្ឆិកា គឺប្រមូលដីភពព្រះចន្ទប្រមាណជា២គីឡូក្រាម ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ