ខេត្តកំពត ៖ គ្រោងឆ្អឹងជាច្រើនដែលបានស្លា.ប់នៅក្នុងរបបប្រល័យពូជសាសន៍ ប៉ុល ពត ត្រូវបានតម្កល់ទុកនៅក្នុងវត្តបទុមប្រាង្ស៊ីរតនារាម ហៅវត្តស្ទឹង ដែលមានចម្ងាយប្រហែលជាង១គីឡូម៉ែត្រពីផ្សារឈូក ស្ថិតនៅក្នុងភូមិឈើទាល ឃុំឈូក…
ខេត្តកំពត ៖ គ្រោងឆ្អឹងជាច្រើនដែលបានស្លា.ប់នៅក្នុងរបបប្រល័យពូជសាសន៍ ប៉ុល ពត ត្រូវបានតម្កល់ទុកនៅក្នុងវត្តបទុមប្រាង្ស៊ីរតនារាម ហៅវត្តស្ទឹង ដែលមានចម្ងាយប្រហែលជាង១គីឡូម៉ែត្រពីផ្សារឈូក ស្ថិតនៅក្នុងភូមិឈើទាល ឃុំឈូក ស្រុកឈូក ខេត្តកំពត ប៉ុន្តែដោយសារតែទីតាំងតម្កល់នៅក្នុងវត្តសព្វថ្ងៃនេះមានសភាពចាស់ទ្រុឌទ្រោម ធ្វើឱ្យព្រះគ្រូចៅអធិការវត្តបានសម្រេចចិត្តប្រកាសអំពាវនាវស្វែងរកសប្បុរសជន ដើម្បីធ្វើការកសាងទីកន្លែងដ៏សមរម្យមួយតម្កល់ទុកគ្រោងឆ្អឹងទាំងនេះបន្តទៀត សម្រាប់ទុកឲ្យកូនចៅជំនាន់ក្រោយបានឃើញ និងចងចាំជាប្រវត្តិសាស្ត្រ ។
ព្រះគ្រូធម្មបាជេន្ត ស៊ន អើន ជាព្រះចៅអធិការវត្តបទុមប្រាង្ស៉ីរតនារាម ហៅវត្តស្ទឹង បានមានថេរដីកាឲ្យដឹងថា កាលពីដើមឡើយ គ្រោងឆ្អឹងទាំងនេះ ត្រូវបានតម្កល់ទុកនៅក្នុងភូមិល្អាង ស្រុកដងទង់ ខេត្តកំពត ក្រោយមកអាជ្ញាធរក៏បានយកគ្រោងឆ្អឹងទាំងនេះមកតម្កល់ទុកនៅក្នុងវត្តរបស់ព្រះអង្គវិញ ។
ព្រះគ្រូចៅអធិការវត្តបានមានថេរដីកាបញ្ជាក់ថា សព្វថ្ងៃគ្រោងឆ្អឹងទាំងនេះ គឺនៅសល់ឆ្អឹងដៃ ជើង និងលលាដ៏ក្បាល ព្រមទាំងខោអាវ ហើយអ្នកទាំងនេះ គឺត្រូវបានគេសម្លា.ប់នៅក្នុងរបបប្រល័យពូជសាសន៍ប៉ុល ពត ។
ដោយសារតែចង់ទុកឲ្យក្មេងៗជំនាន់ក្រោយបានឃើញ ព្រះគ្រូចៅអធិការវត្ត ក៏បានប្រកាសស្វែងរកសប្បុរសជន ដើម្បីកសាងទីកន្លែងតម្កល់ឡើងវិញ សម្រាប់តម្កល់ទុកគ្រោងឆ្អឹងទាំងនេះបន្តទៀត ៕
ចែករំលែកព័តមាននេះ