ចាប់ពីថ្ងៃទី១ ដល់ថ្ងៃទី១៥ ខែធ្នូ ឆ្នាំ២០២០ ការអនុវត្តត្រួតពិនិត្យរឹតបន្តឹងច្បាប់ចរាចរណ៍ ត្រូវបានផ្អាកជាបណ្តោះអាសន្ន ។ ពោលគឺប៉ូលិសចរាចរណ៍មិនថា នៅភ្នំពេញនិងនៅតាមបណ្តាខេត្តនានាទូទាំងប្រទេស បានផ្អាកស្ទាក់ចាប់ផាកពិន័យលើយានយន្តទាំងអស់…
ចាប់ពីថ្ងៃទី១ ដល់ថ្ងៃទី១៥ ខែធ្នូ ឆ្នាំ២០២០ ការអនុវត្តត្រួតពិនិត្យរឹតបន្តឹងច្បាប់ចរាចរណ៍ ត្រូវបានផ្អាកជាបណ្តោះអាសន្ន ។ ពោលគឺប៉ូលិសចរាចរណ៍មិនថា នៅភ្នំពេញនិងនៅតាមបណ្តាខេត្តនានាទូទាំងប្រទេស បានផ្អាកស្ទាក់ចាប់ផាកពិន័យលើយានយន្តទាំងអស់ ដែលល្មើសច្បាប់ចរាចរណ៍ ។ ប៉ុន្តែសមត្ថកិច្ចចរាចរណ៍ទាំងអស់ នៅតែអនុវត្តតួនាទី និងដាក់ពង្រាយឈរជើងតាមផ្លូវ ដើម្បីជួយសម្រួលចរាចរណ៍ជូនប្រជាពលរដ្ឋ។
ការសម្រេចដូច្នេះ អនុវត្តតាមបទបញ្ជារបស់លោកនាយឧត្តមសេនីយ៍ នេត សាវឿនអគ្គស្នងការនគរបាលជាតិ និងការណែនាំផ្ទាល់មាត់របស់លោកឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ ។
សារសំឡេងរបស់លោកឧត្តសេនយ៍ឯក ស ថេត លើកឡើងថា ក្នុងរយៈពេល១៥ថ្ងៃនេះ ឯកឧត្តម នេត សាវឿន ស្នើឲ្យការអនុវត្តច្បាប់ចរាចរណ៍ផ្លូវគោក ដែលអនុវត្តទៅលើអនុក្រឹត្យលេខ៣៩ សូមធ្វើការផ្អាកការផាកពិន័យ បណ្ដោះអាសន្នសិន ទាំងការពិនិត្យជាអាកុល នៅពេលយប់ ដោយរង់ចាំក្រោយថ្ងៃទី១៦ នឹងធ្វើការពិចារណាឡើងវិញ ។
លោកស្នងការបានបញ្ជាក់ថា ទោះបីត្រូវផ្អាកការផាកពិន័យជាបណ្ដោះអាសន្នមែន ប៉ុន្ដែមន្ដ្រីនគរបាលចរាចរណ៍ទាំងអស់ ត្រូវប្រចាំការនៅគោលដៅរបស់ខ្លួនដដែល ដើម្បីជួយសម្រួលចរាចរណ៍ជូនប្រជាពលរដ្ឋ ។
ការសម្រេចផ្អាកស្ទាក់ចាប់ផាកពិន័យលើអ្នកល្មើសច្បាប់ចរាចរណ៍នេះ អាចជាដំណឹងរីករាយរបស់ក្រុមអ្នកល្មើសច្បាប់ចរាចរណ៍មួយក្តាប់តូច ពិសេសក្រុមអ្នកផឹកស៊ីពេលយប់ជាដើម ។ ក៏ប៉ុន្តែផ្ទុយទៅវិញ ដំណឹងនេះ មិន មែនគួរតែរីករាយនោះឡើយ បើសិនជាអ្នកបើកបរយានយន្តទាំងឡាយ ភ្លេចខ្លួន ហើយបែរជាជិះសេះលែងដៃ លែងពាក់មួកសុវត្ថិភាព ពេលបើកបរ និងជិះម៉ូតូ ឬក៏បើកបរលឿនៗ ខ្វះការប្រុងប្រយ័ត្ន បូករួមទាំងផឹកស៊ីស្រវឹង ហើយនៅតែបើកម៉ូតូឡាននោះ ។
ការសម្រេចរបស់មេប៉ូលិស ផ្អាកមិនចាប់ផាកពិន័យអ្នកល្មើសច្បាប់ចរាចរណ៍រយៈពេលកន្លះខែនេះ ដើម្បីចូលរួមតាមអនុសាសន៍របស់សម្តេចតេជោ ជៀសវាងការកកស្ទះតាមផ្លូវ ពិសេសភ្លើងស្តុប ដែលជាវិធានការមួយ សម្រាប់កាត់បន្ថយ និងទប់ស្កាត់ការឆ្លងរាលដាលមេរោគកូវីដ១៩ ។
ដូច្នេះទោះបីជាប៉ូលិសមិនចាប់ មិនផាកពិន័យក៏ដោយ តែអ្នកធ្វើដំណើរតាមផ្លូវទាំងអស់ រាប់ទាំងអ្នកដើរ និងទាំងអ្នកជិះកង់ ត្រូវគោរពច្បាប់ចរាចរណ៍ដោយខ្លួនឯង ដើម្បីធានាសុវត្ថិភាពផង និងបង្ហាញពីសេចក្តីថ្លៃថ្នូរ សីលធម៌សង្គមដ៏ល្អរបស់ខ្មែរយើងផង ។ ម្យ៉ាងក៏កុំឲ្យធ្លាប់ខ្លួន ពេលប៉ូលិសចុះចាប់វិញ អ្នកចូលចិត្តល្មើសច្បាប់ចរាចរណ៍មួយក្តាប់តូច មិនព្រមឈប់ពេលភ្លើងស្តុបក្រហម ឬមិនពាក់មួកសុវត្ថិភាព ពេលជិះម៉ូតូជាដើម ច្បាស់ជាត្រូវខាតពេលផង និងត្រូវអស់លុយយ៉ាងច្រើនទៀត ។
មួយវិញទៀត ក៏សូមបងប្អូនប្រជាពលរដ្ឋយើងគ្រប់រូប ពិសេសអ្នកធ្វើដំណើរតាមផ្លូវរាល់ថ្ងៃ កុំភ្លេចថា កូវីដ មិនទាន់សម្លាប់នរណានៅប្រទេសយើងនៅឡើយទេ មកដល់ពេលនេះ ប៉ុន្តែគ្រោះថ្នាក់ចរាចរណ៍មួយថ្ងៃៗ ជាមធ្យមបានសម្លាប់មនុស្សមិនតិចជាង៥នាក់ហើយរបួសជាង១០នាក់ផ្សេងទៀត ។
និយាយដូច្នេះ មិនមែនថា មិនឲ្យបងប្អូនមិនខ្លាចកូវីដទេ ។ តែសូមឲ្យបងប្អូនជនរួមជាតិយើងទាំងអស់ខ្លាចគ្រោះថ្នាក់ចរាចរណ៍ឲ្យដូចខ្លាចកូវីដដែរ ព្រោះចូរកុំភ្លេចថា គ្រោះថ្នាក់ចរាចរណ៍ ក៏អាចកើតឡើងគ្រប់មនុស្សគ្រប់រូប គ្រប់ពេលវេលា គ្រប់ផ្លូវធ្វើដំណើរ បើសិនជាយើងម្នាក់ៗ មិនប្រុងប្រយ័ត្ន និងមិនគោរពច្បាប់ចរាចរណ៍ ។
ម្យ៉ាង បើយើងគោរពច្បាប់ហើយយើង ប្រុងប្រយ័ត្នហើយ តែបើអ្នកបើកបរយានយន្តផ្សេងទៀតធ្វេសប្រហែស និងមិនគោរពច្បាប់ចរាចរណ៍ ក៏មិនត្រឹមតែបង្កគ្រោះថ្នាក់ដល់ខ្លួនឯងទេ ថែមទាំងបង្កវិនាសកម្មដល់អ្នកផ្សេងថែមទៀតផង ៕ ដោយ៖ មុត ស្រីពៅ
ចែករំលែកព័តមាននេះ