រាជធានីភ្នំពេញ ៖ នៅថ្ងៃសៅរ៍ ទី២៧ មិថុនា ខាងមុខនេះ កីឡាករជើងចាស់ និងជើងថ្មីចំនួន៥គូនឹងជួបគ្នានៅលើសង្វៀនស៊ីធីអិន ក្នុងនោះគូដែលទទួលបានការចាប់អារម្មណ៍ជាងគេ គឺកីឡាករស្រិល ទ្រី មកពីក្លិបគជសារកីឡា ប្រកួតជាមួយកីឡាករគឿម សុវណ្ណនឿត មកពីក្លិបឃ្លាំងមឿងកីឡា ។ រវាង ស្រិល ទ្រី និង គឿម សុវណ្ណនឿត មិនធ្លាប់ជួបគ្នាពីមុនមកទេ ទើបគេចង់ដឹងពីលទ្ធផល ថាតើនរណាជាអ្នកសម្រេចគោលដៅនៅពេលកីឡាករទាំងពីរជួបគ្នា ។
ស្រិល ទ្រី ថ្វីដ្បិតតែជាអ្នកប្រដាល់ជើងថ្មីមែន ប៉ុន្តែកុំមើលស្រាលឱ្យសោះ ព្រោះក្បាច់ប្រយុទ្ធរបស់គេមិនអន់ជាងអ្នកប្រដាល់ជើងចាស់ប៉ុន្មានឡើយ ។ សម្រាប់ការប្រកួតលើកនេះ គេមានជំនឿចិត្តច្រើនក្នុងការយកឈ្នះ គឿម សុវណ្ណនឿត ។ តាមការសង្កេតការប្រកួតកន្លងមក ស្រិល ទ្រី មានស្នៀតប្រយុទ្ធមិនធម្មតា ទាំងស្នៀតកែង និងជង្គង់ពេលវាយចេញម្តងៗបានលឿន និងចំគោលដៅបានល្អទៀតផង ។ អ្នកប្រដាល់រូបនេះមិនចេះខ្លាចអ្នកណាឡើយ ហើយទម្លាប់របស់គេចូលចិត្តវាយមិនដកថយ បើទោះជាគូប្រកួតខ្លាំងយ៉ាងណាក៏ដោយ ។
ចំណែក គឿម សុវណ្ណនឿត វិញនោះ ក៏មិនអន់ជាង ស្រិល ទ្រី ប៉ុន្មានដែរ ។ លោកសុខ វិជ័យ ដែលជាគ្រូបង្ហាត់កីឡាកររូបនេះបានប្រាប់ថា គឿម សុវណ្ណនឿត ជាសិស្សដែលគោរពវិន័យបានល្អណាស់ ទាំងការហ្វឹកហាត់ និងសីលធម៌នៃការរស់នៅ ។ មួយរយៈមកនេះគេមិនដែលបាត់មុខពីកន្លែងហ្វឹកហាត់មួយពេលណាឡើយ ដូច្នេះសម្រាប់ការប្រកួតលើកនេះលោកមានជំនឿចិត្តថា កូនសិស្សរបស់លោកនឹងឈ្នះក្នុងភាគរយច្រើន ។ គឿម សុវណ្ណនឿត ថ្វីដ្បិតតែគេមិនសូវមានជំនាញក្នុងការប្រើស្នៀតកែង និងជង្គង់ក៏ពិតមែន តែសម្រាប់បើការប្រើស្នៀតដៃ និងស្នៀតជើងវិញនោះ គឺពិតជាមិនអន់ទេ ។ ឆ្លងកាត់បទពិសោធន៍ប្រកួតជាច្រើនលើកទទួលលទ្ធផលវិជ្ជមានច្រើនជាងអវិជ្ជមាននោះ សមត្ថភាពត្រឹម ស្រិល ទ្រី គ្មានអ្វីដែលត្រូវបារម្ភសម្រាប់រូបគេឡើយ ។ ចាំមើល គូនេះនរណាជាអ្នកសម្រេចគោលដៅ ?
ចំណែកសមាសភាពកីឡាករ៤គូទៀតមាន ម៉ន ចាន់ដារ៉ា មកពីក្លិបការិយាល័យទី៥ កងទ័ពជើងគោក ប្រកួតជាមួយ ចេង គា មកពីក្លិបសាលវ័ន្តកីឡា ។ ថៃ រិទ្ធ មកពីក្លិបនាគរាជគុនខ្មែរ ប្រកួតជាមួយ សេក ណារ៉ាត់ មកពីក្លិបរ័ត្នសែនជ័យ៣១៧ គូលេន ខេត្តសៀមរាប។ សៅ ប៊ុនធឿន មកពីក្លិបតាព្រហ្មមានជ័យបង្ក្រាបគ្រឿងញៀន ប្រកួតជាមួយ គួន សុវណ្ណ មកពីក្លិបសុភានូមានជ័យ និងគូចុងក្រោយ សូត្រ ប៊ុនធី មកពីក្លិបបក្សីស្លាបដែក ប្រកួតជាមួយ សាំង គីម មកពីក្លិបអេភូថងកីឡា ៕
ចែករំលែកព័តមាននេះ