ខេត្តកណ្តាល ៖ លោកយាយឆេង គ្រឿន អាយុ៧៥ឆ្នាំ ជាជនជរាពិការធ្លាក់ខ្លួនឈឺធ្ងន់ក្រោយពីលោកព្រះរាជអាជ្ញារងអមសាលាដំបូងខេត្តកណ្តាល ចុះអន្តវត្តសេចក្តីសម្រេចរក្សាការពារបណ្តេញឱ្យលោកយាយចាស់ជរាពិការ៣នាក់បងប្អូន និងចៅ ចៅទូត ចាកចេញពីផ្ទះទៅរស់នៅក្រោមដើមឈើហាលភ្លៀងហាលខ្យល់ស្រែកថា អយុត្តិធម៌ណាស់ ។ ប៉ុន្មានថ្ងៃនេះ ម្ចាស់បំណុលបានដាក់កម្លាំងមកធ្វើរបងហ៊ុមព័ទ្ធយកដី និងផ្ទះរបស់គាត់ដោយអយុត្តិធម៌បំផុត ដែលអ្នកច្បាប់ទាំងទ្បាយត្រូវតែជួយឈឺឆ្អាល ។
ដោយសារទ្រាំទ្រការឈឺចាប់ទាំងផ្លូវកាយផ្លូវចិត្តពុំបាន លោកយាយក៏ធ្លាក់ខ្លួនឈឺកាន់តែធ្ងន់ ទើបពេលនេះសុំអំពាវនាវដល់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ផ្តល់ក្តីមេត្តាជួយរកយុត្តិធម៌ ឱ្យលោកយាយនិងប្អូនៗ ព្រមទាំងចៅ-ចៅទូត បានដីនិងផ្ទះមកគ្រប់គ្រងស្នាក់នៅស្របច្បាប់វិញផង ។
នៅថ្ងៃទី២១ មិថុនា ២០១៥ វេលាម៉ោង៧ព្រឹក ឈ្មោះ ខ្លូត វុន ម្ចាស់បំណុលបាននាំកម្លាំងមករាំងរបងព័ទ្ធដីនិងផ្ទះ លែងឱ្យលោកយាយដងទឹកប្រើប្រាស់ទៀតហើយ ។ ដូច្នេះលោកយាយគ្មានជម្រក គ្មានទឹកប្រើប្រាស់ទ្បើយ លោកយាយរងគ្រោះបែបនេះដូចស្លាប់ទាំងរស់ ។
សូមបញ្ជាក់ថា កាលពីថ្ងៃទី១១ មិថុនា វេលាម៉ោង៩ព្រឹក លោក សំរិទ្ធី វាសនា ព្រះរាជអាជ្ញារងអមសាលាដំបូងខេត្តកណ្តាល បានដឹកនាំកម្លាំងចម្រុះ ចុះអនុវត្តដីកាសម្រេចរក្សាការពារលេខ៤៩(ជ) ចុះថ្ងៃទី១៩ មករា ឆ្នាំ២០១៥ និងចុះហត្ថលេខាដោយលោក ឆែ វិវឌ្ឍនៈ ចៅក្រមសាលាដំបូងខេត្ត បានដេញគ្រួសាររបស់លោកយាយ ឆេង គ្រឿន អាយុ៧៥ឆ្នាំ លោកយាយ ឆេង លន អាយុ៦៥ឆ្នាំ លោកយាយ ឆេង ចន្ថា អាយុ៥៥ឆ្នាំ ជាជនចាស់ជរាពិការ ព្រមទាំងចៅ-ចៅទូតសរុប៨នាក់ ឱ្យចុះចាកចេញពីផ្ទះដោយអយុត្តិធម៌ ។
លោកយាយ ឆេង គ្រឿន ជាជនរងគ្រោះនៅភូមិក្បាលជ្រោយ ឃុំកំពង់ភ្នំ ស្រុកលើកដែក បានរៀបរាប់ដំណើររឿងក្តីឱ្យដឹងថា នៅក្នុងឆ្នាំ២០១១ ប្អូនថ្លៃឈ្មោះ ភុំ អុន ភេទប្រុស អាយុ៥៦ឆ្នាំ នៅភូមិក្បាលជ្រោយ ឃុំកំពង់ភ្នំ បានទៅខ្ចីចងការប្រាក់ពីឈ្មោះ ខ្លូត វុន ភេទប្រុស អាយុ៦០ឆ្នាំ ធ្វើការនៅក្រសួងមហាផ្ទៃ មានទីលំនៅភូមិទួលសង្កែ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ ចំនួន១៥.០០០ដុល្លារ (មួយម៉ឺនប្រាំពាន់ដុល្លារ) ដោយយកការប្រាក់ក្នុង១ខែចំនួន៧៥០ដុល្លារ ។ ឈ្មោះ ភុំ អុន ជាប្អូនថ្លៃបានយកប្លង់ដីនិងផ្ទះរបស់គាត់«ឆេង គ្រឿន» យកទៅដាក់បញ្ចាំឱ្យឈ្មោះខ្លូត វុន ដើម្បីយកប្រាក់ ដោយកាលនោះគាត់ជាម្ចាស់ដីម្ចាស់ផ្ទះមិនបានដឹងផង ។ ម្យ៉ាងរូបគាត់មានជំងឺរ៉ាំរ៉ៃពិការមួយចំហៀងខ្លួន ដេកដួលមិនដឹងថាប្អូនថ្លៃយកប្លង់ដីនិងផ្ទះទៅបញ្ចាំគេទេ ។ លុះមានទំនាស់ប្តឹងប្តល់គ្នាទើបដឹង ហើយមកដល់ថ្ងៃទី១១ មិថុនា ឆ្នាំ២០១៥ ស្រាប់តែលោកចៅក្រមសាលាដំបូងខេត្ត ដឹកនាំកម្លាំងនគរបាលមកដេញឱ្យគាត់និងប្អូនៗ ចៅ-ចៅទូតរើអីវ៉ាន់ចុះចេញពីផ្ទះដោយអយុត្តិធម៌ ។ ហើយបែរជាឈ្មោះ ខ្លូត វុន ចោទថា គ្រួសារលោកយាយជួលដីនិងផ្ទះរស់នៅ ហើយផុតកំណត់កិច្ចសន្យាជួលមិនព្រមចេញ ទើបឈ្មោះ ខ្លូត វុន សុំដីការក្សាការពារបង្ខំឱ្យគ្រួសារលោកយាយចាកចេញពីផ្ទះ ។ គាត់ថា តើឱ្យរូបគាត់និងគ្រួសារ៨នាក់ ក្នុងបន្ទុកដែលជាជនពិការងងឹតភ្នែក ទៅស្នាក់នៅឯណា គឺអយុត្តិធម៌ណាស់ ។
គាត់ស្រែកថា ពេលនេះគ្រួសារគាត់គ្មានផ្ទះស្នាក់នៅទេ ដូច្នេះមានតែសម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ទេ សូមមេត្តាជួយអន្តរាគមន៍រកយុត្តិធម៌ផង ។
ទាក់ទិននឹងករណីខាងលើនេះ ឈ្មោះ ភុំ អុន អាយុ៥៦ឆ្នាំ ជាប្អូនថ្លៃរស់នៅភូមិក្បាលជ្រោយបានឱ្យដឹងថា រូបគាត់មានប្រពន្ធឈ្មោះឆេង ចន្ថា អាយុ៥៥ឆ្នាំ រស់នៅជាមួយបងស្រី «ឆេង គ្រឿន» ។ លុះបងៗមានជំងឺខ្យល់គរស្លាប់មួយជំហៀងខ្លួន ម្នាក់ពិការជើងងងឹតភ្នែក គ្មានប្រាក់ព្យាបាលក៏បានយកប្លង់ដីប្លង់ផ្ទះរបស់បងថ្លៃឈ្មោះ ឆេង គ្រឿន ទៅបញ្ចាំលោក ខ្លូតវុន ចំនួន១ម៉ឺន៥ពាន់ដុល្លារមែន ។ ហើយខ្លូតវុន បានយកការប្រាក់ក្នុងមួយខែ៧៥០ដុល្លារគឺបានបង់ការប្រាក់ចាប់ពីថ្ងៃទី១៧ ឧសភា ឆ្នាំ២០១១ ដល់ថ្ងៃទី១៧ ឧសភា ឆ្នាំ២០១៣សរុបគឺ២៧ខែគុណ៧៥០ដុល្លារ ស្មើ២០.២៥០ដុល្លារ ។ គាត់ថា ការប្រាក់ខ្ពស់ពេក ចំនួនប្រាក់ជំពាក់តែ១៥.០០០ដុល្លារ ការប្រាក់ដល់ទៅ២០.២៥០ដុល្លារ ទើបរូបគាត់ ភុំ អុន សុំឱ្យឈ្មោះ ខ្លូត វិន បន្ធូរបន្ថយការប្រាក់ និងសុំឈប់បង់ការប្រាក់ សុំសងតែដើមវិញ ។ ម្យ៉ាងកូនគាត់មានគ្រោះថ្នាក់ចរាចរណ៍របួសធ្ងន់ខ្វះប្រាក់ព្យាបាល ហើយក៏ស្លាប់ទៀត ទើបសុំពន្យារពេល និងសុំសងតែប្រាក់ដើមវិញ ក៏មានទំនាស់ មិននឹកស្មានថា លោក ខ្លូត វុន បែរជាបន្លំធ្វើកិច្ចសន្យាទិញលក់ និងកិច្ចសន្យាជួលដី និងផ្ទះរបស់គេទៅវិញ ពិតជាអយុត្តិធម៌ណាស់ ។
បានរៀបរាប់ទៀតថា បើគាត់លក់ដីផ្ទះឱ្យឈ្មោះ ខ្លូត វុន មែនហេតុអ្វីគាត់ចាំបាច់បង់ការប្រាក់រហូត២៧ខែគិតជាប្រាក់សរុប២០.២៥០ដុល្លារ ហើយខកខានបង់ការប្រាក់ចាប់ពីថ្ងៃទី១៧ មិថុនា ឆ្នាំ២០១៣ ស្រាប់តែនៅឆ្នាំ២០១៤ បានប្តឹងទៅសាលាដំបូងខេត្តកណ្តាល ។ ក៏ប៉ុន្តែលោកចៅក្រមបានកោះហៅសាកសួរ បានតែ២លើក ហើយមិនចាត់ការទើបពឹងលោកមេធាវី ចាន់ ណា ក្រុមមេធាវីអាស៊ានអន្តរជាតិ ដាក់ពាក្យបណ្តឹងឧទ្ធរណ៍ទៅសាលាឧទ្ធរណ៍ នៅថ្ងៃទី៣០ មករា ឆ្នាំ២០១៥ ។ ក៏ប៉ុន្តែពុំទាន់ឃើញសាលាឧទ្ធរណ៍កោះហៅផង ស្រាប់តែគេចុះមកអនុវត្តដីកាសម្រេចរក្សាការពារដេញម្ចាស់ផ្ទះ ឱ្យរើអីវ៉ាន់ចាកចេញពីផ្ទះ ដោយអយុត្តិធម៌ទៅវិញ។ លោកយាយសូមសម្តេចតេជោ ហ៊ុន សែន ជាទីគោរព មេត្តាជួយអន្តរាគមន៍រកយុត្តិធម៌ឱ្យក្រុមគ្រួសារចាស់ជរាពិការបានដីនិងផ្ទះមកគ្រប់គ្រងស្នាក់នៅស្របច្បាប់វិញផង ។ គាត់ថា ពេលនេះគ្មានផ្ទះស្នាក់នៅទេ គឺដេកក្រោមដើមឈើ ហើយប៉ុន្មានថ្ងៃមកនេះ មានភ្លៀងខ្យល់ផ្គររងារខ្លាំង បណ្តាលឱ្យលោកយាយ ឆេង គ្រឿន មានជំងឺកាន់តែធ្ងន់ ។ កោះសន្តិភាពមិនអាចទាក់ទងសុំការបំភ្លឺបានទេ ពីលោក ខ្លូត វុន ជាម្ចាស់បំណុល ៕
ចែករំលែកព័តមាននេះ