ខេត្តកំពត ៖ ក្នុងការចូលរួមប្រឡងប្រណាំងទីក្រុងស្អាត និងកែលម្អសោភណ័ភាពក្រុង ដើម្បីអបអរសាទរបុណ្យសមុទ្រនាខែធ្នូ ចុងឆ្នាំ២០១៥ ខាងមុខនេះ លោក ស៊ុយ ធា ប្រធានមន្ទីរបរិស្ថានខេត្ត
ខេត្តកំពត ៖ ក្នុងការចូលរួមប្រឡងប្រណាំងទីក្រុងស្អាត និងកែលម្អសោភណ័ភាពក្រុង ដើម្បីអបអរសាទរបុណ្យសមុទ្រនាខែធ្នូ ចុងឆ្នាំ២០១៥ ខាងមុខនេះ លោក ស៊ុយ ធា ប្រធានមន្ទីរបរិស្ថានខេត្ត បានដឹកនាំមន្ត្រីបរិស្ថានធ្វើថ្នាលបណ្តុះកូនឈើមួយកន្លែង នៅក្បែរឆ្នេរព្រែកកំពង់បាយត្រើយខាងលិច ទល់មុខខណ្ឌរដ្ឋបាលព្រៃឈើកំពត កាលពីរសៀលថ្ងៃទី១៩ មិថុនា ២០១៥ ស្ថិតក្នុងភូមិទ្វីខាងជើង សង្កាត់អណ្តូងខ្មែរ ក្រុងកំពត ។
ជួបជាមួយអ្នកយកព័ត៌មាន លោក ស៊ុយ ធា បានមានប្រសាសន៍ថា លោកឃើញដីមួយកន្លែងជាប់មាត់ឆ្នេរ និងជាដីនៅទំនេរនេះ លោកគិតថា បើទុកឲ្យទំនេរចោលមិនកែលម្អ ឬអភិវឌ្ឍធ្វើជាសួនបណ្តុះកូនឈើទេ ថ្ងៃខាងមុខពិតជាមានអ្នកសម្លឹងមើលឃើញចង់បានធ្វើជាកម្មសិទ្ឋិលើដីរដ្ឋ(តំបន់ឆ្នេរ)នេះទៀតមិនខានឡើយ ទើបលោកត្រូវតែកែច្នៃធ្វើជាថ្នាលបណ្តុះកូនឈើជាបណ្តោះអាសន្នសិនកុំទុកឲ្យនៅទំនេរចោល ហើយការធ្វើថ្នាលបណ្តុះកូនឈើនៅពេលនេះ គឺបណ្តុះកូនឈើចំនួន២.០០០ដើម មានកូនឈើគ្រញូង៥០០ដើម កូនឈើបេងចំនួន៧០០ដើម កូនឈើគគីរចំនួន២០០ដើម និងផ្កាថ្កុលចំនួន៦០០ដើម ។
លោកប្រធានមន្ទីរបរិស្ថានខេត្ត បានបន្តថា កូនឈើទាំង២.០០០ដើមនេះ លោកបណ្តុះត្រៀមយកទៅដាំនៅផ្លូវវាងក្រុងនាថ្ងៃទី២៣ ខែមិថុនា ខាងមុខនេះ ចំណែកផ្កាថ្កុល លោកយកទៅដាំនៅតាមផ្លូវសាធារណៈ និងសួនច្បារក្នុងក្រុង ។
គួររំឭថា ខេត្តកំពតតាំងពីទទួលជ័យលាភីទីក្រុងស្អាតរំដួលបីទងពីប្រមុខរាជរដ្ឋាភិបាលមក គេឃើញអាជ្ញាធរគ្រប់ថ្នាក់ និងមន្ទីរស្ថាប័នពាក់ព័ន្ធបានយកចិត្តទុកដាក់កែលម្អសោភណ័ភាពក្រុងយ៉ាងសស្រាក់សស្រាំ ជាពិសេសមន្ទីរបរិស្ថានបានបំផុសប្រជាពលរដ្ឋនៅក្នុងក្រុង ឲ្យចូលរួមសម្អាតអនាម័យនៅតាមលំនៅឋានក្បែរផ្លូវសាធារណៈបានល្អផងដែរ ៕
ចែករំលែកព័តមាននេះ