ខេត្តកំពង់ឆ្នាំង ៖ លោក ម៉ម ឈឿម ប្រធានមន្ទីរព័ត៌មាន និងជាអ្នកនាំពាក្យសាលាខេត្ត នាព្រឹកថ្ងៃទី២៤ មិថុនា បានដឹកនាំក្រុមការងារចម្រុះថ្នាក់ខេត្ត អ្នកសារព័ត៌មាន និងអ្នកថតទូរទស្សន៍មួយក្រុម ចុះត្រួតពិនិត្យការឈូសឆាយព្រៃលិចទឹកក្នុងឃុំផ្សារ
ខេត្តកំពង់ឆ្នាំង ៖ លោក ម៉ម ឈឿម ប្រធានមន្ទីរព័ត៌មាន និងជាអ្នកនាំពាក្យសាលាខេត្ត នាព្រឹកថ្ងៃទី២៤ មិថុនា បានដឹកនាំក្រុមការងារចម្រុះថ្នាក់ខេត្ត អ្នកសារព័ត៌មាន និងអ្នកថតទូរទស្សន៍មួយក្រុម ចុះត្រួតពិនិត្យការឈូសឆាយព្រៃលិចទឹកក្នុងឃុំផ្សារ ស្រុកបរិបូណ៌ តាមបញ្ជារបស់លោកអភិបាលខេត្ត បន្ទាប់ពីសារព័ត៌មាននិងទូរទស្សន៍
បានផ្សាយអំពីការឈូសឆាយព្រៃលិចទឹកយកធ្វើជាកម្មសិទ្ធិក្រោមលេសឈូសពង្រាបដីស្រែប្រាំងកាលពីពេលថ្មីៗនេះ ។
កិច្ចប្រតិបត្តិការតាមបញ្ជារបស់លោកអភិបាលខេត្តនេះដែរត្រូវបានគេមើលឃើញថា បន្ទាប់ពីមានជនខិលខូចនាំគ្នាបំផុសប្រជាពលរដ្ឋឱ្យផ្តិតមេដៃប្តឹងបកមកអ្នកកាសែតវិញថា បានរារាំងប្រឆាំងនឹងបញ្ជាលោកអភិបាលខេត្តដែលចុះហត្ថលេខាអនុញ្ញាតឱ្យប្រជាពលរដ្ឋពង្រាបដីស្រែប្រាំងនោះទៅវិញ ។ ទោះជាយ៉ាងណាក្រោយពីបានពិនិត្យនៅកន្លែងដែលរងការឈូសឆាយបំផ្លាញដីព្រៃលិចទឹកហើយ អ្នកនាំពាក្យសាលាខេត្តរូបនេះក៏ដូចជាមន្ត្រីជលផលបានទទួលស្គាល់ថា ពិតជាមានការឈូសឆាយដីព្រៃលិចទឹកប្រាដកមែន ។
បន្ទាប់ពីធ្វើដំណើរដោយគោយន្តកាត់វាលស្រែ ចូលព្រៃរួចមក ក្រុមការងារបានបន្តដំណើរដោយថ្មើរជើងទៅដល់ទីកន្លែងដែលរងការឈូសបំផ្លាញព្រៃលិចទឹកនោះ ហើយក៏បានវែកញែករកត្រូវរៀងៗខ្លួន ដោយខាងអាជ្ញាធរមូលដ្ឋានមានមេភូមិក្បាលថ្នល់ មេភូមិកំព្រង មេឃុំផ្សារ ស្រុកបរិបូណ៌ អះអាងថា គឺជាការឈូសពង្រាបដីស្រែចាស់ដែលប្រជាពលរដ្ឋបោះបង់ចោលខានធ្វើមួយឆ្នាំកន្លងទៅ តែក្រុមអ្នកកាសែតបានលើកហេតុផលថា មិនមែនដីស្រែប្រាំងទេជាដីព្រៃលិចទឹក មានគល់ឈើប៉ុនៗភ្លៅមនុស្សនិងធំជាងនេះ ដែលមុនដំបូងគឺកាប់រានដុតឱ្យឆេះ បន្ទាប់មកឈូសពង្រាប ហើយគល់ឈើទាំងនោះនៅពេញជាភស្តុតាងស្រាប់ ។ លើសពីនេះទៀត ក្រុមអ្នកកាសែត នៅមានហេតុផលថា បើស្រែប្រាំងពិតមែន ចាំបាច់អីជួលប៊ុលដូហ្សែ៊រឈូស១ម៉ោងថ្លៃដល់ទៅ២៥ម៉ឺនរៀល គឺភ្ជួរតែគោយន្តគ្រប់គ្រាន់ណាស់ទៅហើយ នេះជួលប៊ុលដូហ្សែ៊រឈូសគល់ឈើព្រៃលិចទឹកទើបត្រូវជាង ។
ក្រោយពីបានចុះត្រួតពិនិត្យពេញមួយព្រឹកមក លោក ម៉ម ឈឿម ប្រធានក្រុមការងារចម្រុះថ្នាក់ខេត្ត បានបូកសរុបវាយតម្លៃថា លោកទទួលស្គាស់ថា ពិតជាមានបទល្មើសឈូសឆាយដីព្រៃលិចទឹកនៅក្នុងតំបន់២ក្នុងឃុំផ្សារស្រុកបរិបូណ៌ ប្រាកដមែន ដែលខុសពីការស្នើសុំច្បាប់ និងការអនុញ្ញាតឱ្យពង្រាបតែដីស្រែចាស់ដែលធ្លាប់ធ្វើពីមុនមករបស់លោកអភិបាលខេត្ត។ ករណីនេះ លោកនឹងធ្វើរបាយការណ៍ជូនលោកអភិបាលខេត្ត និងស្នើសុំឱ្យអាជ្ញាធរឃុំ និងខាងរដ្ឋបាលជលផលទប់ស្កាត់បញ្ឈប់ជាបន្ទាន់នូវបទល្មើសខាងលើនេះ តែលោកមិនឃាត់ការឈូសឆាយពង្រាបដីស្រែចាស់ៗរបស់ប្រជាពលរដ្ឋនោះឡើយ ។
លោក តាត សីហាក់ មន្ត្រីខណ្ឌរដ្ឋបាលជលផលកំពង់ឆ្នាំងលើកឡើងថា ដីតំបន់២ ប្រជាពលរដ្ឋមានសិទ្ធិអាស្រ័យផលធ្វើស្រែចម្ការ ប៉ុន្តែការឈូសឆាយទន្ទ្រានយកដីព្រៃលិចទឹកគឺជាអំពើខុសច្បាប់ដែលត្រូវទប់ស្កាត់និងបង្ក្រាប គឺមិនអនុញ្ញាតឱ្យកើតមានទៀតឡើយ ។
លោក ប៊ិន សុផាន មេឃុំផ្សារ លោក អែម រ៉ិន មេភូមិក្បាលថ្នល់ និងលោកនួន សុផាន់ មេភូមិកំព្រង ឃុំផ្សារ បានឯកភាពតាមការលើកឡើងរបស់លោកប្រធានក្រុមការងារចម្រុះថ្នាក់ខេត្ត និងមន្ត្រីជំនាញ តែលោកស្នើសុំឱ្យប្រជាពលរដ្ឋ បានឈូសពង្រាបដីស្រែបន្តទៀតតាមច្បាប់ស្នើសុំហើយពួកលោកនឹងទប់ស្កាត់មិនឱ្យមានការឈូសឆាយដីព្រៃលិចទឹកដូចខាងលើទៀតឡើយ ។ ចំណែកក្រុមអ្នកសារព័ត៌មានបានស្នើសុំឱ្យអាជ្ញាធរជួយវែកមុខអ្នកនៅពីក្រោយខ្នងប្តឹងអ្នកកាសែត ចោទថា រារាំងនិងប្រឆាំងបញ្ជាលោកអភិបាលខេត្តផងដែរ ៕
ចែករំលែកព័តមាននេះ