ខេត្តប៉ៃលិន ៖ ប្រជាពលរដ្ឋជាច្រើនគ្រួសារ ដែលមានផ្ទះរស់នៅតាមផ្លូវលំ១កន្លែង ស្ថិតនៅក្នុងភូមិអូរស្ងួត សង្កាត់បរយ៉ាខា ក្រុងប៉ៃលិន ខំតែសប្បាយរីករាយ ខណៈទទួលដំណឹងថា អាជ្ញាធរមូលដ្ឋាននឹងរៀបចំធ្វើផ្លូវបេតុងឱ្យស្រួលធ្វើដំណើរទាំងអស់គ្នា។ លុះក្រោយបន្តិចមក ស្រាប់តែឃើញ ប្រជាពលរដ្ឋមួយចំនួនដាំបង្គោលរបងនៅលើផ្លូវទៅវិញ ដោយខំប្រឹងតវ៉ាជជែកយកឈ្នះមិនព្រមឱ្យ ធ្វើផ្លូវប៉ះក្បាលដីរបស់ខ្លួន។ ហេតុការណ៍ដែលប្រជាពលរដ្ឋយកបង្គោលរបងថ្ម ទៅបោះនៅលើចិញ្ចើមផ្លូវ មិនអនុញ្ញាតឱ្យអាជ្ញាធរធ្វើផ្លូវបេតុងជូនប្រើប្រាស់នេះ បានកើតឡើងកាលពីវេលាម៉ោង៧ និង៣០នាទីព្រឹក ថ្ងៃទី១៥ ខែធ្នូ ឆ្នាំ២០២០ ស្ថិតនៅជាប់នឹងផ្លូវក្រាលកៅស៊ូ ក្នុងភូមិអូរស្ងួត សង្កាត់បរយ៉ាខា ក្រុងប៉ៃលិន ខេត្តប៉ៃលិន។
ប្រភពព័ត៌មានបានឱ្យដឹងថា ៖ ដោយសង្កេតឃើញប្រជាពលរដ្ឋជាច្រើនគ្រួសាររស់នៅក្នុងភូមិខាងលើ មានការលំបាកធ្វើដំណើរចេញចូល ជាពិសេសនៅរដូវវស្សា ទើបអាជ្ញាធរភូមិ បានដាក់សំណើសុំទៅខាងអាជ្ញាធរសង្កាត់ ដើម្បីឱ្យរៀបចំឈូសឆាយធ្វើផ្លូវបេតុង សម្រាប់ងាយស្រួលធ្វើដំណើរចេញចូលទៅផ្ទះរបស់ខ្លួន។ ប្រភពបន្តទៀតថា គ្រាន់តែលេចឮដំណឹងថា អាជ្ញាធរមូលដ្ឋាននឹងរៀបចំធ្វើផ្លូវជូនពួកគាត់ ដែលមានផ្ទះនៅផ្នែកខាងក្រោយឆាប់ៗនេះ ស្រាប់តែមានបុរសម្នាក់ ឈ្មោះ ខ្លឹម សារ៉ាត់ អាយុ៦៥ឆ្នាំ ប្រពន្ធឈ្មោះ ផាន អាយុ៥៩ឆ្នាំ បានយកបង្គោលរបងថ្មទៅបោះនៅលើផ្លូវ បណ្តាលឱ្យមានការរិះគន់ពីប្រជាពលរដ្ឋយ៉ាងខ្លាំង។ ចំណែកផ្លូវនៅខាងក្រោយវិញ ត្រូវបានបុរសម្នាក់ឈ្មោះ រិទ្ធ ប្រពន្ធឈ្មោះ តក់ រី បានយកបង្គោលរបងថ្មបិទផ្លូវជិត មិនអាចឱ្យអាជ្ញាធរធ្វើផ្លូវកើតនោះឡើយ។
ដូច្នេះពួកគាត់ម្នាក់ៗ ដែលរស់នៅផ្នែកខាងក្រោយពិតជាមានការព្រួយបារម្ភយ៉ាងខ្លាំង ខណៈអាជ្ញាធររៀបចំធ្វើផ្លូវបេតុង សម្រាប់ឱ្យធ្វើដំណើរស្រួលទាំងអស់គ្នាហើយ បែរជាមានអ្នកគិតឃើញប្លែកៗទៅវិញ។ ពាក់ព័ន្ធនឹងបញ្ហានេះ លោក ប៉ក់ សំអឿន អតីតមេភូមិអូរស្ងួត បានរៀបរាប់ឱ្យដឹងថា ៖ ដីផ្លូវខាងលើ គឺលោកបានសុំម្ចាស់ដីឱ្យប្រគល់ជូនរដ្ឋម្ខាងចំនួន៤ម៉ែត្រ សរុបទៅគឺ៨ម៉ែត្រ ហើយក៏នាំគ្នាធ្វើដំណើរអស់រយៈពេល១០ឆ្នាំមកហើយដែរ ដោយមិនមានការធ្វើរបងហ៊ុំព័ទ្ធ ឬបិទដូចពេលនេះទេ។ លោកបន្តទៀតថា ប៉ុន្តែរហូតមកដល់ពេលនេះ គ្រាន់តែឮដំណឹងថា អាជ្ញាធររៀបចំធ្វើផ្លូវបេតុង ប្រហែលជាមានអ្នកចាក់ចុចដល់ម្ចាស់ដី ទើបនាំគ្នាជីកដាំបង្គោលបង្ខិតចូលទៅលើដីផ្លូវទៅវិញ។
ចំណែកលោក ឆៀ ហឿន មេភូមិអូរស្ងួត ទើបឡើងកាន់តំណែងថ្មី បានឱ្យដឹងកាលពីរសៀលថ្ងៃទី១៥ ខែធ្នូ ឆ្នាំ២០២០នេះដែរថា កាលពីព្រឹកមិញ ខាងអាជ្ញាធរសង្កាត់ចុះទៅធ្វើការដោះស្រាយរួចរាល់អស់ហើយ ដោយខាងម្ចាស់ដីសម្រេចប្រគល់ដីផ្នែកខាងលិច២ម៉ែត្រ និងផ្នែកខាងកើតផ្លូវ៣ម៉ែត្រ ដើម្បីឱ្យអាជ្ញាធររៀបចំឈូសឆាយធ្វើផ្លូវបេតុងជូនប្រជាពលរដ្ឋរស់នៅក្នុងភូមិ ខាងលើងាយស្រួលធ្វើដំណើរ។ ចំណែកដីផ្លូវផ្នែកខាងក្រោយ ដែលត្រូវគេហ៊ុំរបងលួស ខាងលោកនឹងឱ្យគេរើចេញពេលដែលអាជ្ញាធរត្រូវការដីធ្វើផ្លូវនៅថ្ងៃខាងមុខ៕ ដោយ ៖ នីយ៉ា
ចែករំលែកព័តមាននេះ