ក្រុងប៉ោយប៉ែត ៖ នៅវេលាម៉ោង១០ព្រឹក ថ្ងៃទី២១ មីនា សមត្ថកិច្ចប៉ូលិសដឹកនាំកម្លាំងផ្ទាល់លោកអនុសេនីយ៍ឯក អ៊ុំ សុផល អធិការក្រុងប៉ោយប៉ែត បានបង្ក្រាបទីតាំងចែកចាយថ្នាំញៀនមួយកន្លែងស្ថិតនៅប្លុកផ្ទះល្វែងក្នុងភូមិបាលិលេយ្យ សង្កាត់ប៉ោយប៉ែត ក្រុងប៉ោយប៉ែត និងបានឃាត់ខ្លួនស្ត្រីជាអ្នកចែកចាយម្នាក់ ព្រមទាំងដកហូតវត្ថុតាងបានមួយចំនួនផងដែរ ។
តាមការបំភ្លឺពីសមត្ថកិច្ចបានឱ្យដឹងថា ការបង្ក្រាបទីតាំងចែកចាយថ្នាំញៀននេះ គឺធ្វើឡើងតាមបទបញ្ជារបស់តុលាការ និងជាបញ្ជារបស់លោកស្នងការ ។ ស្ត្រីដែលត្រូវសមត្ថកិច្ចឃាត់ខ្លួនឈ្មោះប្លែន ភា អាយុ៣៧ឆ្នាំ ជាអ្នកជួលបន្ទប់ស្នាក់នៅ និងចែកចាយថ្នាំញៀន ។ ក្នុងការឃាត់ខ្លួននោះសមត្ថកិច្ចបានដកហូតវត្ថុតាងមានថ្នាំញៀនប្រភេទខេទឹកកកចំនួន១៨ថង់តូច យ៉ាម៉ា៧០គ្រាប់ លុយសៀម៥១.៤០០បាត និងលុយខ្មែរ២៥០.០០០រៀល ។
លោកអនុសេនីយ៍ឯក អ៊ុំ សុផល អធិការក្រុងប៉ោយប៉ែត បានឱ្យដឹងថា ការចុះបង្ក្រាបបទល្មើសគ្រឿងញៀននេះគឺសមត្ថកិច្ចរបស់លោកបានធ្វើការបង្ក្រាបជាបន្តបន្ទាប់ដល់ទីតាំងអ្នកចែកចាយ ដោយអនុវត្តតាមគោលការណ៍របស់ថ្នាក់ដឹកនាំដែលបានដាក់បទបញ្ជាឱ្យសមត្ថកិច្ចធ្វើដូចភ្លៀងរលឹមតែម្តង សម្រាប់ក្រុងប៉ោយប៉ែតនេះ ។ ចំពោះជនសង្ស័យចែកចាយថ្នាំញៀន និងវត្ថុតាងមួយចំនួនធំដែលសមត្ថកិច្ចដកហូតបាននោះ នឹងត្រូវកសាងសំណុំរឿងបញ្ជូនទៅតុលាការដើម្បីចាត់ការបន្ត ៕
ចែករំលែកព័តមាននេះ