ខេត្តកំពង់ស្ពឺ ៖ មន្ត្រីឆ្មាំពន្ធនាគារបានធ្វើការឃាត់ខ្លួនស្ត្រីម្នាក់ រួមទាំងថ្នាំញៀនមួយកញ្ចប់ ដែលបានលាក់ទុកក្នុងពងទាប្រៃយកទៅឱ្យប្តីដែលកំពុងជាប់ក្នុង ឃុំឃាំង ។ ហេតុការណ៍នេះកើតឡើងកាលពីវេលាម៉ោង០៩ និង៤៥នាទីព្រឹក
ខេត្តកំពង់ស្ពឺ ៖ មន្ត្រីឆ្មាំពន្ធនាគារបានធ្វើការឃាត់ខ្លួនស្ត្រីម្នាក់ រួមទាំងថ្នាំញៀនមួយកញ្ចប់ ដែលបានលាក់ទុកក្នុងពងទាប្រៃយកទៅឱ្យប្តីដែលកំពុងជាប់ក្នុង ឃុំឃាំង ។ ហេតុការណ៍នេះកើតឡើងកាលពីវេលាម៉ោង០៩ និង៤៥នាទីព្រឹក ថ្ងៃទី១៩ មិថុនា ២០១៥ នៅពន្ធនាគារខេត្តកំពង់ស្ពឺ ក្នុងភូមិត្រស់សាលា សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ ។
ប្រភពបានឱ្យដឹងថា ស្ត្រីជាប់សង្ស័យឈ្មោះសាក់ ស្រីនាថ អាយុ២៣ឆ្នាំ រស់នៅភូមិស្រែអំពិល ឃុំឈើទាល ស្រុកកៀនស្វាយ ខេត្តកណ្តាល ។
ប្រភពពីមន្ត្រីការិយាល័យប្រឆាំងគ្រឿងញៀនបានឱ្យដឹងថា ស្ត្រីដែលព្យាយាមយកថ្នាំញៀនទៅឱ្យប្តីនៅក្នុងពន្ធនាគារនេះ ត្រូវបានឃាត់ខ្លួនដោយមន្ត្រីអនុរក្សពន្ធនាគារ និងបានប្រគល់មកឱ្យជំនាញចាត់ការបន្ត ។ ស្ត្រីជាប់សង្ស័យមានប្តីឈ្មោះសួន សារឿន បច្ចុប្បន្នជាប់ឃុំដោយសារតែរក្សាទុកនូវសារធាតុញៀន ដែលត្រូវសមត្ថកិច្ចឃាត់ខ្លួននាពេលកន្លងមក ។
ប្រភពដដែលបានបន្តថា ស្ត្រីជាប់សង្ស័យបានលាក់គ្រឿងញៀននៅក្នុងពងទាប្រៃចំនួនមួយកញ្ចប់ ។
បច្ចុប្បន្ន ស្ត្រីជាប់សង្ស័យត្រូវបានសមត្ថកិច្ចការិយាល័យជំនាញកសាងសំណុំរឿង ដើម្បីបញ្ជូនទៅកាន់សាលាដំបូងខេត្តចាត់ការតាមនីតិវិធី ។
ទោះជាយ៉ាងណា ស្ត្រីជាប់សង្ស័យមិនបានឆ្លើយសារភាពថា ជាទង្វើរបស់ខ្លួននោះទេដោយនាងនិយាយថា កាលពីប៉ុន្មានថ្ងៃមុន ប្តីរបស់នាងបានពឹងពាក់គេឱ្យទូរស័ព្ទមករកនាងឱ្យមកសួរសុខទុក្ខ និងយករបស់របរហូបចុកមកផ្ញើ ។ ស្ត្រីជាប់សង្ស័យបន្តថា មុនពេលដែលនាងមកជួបប្តី គឺពងទាទាំងនេះត្រូវបានមិត្តភក្តិប្តីម្នាក់ជាអ្នកផ្ញើមក ។
តែទោះបែបណា នេះជាការឆ្លើយដោះសារតែប៉ុណ្ណោះ សមត្ថកិច្ចបានធ្វើការដកហូតថ្នាំញៀន និងចាត់ការតាមជំនាញផងដែរ ៕
ចែករំលែកព័តមាននេះ