ខេត្តតាកែវ ៖ លំនៅឋានធ្វើអំពីថ្មប្រក់ស័ង្កសីមួយខ្នង ត្រូវភ្លើងឆាបឆេះគ្រឿងក្នុងអស់គ្មានសល់ ដោយសារម្ចាស់ផ្ទះយកប្រេងសាំងក្នុងប៊ីដុងចាក់ចូលទៅក្នុងដប ហើយយកចង្កៀងបំភ្លឺបណ្តាលឱ្យភ្លើងឆាបឆេះឡើង។ ហេតុការណ៍នេះកើតឡើងកាលពីថ្ងៃទី២៨ មីនា វេលាម៉ោង៥និង៣០នាទីព្រឹក នៅជាប់ផ្លូវជាតិលេខ៣ ក្នុងភូមិត្រាវអែម ឃុំពពេល ស្រុកត្រាំកក់។
លោកអ៊ួន សុខុម អធិការរងនគរបាលស្រុកត្រាំកក់ ប្រាប់កោះសន្តិភាពឱ្យដឹងថា ម្ចាស់ផ្ទះឈ្មោះលឹម តេង ភេទប្រុស អាយុ៧០ឆ្នាំ ប្រពន្ធឈ្មោះនួន វ៉ន អាយុ៥៤ឆ្នាំ ប្រកបរបរលក់គ្រឿងទេស និងប្រេងសាំង។ ផ្ទះនោះធ្វើពីថ្មប្រក់ស័ង្កសី មានបណ្តោយ១២ម៉ែត្រ ទទឹង៦ម៉ែត្រ កម្ពស់២ជាន់ ត្រូវភ្លើងឆេះទំនិញសព្វសារពើ និងទ្រព្យសម្បត្តិក្នុងផ្ទះអស់គ្មានសល់។
លោកអធិការរងស្រុកបន្តទៀតថា បុរសម្ចាស់ផ្ទះនាម៉ោង៥និង៣០នាទីព្រឹកបានចាក់សាំងពីប៊ីដុងចូលដប ដោយយកចង្កៀងបំភ្លឺខុសពីរាល់ដងប្រើពិលទើបបណ្តាលឱ្យភ្លើងឆាបឆេះបែបនេះ។ លោកអធិការរងបន្តថា នៅម៉ោង៦និង១៥នាទីព្រឹក រថយន្តពន្លត់អគ្គីភ័យទៅដល់ តែផ្ទះបានឆេះអស់ទៅហើយ។ ពេលនោះរថយន្តពន្លត់អគ្គីភ័យបាញ់ទឹកអស់១រថយន្តប៉ុណ្ណោះភ្លើងក៏អស់។ ចំពោះទ្រព្យសម្បត្តិដែលបាត់បង់រួមមាន ប្រាក់៣.៨៨០ដុល្លារ និង១លាន៤សែនរៀល មាស១តម្លឹង៣ជី ម៉ូតូសង់កូរ៉េ១គ្រឿង ទូរទស្សន៍២គ្រឿង កង់៣គ្រឿង ទូរស័ព្ទ៥គ្រឿង ព្រមទាំងសម្ភារមួយចំនួនទៀត។
អ្នកនៅក្បែរកន្លែងកើតហេតុនិយាយថា ពេលភ្លើងកំពុងឆេះពួកគាត់នាំគ្នាជួយដងទឹកជះពន្លត់ តែមិនអាចពន្លត់បានទេ គឺជួយយកបានតែស្រូវប៉ុណ្ណោះ ព្រោះភ្លើងឆេះខ្លាំងពេក។ ពិតណាស់ពាក្យចាស់លោកពោលថា «ស៊ូលិចទូកកណ្តាលទន្លេ កុំឱ្យតែភ្លើងឆេះផ្ទះ» ព្រោះវារលាយសូន្យបង់អ្វីៗទាំងអស់៕
ចែករំលែកព័តមាននេះ