រាជធានីភ្នំពេញ ៖ បុរសម្នាក់បានត្រូវកំលាំងប៉ូលិសប៉ុស្តិ៍ចោមចៅចាប់ខ្លួនតាមបណ្តឹងរបស់បុរសម្នាក់ទៀតដែលចោទប្រកាន់ថា បុរសនោះបានដកកាំភ្លើងភ្ជង់គំរាមបាញ់សំលាប់ក្នុងទំនាស់ពាក្យសំដីពេលលេងបៀជាមួយគ្នា។ ហេតុការណ៍នេះបានកើតឡើងកាលពីវេលាម៉ោង១០ និង៣៥នាទីព្រឹក ថ្ងៃទី៤ ខែកុម្ភៈ ឆ្នាំ២០១១ នៅផ្ទះជួលក្នុងភូមិត្រពាំងថ្លឹង សង្កាត់ចោមចៅ ខណ្ឌដង្កោ។ បុរសដែលត្រូវប៉ូលិសចាប់ខ្លួននោះឈ្មោះព្រាប សម្បត្តិ អាយុ៤៤ឆ្នាំ ជាយោធា ស្នាក់នៅផ្ទះជួលខាងលើ ប្រើប្រាស់អាវុធខ្លីម៉ាកប៉េអាកុលមានគ្រាប់ចំនួន៧គ្រាប់ ហើយកាំភ្លើងនេះត្រូវប៉ូលិសដកហូត។ ចំណែកបុរសដែលចោទប្រកាន់ថា ជននោះដកកាំភ្លើងខ្លីភ្ជង់គំរាមបាញ់សំលាប់នោះឈ្មោះសុខ រ៉ា អាយុ៣២ឆ្នាំ ជាបុគ្គលិកក្រុមហ៊ុនកូមិនខ្មែរ ស្នាក់នៅផ្ទះជួលខាងលើនោះដែរ។
តាមប្រភពព័ត៌មានបានឱ្យដឹងថា នៅមុនពេលកើតហេតុខាងលើ បុរសទាំងពីរនោះរួមជាមួយមិត្តិភក្តិ២នាក់ទៀត នាំគ្នាលេងបៀកំសាន្តថ្ងៃបុណ្យចូលឆ្នាំចិន។ ពេលនោះបុរសដែលជាអ្នកកាន់កាំភ្លើងលេងចាញ់ តែមិនព្រមឱ្យលុយទៅបុរសដែលលេងឈ្នះ ក៏ទាស់ពាក្យសំដីគ្នា១ប្រាវ ដោយបុរសដែលលេងឈ្នះស្តីឱ្យបុរសនោះថា ថ្ងៃក្រោយបើអត់លុយកុំមកលេងធ្វើឱ្យបុរសដែលមានកាំភ្លើងខឹងច្រឡោត ក៏ដកកាំភ្លើងខ្លីម៉ាកប៉េអាកុលពីចង្កេះភ្ជង់ និងគំរាមបាញ់សំលាប់ ។ ប៉ុន្តែខណៈនោះស្ត្រីឈ្មោះងួន ផល្លា អាយុ៣០ឆ្នាំ ជាប្រពន្ធបុរសដែលលេងឈ្នះរត់ទៅឈរចំកណ្តាល និងកៀសកាំភ្លើងចេញ ព្រោះខ្លាចបុរសដែលមានកាំភ្លើងបាញ់សំលាប់ប្តីទើបជននេះលែងភ្ជង់ និងបំរុងរត់គេចខ្លួន តែត្រូវប្រពន្ធបុរសដែលលេងឈ្នះប្តឹងប៉ូលិសឱ្យឃាត់ខ្លួនតែម្តង។
ប្រភពដដែលបានបន្តថា កាលពីល្ងាចថ្ងៃទី៣ ខែកុម្ភៈ ពួកគេបាននាំគ្នាលេងបៀជុំគ្នាម្តងហើយ ដោយបុរសដែលមានកាំភ្លើងនោះជាអ្នកឈ្នះ ហើយក៏ឈប់លេងទៅ លុះនៅព្រឹកថ្ងៃកើតហេតុបុរសនោះបានមកបបួលគេលេងដល់ផ្ទះ តែពេលលេងចាញ់អត់ព្រមឱ្យលុយគេទើបក្លាយជាទំនាស់បែបនេះ។ ក្រោយពេលកើតហេតុ បុរសនោះត្រូវប៉ូលិសប៉ុស្តិ៍ចោមចៅឃាត់ខ្លួននាំទៅសាកសួរហើយបានបដិសេធថា ខ្លួនអត់បានភ្ជង់ទេ គឺគេចេះតែចោទប្រកាន់ខ្លួនផ្តេសផ្តាសប៉ុណ្ណោះ។ ប៉ូលិសប៉ុស្តិ៍ចោមចៅបានឱ្យដឹងថា ពេលនេះភាគីទាំងពីរអត់សំរុះសំរួលគ្នាទេ ដូច្នេះប៉ូលិសគ្មានជំរើសអ្វីក្រៅពីទទួលពាក្យបណ្តឹង និងកសាងសំណុំរឿងបញ្ជូនទៅផ្នែកព្រហ្មទណ្ឌប៉ូលិសខណ្ឌដង្កោ ហើយបើនៅតែគ្មានការសំរបសំរួលទៀតនឹងបញ្ជូនសំណុំរឿងទៅសាលាដំបូងតែម្តង ៕
ចែករំលែកព័តមាននេះ