ខេត្តប៉ៃលិន ៖ បើតាមសម្តីពីក្រុមអ្នកលេងល្បែងបញ្ជល់មួយចំនួនបានអះអាងកាលពីវេលាព្រឹកថ្ងៃទី២១ មិថុនា ២០១៥ នេះថា គេបានជួលដីរបស់លោកឧត្តមសេនីយ៍ត្រី ជា ចាន់ឌិន ស្នងការនគរបាលខេត្តប៉ៃលិន ដើម្បីបើកកន្លែងលេងល្បែងមួយនេះ ហើយក៏មានច្បាប់ទម្លាប់ចេញពីកាស៊ីណូម្កុដព្រជរួចរាល់អស់ហើយ ដោយស្ថិតនៅក្នុងផែស្ងួត ដែលទើបនឹងសាងសង់ថ្មីរបស់លោកឡោ ស៊ុនជាង ក្នុងភូមិអូររអិល ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
លោកឧត្តមសេនីយ៍ត្រី ជា ចាន់ឌិន ស្នងការនគរបាលខេត្ត ធ្លាប់មានប្រសាសន៍ឱ្យដឹងតាមទូរស័ព្ទថា លោកពិតជាបានជួលដីនៅត្រង់ចំណុចខាងលើ ដែលជាដីកម្មសិទ្ធិផ្ទាល់របស់លោកឱ្យមានការបើកសង្វៀនបញ្ជល់មាន់ (កីឡាបក្សី) ប្រាកដមែន តែរឿងជល់មាន់ និងការជួលដីនេះ ពុំមានការអ្វីពាក់ព័ន្ធនឹងគ្នានោះឡើយ ។
សូមបញ្ជាក់ថា ចំពោះបញ្ហាខាងលើដែរ កន្លងទៅអ្នកបើកសង្វៀនបញ្ជល់មាន់ដ៏ថ្មីសន្លាងនេះ ធ្លាប់បានឆ្លើយឡើងថា សង្វៀនបញ្ជល់មាន់នេះ ស្ថិតនៅក្រោមអាជ្ញាប័ណ្ណរបស់កាស៊ីណូម្កុដពេជ្ររបស់លោកឡោ ស៊ុនជាង ជាម្ចាស់កាស៊ីណូ ។
ប៉ុន្តែទោះបីជាយ៉ាងណាក៏ដោយ លោកឧកញ៉ា ជា គា ដែលជាម្ចាស់កាស៊ីណូម្កុដពេជ្រពិតប្រាកដនោះ បានប្រាប់ឱ្យដឹងដែរថា កាស៊ីណូម្កុដពេជ្រ និងសង្វៀនជល់មាន់នោះ មានទីតាំងស្ថិតនៅខុសគ្នាឆ្ងាយប្រហែល២ ទៅ៣គីឡូម៉ែត្រពីគ្នាឯណោះ ពោលគឺកាស៊ីណូលោកស្ថិតនៅភូមិផ្សារព្រំ ឃុំស្ទឹងកាច់ ចំណែកកន្លែងជល់មាន់ស្ថិតនៅភូមិអូររអិល មិនមានការអ្វីពាក់ព័ន្ធជាមួយកាស៊ីណូរបស់លោកឡើយ ហើយកាស៊ីណូរបស់លោកអនុញ្ញាតឱ្យតែជនបរទេសចូលលេងប៉ុណ្ណោះ ចំណែកជនជាតិខ្មែរមិនឱ្យចូលលេងនោះឡើយ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ