ខេត្តតាកែវ ៖ យុទ្ធនាការក្តៅគគុកចាប់ម៉ូតូមិនពេញលក្ខណៈច្បាប់ចរាចរបានធ្វើឡើងរយៈពេល២ថ្ងៃ គឺថ្ងៃទី១៧ និង១៨ មីនា ២០១១ ដោយសមត្ថកិច្ចនគរបាលចរាចរខេត្ត ។ លោកវរសេនីយ៍ឯក អ៊ុន សារិន ស្នងការរងទទួលបន្ទុកនាយការិយាល័យកណ្តាលសណ្តាប់ធ្នាប់ខេត្តថ្លែងថា យុទ្ធនាការចាប់ម៉ូតូមិនពេញលក្ខណៈច្បាប់នេះអនុវត្តតាមបទបញ្ជាផ្ទាល់ពីលោកឧត្តមសេនីយ៍ត្រីអ៊ុក សំណាង ស្នងការនគរបាលខេត្តតាកែវ។ ការអនុវត្តការងារនេះនៅគោលដៅ២ គឺនៅមុខវិទ្យាល័យ ជា ស៊ឹម តាកែវ ដែលតាមការសង្កេតកូនសិស្សមួយចំនួនធំអត់ពាក់មួកសុវត្ថិភាព និងម៉ូតូអត់ដាក់កញ្ចក់ និងគោលដៅមួយទៀតនៅតាមផ្លូវវិមានឯករាជ្យដែលជាផ្លូវធំមានការធ្វើដំណើរទៅមកច្រើន។
លោកអ៊ុន សារិន ឱ្យដឹងថា ពេញមួយថ្ងៃទី១៧ មីនា កំលាំងរបស់លោកចាប់ម៉ូតូអត់គោរពច្បាប់ចរាចរបានចំនួន៨៦គ្រឿងយកទៅរក្សាទុកនៅស្នងការដ្ឋាននគរបាលខេត្ត និងនៅព្រឹកថ្ងៃទី១៨ មីនា ចាប់បានចំនួន២០គ្រឿងទៀតសរុប១០៦គ្រឿង។
លោកឧត្តមសេនីយ៍ត្រីអ៊ុក សំណាង ស្នងការនគរបាលខេត្តមានប្រសាសន៍ថា ដោយអនុវត្តតាមការណែនាំពីក្រសួងមហាផ្ទៃ អគ្គស្នងការនគរបាលជាតិ ស្នងការដ្ឋាននគរបាលខេត្តបានឱ្យកំលាំងជំនាញចុះផ្សព្វផ្សាយណែនាំ ចែកសៀវភៅច្បាប់ចរាចរដល់ប្រជាពលរដ្ឋនៅតាមមូលដ្ឋានជាច្រើនលើក តែនៅតែមានអ្នកមិនអនុវត្តតាមច្បាប់ដដែល ភាគច្រើនសិស្សសាលា និងសមត្ថកិច្ចតែម្តង ។
លោកស្នងការថ្លែងថា «ការចាប់ម៉ូតូអត់គោរពច្បាប់នេះយើងធ្វើអត់យោគយល់ឡើយ»។ លោកបន្តថា នៅដើមខែមីនានេះសមត្ថកិច្ចបានចុះចាប់ម៉ូតូនៅចំណុចស្ថានីយរថភ្លើងបានចំនួន៤៧គ្រឿង ព្រមទាំងហៅម្ចាស់ទៅណែនាំពីច្បាប់ចរាចររួចទើបប្រគល់ម៉ូតូឱ្យវិញ ។ លើកនេះនឹងហៅម្ចាស់ម៉ូតូទាំងអស់នោះទៅណែនាំច្បាប់ចរាចរ រួចផាកពិន័យទៅតាមច្បាប់ចរាចរ និងឱ្យធ្វើកិច្ចសន្យាផងដែរ ៕
ចែករំលែកព័តមាននេះ