ខេត្តព្រះសីហនុ ៖ រថយន្តអង្គរក្សក្នុងក្បួនធ្វើដំណើររបស់លោក សម រង្ស៊ី ១គ្រឿង ដែលធ្វើដំណើរវិលត្រឡប់ពីក្រុងព្រះសីហនុទៅរាជធានីភ្នំពេញ បានជួបឧបទ្ទវហេតុគ្រោះថ្នាក់ចរាចរណ៍ក្រឡាប់ដោយខ្លួនឯង និងបានបណ្តាលឱ្យអង្គរក្សក្នុងរថយន្តសរុប៧នាក់មាន៦នាក់រងរបួសធ្ងន់
ខេត្តព្រះសីហនុ ៖ រថយន្តអង្គរក្សក្នុងក្បួនធ្វើដំណើររបស់លោក សម រង្ស៊ី ១គ្រឿង ដែលធ្វើដំណើរវិលត្រឡប់ពីក្រុងព្រះសីហនុទៅរាជធានីភ្នំពេញ បានជួបឧបទ្ទវហេតុគ្រោះថ្នាក់ចរាចរណ៍ក្រឡាប់ដោយខ្លួនឯង និងបានបណ្តាលឱ្យអង្គរក្សក្នុងរថយន្តសរុប៧នាក់មាន៦នាក់រងរបួសធ្ងន់ និងម្នាក់របួសស្រាល ។
ហេតុការណ៍នេះបានកើតឡើងនៅថ្ងៃទី១៥ មិថុនា វេលាម៉ោង៤និង១៥នាទីរសៀល នៅតាមបណ្តោយផ្លូវជាតិលេខ៤ ចំណុចគីឡូម៉ែត្រលេខ១៥៣ និងលេខ១៥៤ ក្នុងភូមិស្ទឹងឆាយខាងត្បូង ឃុំស្ទឹងឆាយ ស្រុកកំពង់សិលា ។
ប្រភពពីនគរបាលស្រុកកំពង់សិលា ឱ្យដឹងថា រថយន្តដែលជួបគ្រោះថ្នាក់នោះម៉ាកតាកូម៉ា ពណ៌ខ្មៅ ជារថយន្តរបស់អង្គរក្ស លោក សម រង្ស៊ី ដែលធ្វើដំណើរពីខេត្តព្រះសីហនុ ឆ្ពោះទៅភ្នំពេញដល់ចំណុចកើតហេតុ រថយន្តបានបើកវា៉រថយន្តធុនធំមួយគ្រឿង ដែលបើកបរស្របទិសគ្នាពីខាងមុខ ។ លុះវ៉ាផុតរថយន្តនោះបានចូលមកស្តាំដៃវិញ ហើយជ្រុលធ្លាក់ផ្លូវ ក៏ក្រឡាប់ផ្ងារកង់៤ឡើងលើតែម្តង ។
ប្រភពដដែលបានបន្តថា ពេលកើតហេតុនោះគឺរថយន្តលោក សម រង្ស៊ី បើកពីក្រោយពុំមានគ្រោះថ្នាក់ទេ ។ ភ្លាមៗនោះ អ្នករបួសត្រូវបាននគរបាលប៉ុស្តិ៍ដឹកតាមរថយន្តរបស់ខ្លួនមកសង្គ្រោះនៅវាលរេញ តែត្រូវបានដឹកបន្តតាមរថយន្តសង្គ្រោះទៅកាន់ក្រុងព្រះសីហនុ វិញ ហើយលោក សម រង្ស៊ី ក៏បានវិលត្រឡប់ក្រោយដែរ ។
នេះជាហេតុអាក្រក់ ក្រោយគ្នាតែប៉ុន្មានថ្ងៃសោះបន្ទាប់ពីរថយន្តរបស់លោក មាជ សុវណ្ណរ៉ា បានជួបគ្រោះថ្នាក់រថយន្តបុកគ្នានៅស្រុកក្រគរ ខេត្តពោធិ៍សាត់ បណ្តាលឱ្យរងរបួស ហើយក៏ទើបតែចេញដំណើរទៅប្រទេសថៃ ដើម្បីព្យាបាលបន្ត។ ទាក់ទិននិងហេតុការណ៍ក្រឡាប់រថយន្តអង្គរក្សលោក សម រង្ស៊ី ដែលមានអ្នករបួសធ្ងន់ធ្ងររហូតដល់៦នាក់ ក្នុងចំណោម៧នាក់នោះ ក៏មានប្រធានអង្គរក្សរបស់លោក សម រង្ស៊ី ដែលគេស្គាល់ជាទូទៅផងដែរ ៕
ចែករំលែកព័តមាននេះ