រាជធានីភ្នំពេញ ៖ ថ្នាក់ដឹកនាំគណបក្សនយោបាយធំៗបានផ្ញើសារតបគ្នាទៅវិញទៅមក ក្នុងគោលបំណងចង់ឲ្យប្រជាពលរដ្ឋ និងប្រទេសជាតិមានការអភិវឌ្ឍដូចៗគ្នា ។ បន្ថែមលើនេះ សម្រាប់ថ្នាក់ដឹកនាំគណបក្សប្រជាជនកម្ពុជា និងគណបក្សសង្គ្រោះជាតិ ក៏បានរំឭកគ្នាទាក់ទងនឹងការបន្តវប្បធម៌សន្ទនាផងដែរ ។
លោក សម រង្ស៊ី ប្រធានគណបក្សសង្គ្រោះជាតិ បានសរសេរលិខិតមួយច្បាប់អបអរជូនពរសម្តេចតេជោ ហ៊ុន សែន ដែលត្រូវបានគណៈកម្មាធិការកណ្តាលគណបក្សប្រជាជនកម្ពុជា បោះឆ្នោតគាំទ្រជូនសម្តេច ធ្វើជាប្រធានគណបក្សប្រជាជនកម្ពុជា ។ លោក សម រង្ស៊ី សរសេរថា «ក្នុងនាមគណបក្សសង្គ្រោះជាតិ និងក្នុងនាមខ្ញុំផ្ទាល់ ខ្ញុំសូមសម្តែងនូវសេចក្តីរីករាយក្រែលែង និងអំណរសាទរដ៏កក់ក្តៅជាទីបំផុតចំពោះ សម្តេច ដែលក្នុងសន្និបាតគណៈកម្មាធិការកណ្តាលលើកទី៣៨ អាណត្តិទី៥ របស់គណបក្សប្រជាជនកម្ពុជា បានបោះឆ្នោតជ្រើសរើសតាំងសម្តេចជាប្រធានគណបក្ស » ។
លោក សម រង្ស៊ី បញ្ជាក់ថា «ខ្ញុំមានជំនឿយ៉ាងមុតមាំថា ក្រោមការដឹកនាំរបស់សម្តេច គណបក្សប្រជាជនកម្ពុជានឹងបន្តរីកចម្រើនរឹងមាំជាលំដាប់ ហើយចំណងទាក់ទង និងកិច្ចសហប្រតិបត្តិការក្នុងក្របខណ្ឌនៃវប្បធម៌សន្ទនាវាងគណបក្សប្រជាជនកម្ពុជា និងគណបក្សសង្គ្រោះជាតិ នឹងចាក់ឫសចាក់គល់កាន់តែជ្រៅ ហើយនឹងបន្តពង្រឹងពង្រីកកាន់តែទូលំទូលាយថែមទៀតក្នុងគោលដៅរួម គឺដើម្បីសន្តិភាព ស្ថិរភាព សេរីភាព យុត្តិធម៌ និងការបង្រួមបង្រួមជាតិ សម្រាប់ជាប្រយោជន៍ប្រទេសជាតិយើង និងប្រយោជន៍ប្រជារាស្ត្រខ្មែរទាំងមូល» ។
សម្រាប់លិខិតរបស់លោក សម រង្ស៊ី ត្រូវបានសម្តេចតេជោ ហ៊ុន សែន សរសេរលិខិតឆ្លើយតបថា «ខ្ញុំសូមថ្លែងអំណរគុណដ៏ជ្រាលជ្រៅចំពោះលិខិតចុះថ្ងៃទី២៣ មិថុនា របស់ឯកឧត្តមដែលបានអបអរសាទនិងជូនពរខ្ញុំ ក្នុងពេលដែលសន្និបាតគណៈកម្មាធិការកណ្តាលលើកទី៣៨ អាណត្តិទី៥ របស់គណបក្សប្រជាជនកម្ពុជា បានបោះឆ្នោតជ្រើសរើសខ្ញុំ ជាប្រធានគណបក្សប្រជាជនកម្ពុជា » ។
សម្តេចគូសបញ្ជាក់ថា «ជាការពិតណាស់ថា កិច្ចព្រមព្រៀងស្តីពីវប្បធម៌សន្ទនារវាងគណបក្សយើងទាំងពីរ បាននាំមកនូវលទ្ធផលដ៏ល្អសម្រាប់ជាតិ និងប្រជាពលរដ្ឋ ។ ខ្ញុំសង្ឃឹមថា គណបក្សយើងទាំងពីរ នឹងនៅតែពង្រឹងកិច្ចសហការគ្នាដោយស្មារតីស្មោះត្រង់ លើការអនុវត្តវប្បធម៌សន្ទនានេះនៅតាមបណ្តាថ្នាក់បន្តទៀត ដើម្បីសុខដុមរមនាសម្រាប់ប្រជាពលរដ្ឋយើងទាំងពេលបច្ចុប្បន្ន និងអនាគត» ។
ជាមួយនឹងការទទួលតំណែងជាប្រធានគណៈ បក្សគណបក្សប្រជាជនកម្ពុជានោះ សម្តេចក្រុមព្រះ នរោត្តម រណឫទ្ធិ ប្រធានគណបក្សហ្វុ៊នស៊ិនប៉ិច ដែលជាគណបក្សមិនមានអាសនៈក្នុងសភានិងតែងតែគាំទ្រថ្នាក់ដឹកនាំរបស់គណបក្សប្រជាជនកម្ពុជានោះ ក៏បានសរសេរលិខិតជូនពរសម្តេចតេជោ ហ៊ុន សែន ផងដែរ ។
ក្នុងលិខិតនោះ សម្តេចក្រុមព្រះលើកឡើងថា «ខ្ញុំមានហឫទ័យសោមនស្ស និងកិត្តិយស សូមតាងនាមថ្នាក់ដឹកនាំ និងសមាជិក-សមាជិកា គណបក្សហ្វុ៊នស៊ិនប៉ិច សម្តែងនូវអំណរសរសើរ និងសេចក្តីអបអរសាទរយ៉ាងក្លៀវក្លាជូនចំពោះសម្តេចតេជោ ដែលត្រូវបានគណៈកម្មាធិការកណ្តាលគណបក្សប្រជាជនកម្ពុជា បោះឆ្នោត ជ្រើសរើសធ្វើជាប្រធានគណបក្សប្រជាជនកម្ពុជា ។ ខ្ញុំមានជំនឿយ៉ាងមុតមាំថា ដោយបញ្ញាញាណដ៏ឈ្លៀសវៃ ភ្លឺស្វាងប្រកបដោយទេពកោសល្យ ប៉ិនប្រសប់ ពោរពេញដោយបទពិសោធន៍ សម្តេចប្រធាននឹងទទួលបានជោគជ័យគាប់ប្រសើរ ក្នុងការដឹកនាំគណបក្សប្រជាជនកម្ពុជាឆ្ពោះទៅកាន់វឌ្ឍនភាព ក៏ដូចជាបម្រើពលរដ្ឋខ្មែរ និងឧត្តមប្រយោជន៍ជាតិខ្មែរ តទៅអនាគត »។
សម្តេចក្រុមព្រះសង្កត់ធ្ងន់ថា « ខ្ញុំមានសុទិដ្ឋិនិយម ព្រមទាំងជឿជាក់យ៉ាងប្រាកដថា ទំនាក់ទំនងជាប្រពៃណីនិងកិច្ចសហប្រតិបត្តិការរវាងគណបក្សប្រជាជនកម្ពុជា និងគណបក្សហ្វុ៊នស៊ិនប៉ិច នឹងត្រូវរឹតបន្តឹងពង្រឹងពង្រីកជាបន្តបន្ទាប់ កាន់តែរឹងមាំ និងប្រសើរថែមទៀត ដើម្បីទិស ដៅរួមគ្នាគោរពការពាររដ្ឋធម្មនុញ្ញ របបរាជានិយមអាស្រ័យរដ្ឋធម្មនុញ្ញ លទ្ធិប្រជាធិបតេយ្យ សេរីពហុបក្ស ថែរក្សាសន្តិភាព ដែលជាសមិទ្ធផលជាប្រវត្តិសាស្ត្រដែលសម្តេចតេជោ និងខ្ញុំ បានចាប់ដៃគ្នានាំមកជូនជាតិមាតុភូមិ » ៕
ចែករំលែកព័តមាននេះ