ជប៉ុន ៖ គណកម្មាធិការរៀបចំកីឡាអូឡាំពិកជប៉ុន បានអះអាងកាលពីថ្ងៃទី ៣ ធ្នូ កន្លងទៅថា ប្រហែល១៨%នៃចំនួនសំបុត្រ ដែលលក់ដាច់ក្នុងប្រទេសជប៉ុន សម្រាប់ព្រឹត្តិការណ៍កីឡាអូឡាំពិកទីក្រុងតូក្យូ ដែលត្រូវពន្យារពេលទៅឆ្នាំក្រោយ ដោយសារការរីករាលដាលកូវីដ១៩ នឹងត្រូវសងប្រាក់វិញ។
ម្ចាស់សំបុត្រក្នុងប្រទេសជប៉ុនត្រូវបានផ្តល់ឱកាស ដើម្បីស្នើសុំប្តូរយកប្រាក់វិញ។ ហើយអ្នករៀបចំបានលើកឡើងនៅក្នុងសេចក្តីប្រកាសព័ត៌មានថា ការសងប្រាក់សម្រាប់សំបុត្រប្រហែល៨១ម៉ឺនសន្លឹក ត្រូវបានស្នើឡើងក្នុងចំណោមសំបុត្រចំនួន ៤,៤៥លានសន្លឹក ដែលត្រូវបានលក់ដាច់លើកដំបូងក្នុងស្រុក។
ម្ចាស់សំបុត្រអាចដាក់ពាក្យស្នើសុំប្រាក់វិញ កាលពីខែវិច្ឆិកាកន្លងទៅ ហើយការសងប្រាក់ នឹងចាប់ផ្តើមធ្វើឡើងនៅចុងខែធ្នូនេះ។ ខណៈសំបុត្រដែលបានទិញរួចហើយ នៅតែមានសុពលភាពសម្រាប់ព្រឹត្តិការណ៍មួយនេះ ដែលបានកំណត់តាមកាលវិភាគថ្មី។
យ៉ាងណាមិញ អ្នករៀបចំកម្មវិធីមិនទាន់អាចអះអាងថា តើអ្នកទស្សនានឹងត្រូវអនុញ្ញាតឱ្យចូលទៅកាន់កន្លែងប្រកួតដែរឬទេ? ហើយការសម្រេចចិត្តនឹងត្រូវធ្វើឡើងនៅពេលក្រោយ។
សូមបញ្ជាក់ថា ព្រឹត្តិការណ៍កីឡាអូឡាំពិកទីក្រុងតូក្យូឆ្នាំ ២០២០ នឹងត្រូវធ្វើពិធីបើកនាថ្ងៃទី ២៣ កក្កដា និងបិទនាថ្ងៃទី ៨ សីហា ឆ្នាំ ២០២១ តាមកាលវិភាគថ្មី៕ (ដកស្រង់ចេញពី Reuters)
ចែករំលែកព័តមាននេះ