រាជធានីភ្នំពេញ ៖ ពិតណាស់មនុស្សនៅក្នុងលោកកើតមកមិនមានវាសនាដូចគ្នានោះទេ ព្រោះអ្នកខ្លះកើតក្នុងត្រូលដែលជាសេដ្ឋីស្រាប់ ខ្លះទៀតកើតក្នុងគ្រួសារមានជីវភាពមធ្យម និងខ្លះទៀតកើតក្នុងគ្រួសារដែលក្រីក្រណាស់ សឹងតែថាគ្មានអ្វីបរិភោគនោះទេ។
យ៉ាងណាមិញ បើទោះបីជាអ្នកមិនមានសិទ្ធក្នុងការចាប់កំណើត ថាកើតក្នុងគ្រួសារបែបណានោះទេ តែអ្នកអាចធ្វើឲ្យខ្លួនអ្នកទៅជាអ្វីសម្រាប់ពេលអនាគត ។ តួយ៉ាង
លោកឧកញ៉ាវេជ្ជបណ្ឌិត គួច ម៉េងលី ដែលគឺជាប្រធានក្រុមប្រឹក្សាភិបាលនៃក្រុមហ៊ុន Mengly J. Quach Education បានលើកឡើងថា «ក្រក៏ក្រចុះ តែត្រូវឆ្លាតវៃ» ។
លោកឧកញ៉ាបានថ្លែងថា «ជួនកាលបញ្ហាប្រឈមឧបសគ្គ និងការលំបាកទាំងឡាយ អាចនាំមនុស្ស ឱ្យគេចផុតពីភាពល្ងង់ខ្លៅអវិជ្ជា និងភាពក្រីក្រក៏មាន។ ហើយជីវិតដែលពោរពេញទៅដោយ ភាពជូរចត់និងបត់បែន ភាគច្រើនគឺជាជីវិតដែលរឹងមាំ និងជោគជ័យទៅថ្ងៃអនាគត។ មនុស្សវៃឆ្លាតច្រើនតែចូលរួមដឹងឮ គ្រប់រឿងរ៉ាវទាំងអស់ ក្នុងតំបន់ដែលខ្លួនរស់នៅ។ ធ្វើជាមនុស្ស បើយើងធ្វើខុសចេះទទួលខុស បើយើងធ្វើត្រូវកុំអំនួត បើយើងធ្វើល្អកុំមោទនភាព នោះទើបសមនឹងតម្លៃ ដែលថាយើងជាមនុស្សមានចិត្តទូលាយ»។
លោកឧកញ៉ា គួច ម៉េងលី បានបន្តថា «ថ្វីបើមនុស្សអាចកែប្រែពីល្ងង់ខ្លៅទៅជាចេះដឹងបាន ប៉ុន្តែអាកប្បកិរិយារបស់ពួកគេពិបាកនឹងកែប្រែខ្លាំងណាស់។ ចូរចាំថា ភាពក្រីក្រពុំមែនជាហេតុផលនាំឱ្យជីវិតយើងធ្លាក់ក្នុងអង្លង់នៃភាពល្ងង់ខ្លៅនោះឡើយ។ ដូច្នេះ ទោះបីក្រក៏ក្រចុះតែកុំល្ងង់ ក្រក៏ក្រចុះ តែត្រូវមានភាពថ្លៃថ្នូរ ហើយបើក្រក៏ក្រចុះតែត្រូវឆ្លាតវៃ…នោះទើបជីវិតយើងមានតម្លៃ ហើយគ្មានគេជិះជាន់បាន។ នរណាក៏មានការឈឺចាប់ដែរ ក៏ប៉ុន្តែភាពស៊ាំនឹងកម្រិតនៃការឈឺចាប់ក្នុងជីវិតពុំដូចគ្នាទេ។ ឯអ្នកខ្លះទទួលបានភាពកក់ក្តៅពេកទៅ បែរជាលែងយល់ពីភាពអាឡោះអាល័យទៅវិញក៏មាន។ ពោលលែងចេះជួយគ្នាដូចគ្រាមុន ឬភ្លេចជាតិកំណើតជាដើម»។
លោកឧកញ៉ាដែលមានវោហារសាស្ត្រប្រៀនប្រដៅជាច្រើន និងជាគំរូរបស់យុវជនរូបនេះបានបន្តថា ដូច្នេះហើយធ្វើអ្វីក៏ដោយ សូមធ្វើឱ្យគេគោរពស្រឡាញ់ឱ្យមានប្រយោជន៍ថ្លៃថ្លា កុំធ្វើឱ្យគេស្អប់ ខ្នាញ់ លួចលុបសូម្បីតែដានជើងយើង។
សូមជម្រាបជូនថា ឃ្លាខាងលើត្រូវបានដកស្រង់ចេញពីសៀវភៅ # បណ្តុំទស្សនៈ_The Philosophy Collection ទំព័រទី៣៦-៣៧ បោះពុម្ពផ្សាយខែមិថុនា គ.ស. ២០២០ និពន្ធផ្ទាល់ដោយ លោកឧកញ៉ាវេជ្ជបណ្ឌិត គួច ម៉េងលី ។
ចែករំលែកព័តមាននេះ