រាជធានីភ្នំពេញ ៖ ក្រសួងសុខាភិបាលបានបញ្ជាក់ថា បានរកឃើញអ្នកជំងឺកូវីដ១៩ ចំនួន១០នាក់បន្ថែម ក្នុងនោះ៦នាក់ បានឆ្លងពីព្រឹត្តិការសហគមន៍២៨ វិច្ឆិកា ។
យោងតាមសេចក្តីប្រកាសព័ត៌មានរបស់ក្រសួងសុខាភិបាល នៅថ្ងៃទី៥ ធ្នូ ឆ្នាំ២០២០ បានឲ្យដឹងថា បានរកឃើញអ្នកឆ្លងជំងឺកូវីដ១៩ ចំនួន១០នាក់ ក្នុងនោះ៦នាក់ បានឆ្លងពីព្រឹត្តិការណ៍សហគមន៍ និងបានព្យាបាលជាសះស្បើយ១នាក់ ។ ក្រសួងបានបន្តថា អ្នកឆ្លង៤នាក់ ជាអ្នកដំណើរមិនបានប៉ះពាល់ជាមួយព្រឹត្តិការណ៍សហគមន៍នោះទេ ។
អ្នកទាំង៦នាក់ដែលបានឆ្លងពីព្រឹត្តិការណ៍សហគមន៍មាន ៖
១- ស្ត្រីជនជាតិខ្មែរ ឈ្មោះ Muy Sopheavy អាយុ២២ឆ្នាំ ស្នាក់នៅផ្ទះជួលខណ្ឌច្បារអំពៅ រាជធានីភ្នំពេញ។
២- ស្ត្រីជនជាតិខ្មែរ ឈ្មោះ Yeak Chantha អាយុ២៨ឆ្នាំ ស្នាក់នៅផ្ទះលេខ ២៣៦ ផ្លូវលេខ៦៣៨ ភូមិម៉ាក់ក្លឿង សង្កាត់ច្បារអំពៅ១ ខណ្ឌច្បារអំពៅ ។
៣– បុរសជនជាតិខ្មែរ ឈ្មោះ Cheak Chanrath អាយុ២០ឆ្នាំ ស្នាក់នៅសង្កាត់ត្រឡោកបែក ៣ ខណ្ឌទួលគោក ។
៤-ស្ត្រីជនជាតិខ្មែរឈ្មោះ Pho Dolla អាយុ២៤ឆ្នាំ ស្នាក់នៅសង្កាត់ទន្លេបាសាក់ ខណ្ឌចំការមន ។
៥- បុរសជនជាតិខ្មែរ ឈ្មោះ Khan Veha អាយុ២៣ឆ្នាំ ស្នាក់នៅជិតស្តុប Nokia ខណ្ឌសែនសុខ ។
៦– ស្ត្រីជនជាតិខ្មែរ ឈ្មោះ Kouch Davin អាយុ២៣ឆ្នាំ ស្នាក់ផ្ទះលេខ E53 ភូមិតាងួន សង្កាត់កំបូល ខណ្ឌកំបូល។
ចំណែក៤នាក់ទៀតមកពីចិនរួមមាន៖
១-បុរសជនជាតិខ្មែរឈ្មោះ អ៊ីវ សុគន្ធ អាយុ៧៥ឆ្នាំ ស្នាក់នៅសង្កាត់ផ្សារថ្មី ខណ្ឌដូនពេញ រាជធានីភ្នំពេញ ជាអ្នកដំណើរមកពីប្រទេសចិន មកដល់កម្ពុជានៅថ្ងៃទី២០ ខែវិច្ឆិកា ឆ្នាំ២០២០
២-បុរសជនជាតិអាមេរិក ឈ្មោះ Kaw Thikun ប្រុស ៥៩ឆ្នាំ ស្នាក់នៅសង្កាត់ផ្សារថ្មី ខណ្ឌដូនពេញ រាជធានីភ្នំពេញ ជាអ្នកដំណើរមកពីប្រទេសចិន មកដល់កម្ពុជានៅថ្ងៃទី២០ ខែវិច្ឆិកា ឆ្នាំ ២០២០
៣-បុរសជនជាតិអាមេរិកឈ្មោះ Shawn Thach ប្រុស អាយុ៤២ឆ្នាំ ស្នាក់នៅសង្កាត់ទឹកថ្លា ខណ្ឌសែនសុខ រាជធានីភ្នំពេញ ជាអ្នកដំណើរមកពីប្រទេសចិន មកដល់កម្ពុជានៅថ្ងៃទី ២០ ខែវិច្ឆិកា ឆ្នាំ២០២០
៤-បុរសជនជាតិអាមេរិក ឈ្មោះ Oum Chandara ប្រុស អាយុ៤៩ ស្នាក់នៅរាជធានីភ្នំពេញ ជាអ្នកដំណើរមកពីសហរដ្ឋអាមេរិក បន្តជើងហោះហើរនៅប្រទេសចិន (តៃវ៉ាន់) មកដល់កម្ពុជានៅថ្ងៃទី០៤ ខែធ្នូ ឆ្នាំ២០២០ ។
ក្រសួងបន្តថា មានករណីជាសះស្បើយចំនួន០១នាក់ជាស្ត្រីជនជាតិខ្មែរឈ្មោះ គឹម លីម អាយុ ៤៩ឆ្នាំ មានអាស័យដ្ឋាននៅសង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ បានធ្វើដំណើរមកពីសហរដ្ឋអាមេរិក បន្តជើងហោះហើរនៅប្រទេសកូរ៉េខាងត្បូង តាមជើងហោះហើរមកដល់ប្រទេសកម្ពុជា ថ្ងៃទី១៦ ខែវិច្ឆិកា ឆ្នាំ២០២០ បានព្យាបាលជាសះស្បើយ ដោយទទួលបានលទ្ធផលតេស្ត អវិជ្ជមានវីរុសកូវីដ មណ្ឌល-១៩ ចំនួន០២លើក ត្រូវបានអនុញ្ញាតឲ្យចេញពីមណ្ឌលសុខភាពចាក់អង្រែរាជធានីភ្នំពេញ ។
ចំពោះលទ្ធផលធ្វើតេស្តអ្នកប៉ះពាល់ក្នុង « ព្រឹត្តិការណ៍សហគមន៍ ២៨ វិច្ឆិកា ត្រូវបានក្រសួងឲ្យដឹងថា នៅថ្ងៃទី០៤ ខែធ្នូ ឆ្នាំ២០២០ វត្ថុសំណាកដែលនៅសល់ពីថ្ងៃទី០៣ ខែធ្នូ ឆ្នាំ២០២០ ចំនួន៧៩នាក់បូកបន្ថែមចំនួនវត្ថុសំណាកទទួលបានបន្ថែមនៅថ្ងៃដដែលពីខេត្ត និងរាជធានីភ្នំពេញ សរុបមានចំនួន ៣៣៤ សំណាក ត្រូវបានធ្វើវិភាគដោយវិទ្យាស្ថានប៉ាស្ទ័រកម្ពុជា គឺមានលទ្ធផល វិជ្ជមានវីរុសកូវីដ-១៩ ថ្មី ចំនួន០៦ នាក់( ដែលជាអ្នកជំងឺខាងលើនេះ) ។
ដោយឡែក មាននៅសល់វត្ថុសំណាកចំនួន ៥១សំណាកផ្សេងទៀត ដែលត្រូវវិភាគបន្តនៅថ្ងៃទី០៥ ខែធ្នូ ឆ្នាំ២០២០។ គិតពីថ្ងៃទី២៩ ខែវិច្ឆិកា ដល់ថ្ងៃទី០៣ ខែធ្នូ ឆ្នាំ២០២០ ក្រសួងសុខាភិបាល បានធ្វើតេស្តអ្នកប៉ះពាល់សរុបទាំងអស់បានចំនួន១០,១៤៧សំណាក ដែលនៅក្នុងចំនួននេះ មានអ្នកវិជ្ជមានវីរុសកូវីដ-១៩ ថ្មី សរុបចំនួន ២៩នាក់ ដែលកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ។ ម្យ៉ាងវិញទៀត សូមអ្នកប៉ះពាល់ទៅនឹង «ព្រឹត្តិការណ៍សហគមន៍ ២៨វិច្ឆិកា» ទាំងអស់អញ្ជើញទៅធ្វើតេស្តជាលើកទី២ នៅថ្ងៃទី០៨ ខែធ្នូ ឆ្នាំ២០២០ ខាងមុខនេះដែលក្រសួងសុខាភិបាលនឹងរៀបចំទីតាំងនៅបរិវេណក្រសួងមហាផ្ទៃពហុកីឡាដ្ឋានជាតិអូឡាំពិច រាជធានីភ្នំពេញ និងនៅតាមមន្ទីរសុខាភិបាលរាជខេត្ត ។
ស្ថានភាពជំងឺកូវីដ-១៩ នៅទូទាំងប្រទេស គិតត្រឹមម៉ោង ០៧និង០០ព្រឹក ថ្ងៃទី០៥ ខែធ្នូ ឆ្នាំ២០២០ ស្ថានភាពជំងឺកូវីដ-១៩ នៅកម្ពុជាមានចំនួនអ្នកព្យាបាលជាសះស្បើយ សរុបទូទាំងប្រទេសមានចំនួន ៣០៥នាក់ (ស្មើនឹង ៨៨,៤១% ធៀប នឹងចំនួនអ្នកមានវីរុសកូវីដ-១៩ទាំងអស់) នៅក្នុងចំនួននេះមានស្រី ៦២នាក់ និងបុរស ២៤៣នាក់ ។ អ្នកមានវីរុសកូវីដ-១៩ មានចំនួនសរុប ៣៤៥នាក់ (ស្ត្រី ៨០នាក់ និងបុរស ២៦៥នាក់ ) ។
អ្នកសម្រាកព្យាបាលនៅមន្ទីរពេទ្យមិត្តភាពខ្មែរ -សូវៀត រាជធានីភ្នំពេញ ចំនួន៣៤នាក់ (ស្រី ១៥នាក់និងបុរស ១៩នាក់ )។ អ្នកសម្រាកព្យាបាលនៅមណ្ឌលសុខភាពចាក់អង្រែ រាជធានីភ្នំពេញ ចំនួន ០៦នាក់ (ស្រី ០៣នាក់ និង បុរស ០៣នាក់)៕
ចែករំលែកព័តមាននេះ