ខេត្តប៉ៃលិន ៖ អាជីវករជាច្រើននាក់ រស់នៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅបានត្អូញត្អែរពីជីវភាពរស់នៅប្រចាំថ្ងៃរបស់ខ្លួន និងព្រួយបារម្ភខ្លាំងចំពោះបញ្ហារកប្រាក់យកទៅសងការជំពាក់បំណុលមីក្រូហិរញ្ញវត្ថុ ខណ:ជំងឺកូវីដ-១៩នៅតែបន្តរាត ត្បាតអូសបន្លាយរយៈពេលយូរនៅទូទាំងពិភពលោក ក៏ដូចជានៅកម្ពុជាដែរ…
ខេត្តប៉ៃលិន ៖ អាជីវករជាច្រើននាក់ រស់នៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅបានត្អូញត្អែរពីជីវភាពរស់នៅប្រចាំថ្ងៃរបស់ខ្លួន និងព្រួយបារម្ភខ្លាំងចំពោះបញ្ហារកប្រាក់យកទៅសងការជំពាក់បំណុលមីក្រូហិរញ្ញវត្ថុ ខណ:ជំងឺកូវីដ-១៩នៅតែបន្តរាត ត្បាតអូសបន្លាយរយៈពេលយូរនៅទូទាំងពិភពលោក ក៏ដូចជានៅកម្ពុជាដែរ ។
ពីមុនការលក់ដូរកាក់កប ព្រោះមានបុគ្គលិកកាស៊ីណូ និងប្រជាពលរដ្ឋឆ្លងដែនចេញ ចូលពីប្រទេសកម្ពុជាទៅប្រទេសថៃចូលទិញនំចំណី ម្ហូបអាហារ តែពេលមានការហាមប្រាមការឆ្លងដែន ដើម្បីការពារកុំឲ្យឆ្លងជំងឺដ៏កាចសាហាវនេះ អត់សូវមានអ្នកទិញដូចកាលពីមុនឡើយ ។
ជាក់ស្តែង អាជីវករឈ្មោះ នុត តាន់ ភេទប្រុស អាយុ៣៦ឆ្នាំ ប្រកបរបរលក់នំដំឡូងមី សាច់មាន់ សាច់គោអាំង និងឈ្មោះ ឃាង ហ៊ុល ភេទប្រុស អាយុ២៥ឆ្នាំ លក់ទាដុតក្នុងពាង ព្រមទាំងអ្នកលក់ប្រហិត និងគ្រឿងហូបផ្សេងៗទៀត សុទ្ធតែនិយាយដូចៗគ្នាថា រហូតមកដល់ពេលនេះ ការលក់ដូររបស់ពួកគាត់ពិតជាមានការធ្លាក់ចុះយ៉ាងខ្លាំង ។
កាលពីមិនទាន់មានជំងឺកូវីដ-១៩ ក្នុង១ថ្ងៃៗពួកគាត់អាចរកបានប្រាក់ចំណូលចាប់ពី៣០ទៅ៤០ម៉ឺនរៀល ។ លុះពេលមានវិបត្តិកូវីដ-១៩អស់រយ:ពេលដ៏យូរនេះ ក្នុង១ថ្ងៃៗពួកគាត់លក់បានប្រាក់ត្រឹមតែ១០ទៅ១៥ម៉ឺនរៀលប៉ុណ្ណោះ ។ប្រភពដដែលបន្តថា បច្ចុប្បន្ននេះពិតជាស្ងាត់ម៉ូយយ៉ាងខ្លាំង ខណ:ច្រកទ្វារអន្តរជាតិព្រំជាប់ព្រំដែនកម្ពុជា-ថៃ អនុញ្ញាតឱ្យត្រឹមតែរថយន្តដឹកទំនិញចូលប៉ុណ្ណោះ ។
រីឯកាស៊ីណូទាំងអស់ ត្រូវបានបិទទ្វារមិនអាចឱ្យប្រជាពលរដ្ឋ ឬភ្ញៀវទេសចរចូលលេងឡើយ ដូច្នេះហើយទើបធ្វើឱ្យមុខរបររបស់ពួកគាត់មានការធ្លាក់ចុះជាងពាក់កណ្តាល
បើប្រៀបធៀបទៅនឹងកាលពីមិនទាន់មានកូវីដ-១៩ ។តាមព័ត៌មានថា ប្រទេសថៃបានប្រកាសបិទព្រំដែនបន្តរហូតដល់ពាក់កណ្ដាលខែមករា ឆ្នាំក្រោយ ។
បច្ចុប្បន្ន ពួកគាត់កំពុងតែជំពាក់បំណុលគេគ្រប់ៗគ្នា ហើយមានការព្រួយបារម្ភយ៉ាងខ្លាំងចំពោះជីវភាព ។ អ្វីដែលកាន់តែព្រួយបារម្ភខ្លាំងថែមទៀតនោះ គឺការរកប្រាក់យកទៅសងបំណុលដែលជំពាក់ខាងមីក្រូហិរញ្ញវត្ថុ ទោះបីជាយ៉ាងណា ពួកគាត់ក៏មិនអាចសម្ងំសម្រាកនៅផ្ទះបានឡើយ ៕
ចែករំលែកព័តមាននេះ