រាជធានីភ្នំពេញ ៖ ដើម្បីឱ្យវិស័យសហគ្រាសធុនតូច និងមធ្យមនៅកម្ពុជា ហៅកាត់ថា SMEs ឱ្យមានការប្រកួតប្រជែងជាមួយប្រទេសក្នុងតំបន់ជាពិសេសប្រទេសជិតខាងនោះ រាជរដ្ឋាភិបាលបានជំរុញឱ្យសហគ្រិនក្នុងវិស័យនេះងាកមកផលិតនូវទំនិញដែលប្រើប្រាស់បច្ចេកវិទ្យាទំនើបចុងក្រោយ និងផលិតនូវទំនិញដែលមានស្ដង់ដារ និងគុណភាពស្របតាមស្តង់ដារអន្តរជាតិ…
រាជធានីភ្នំពេញ ៖ ដើម្បីឱ្យវិស័យសហគ្រាសធុនតូច និងមធ្យមនៅកម្ពុជា ហៅកាត់ថា SMEs ឱ្យមានការប្រកួតប្រជែងជាមួយប្រទេសក្នុងតំបន់ជាពិសេសប្រទេសជិតខាងនោះ រាជរដ្ឋាភិបាលបានជំរុញឱ្យសហគ្រិនក្នុងវិស័យនេះងាកមកផលិតនូវទំនិញដែលប្រើប្រាស់បច្ចេកវិទ្យាទំនើបចុងក្រោយ និងផលិតនូវទំនិញដែលមានស្ដង់ដារ និងគុណភាពស្របតាមស្តង់ដារអន្តរជាតិ ។
បើតាមឯកឧត្តម ចម ប្រសិទ្ធ ទេសរដ្ឋមន្ត្រី និងជារដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បានមានប្រសាសន៍ថា ក្នុងសម័យបច្ចេកវិទ្យារីកចម្រើន សហគ្រាសមិនអាចផលិតនូវទំនិញ ដោយប្រើបច្ចេកវិទ្យាដូចពីមុនបានទៀតទេ ព្រោះវាមិនអាចប្រកួតប្រជែងជាមួយប្រទេសដែលគេប្រើប្រាស់បច្ចេកវិទ្យាបាននោះទេ ។
ឯកឧត្តមរដ្ឋមន្ត្រីបានបន្តថា « នៅពេលបច្ចេកវិទ្យាកន់តែរីកចម្រើន គេត្រូវធ្វើអ្វីៗត្រូវការទៅតាមបច្ចេកវិទ្យាដូចគ្នា ដូច្នេះហើយរដ្ឋាភិបាលតែងតែយកចិត្តទុកដាក់ជាមួយនឹងវិស័យសហគ្រាសធុនតូច និងមធ្យមកម្ពុជា ដើម្បីឱ្យមានការធ្វើពិពិធកម្មពីមួយឆ្នាំទៅមួយឆ្នាំ » ។ ឯកឧត្តមបានមានប្រសាសន៍បន្ថែមទៀតថា កន្លងមករដ្ឋាភិបាលបានជួយដល់សហគ្រាសធុនតូចនិងមធ្យមតាមរយៈ ការធ្វើសិក្ខាសាលាបណ្ដុះបណ្ដាលនានា ដើម្បីឱ្យសហគ្រិនបានយល់ពី ការធ្វើពិពិធកម្ម ពីការអភិវឌ្ឍវិស័យនេះឱ្យទាន់នឹងប្រទេសជិតខាង ក៏ដូចជាទទួលបានអ្វីដែលថ្មីសម្រាប់អភិវឌ្ឍន៍សហគ្រាសរបស់ខ្លួន ។
លោកឧកញ៉ា សៀ ឬទ្ធី វិនិយោគិនខ្មែរមួយរូបដែលបានវិនិយោគលើបណ្ដុំសហគ្រាសធុនតូចនិងមធ្យមកម្ពុជាដើម្បីជួយអភិវឌ្ឍន៍វិស័យ SMEs បានឱ្យដឹងផងដែរថា បណ្ដុំសហគ្រាសធុនតូច និងមធ្យមកម្ពុជានឹងជួយដល់សហគ្រិនកម្ពុជា ក្នុងការអភិវឌ្ឍខ្លួនពីសហគ្រាសតូចទៅធំ ពីសហគ្រាសដែលមិនមានស្ដង់ដារទៅជាសហគ្រាសដែលមានស្តង់ដារ ហើយក៏មានភាពងាយស្រួលសម្រាប់រដ្ឋាភិបាលក្នុងការជួយដោះស្រាយបញ្ហាទាំងឡាយរបស់សហគ្រាសធុនតូចនិងមធ្យមផងដែរ។
លោកឧកញ៉ាបានបន្តថា សួនបណ្ដុំសហគ្រាសធុនតូច និងមធ្យមដែលនឹងជួយដល់សហគ្រិនក្នុងការអភិវឌ្ឍអាជីវកម្មនឹងរួចរាល់នៅចុងឆ្នាំ ២០២១ ហើយវាជាពេលវេលានិងឱកាសសម្រាប់សហគ្រិនអភិវឌ្ឍន៍អាជីវម្ម ខ្សែច្រវ៉ាក់ផលិតកម្ម ពង្រឹងគុណភាព សម្រាប់ប្រកួតប្រជែងជាមួយបណ្ដាប្រទេសជិតខាងបានផងដែរ ។
ចំណែកលោកបណ្ឌិត ម៉ី កល្យាណ ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិបានមានប្រសាសន៍ផងដែរថា វិស័យSMEs នៅកម្ពុជា មានអាយុកាលក្មេងខ្ចីនៅឡើយ បើធៀបនឹងបណ្ដាប្រទេសជិតខាងនិងពិភពលោក។ ជាក់ស្ដែងវិស័យ SMEs ប្រទេសខ្លះមានអាយុកាលជាង១០០ឆ្នាំ ខ្លះទៀតមានអាយុកាលកន្លះសតវត្សរ៍ តែគេនៅតែបន្តជំរុញការអភិវឌ្ឍវិស័យបន្តទៀត ដើម្បីឱ្យទាន់នឹងបច្ចេកវិទ្យារីកចម្រើន ។
លោកបណ្ឌិត បានមាននិយាយបន្តទៀតថា «វិស័យ SME គឺមានសារសំខាន់ណាស់ បើទោះបី ជាប្រទេសនោះរីកចម្រើនប៉ុនណាក៏គេនៅតែយកចិត្តទុកដាក់លើការអភិវឌ្ឍវិស័យនេះដែរ ។ ក្នុងនោះវិស័យសហគ្រាសធុនតូចនិងមធ្យមកម្ពុជា ក៏ត្រូវបានយកចិត្តទុកដាក់ពីរាជរដ្ឋាភិបាលដូចគ្នា មើលយើងមើលឃើញថា អ្វីដែលរដ្ឋាភិបាលនិងអ្នកពាក់ព័ន្ធកំពុងធ្វើនឹងអាចជំរុញឱ្យវិស័យសហគ្រាសធុនតូច និងមធ្យមកាន់តែមានសន្ទុះមួយកម្រិតទៀត » ។
លោកឧកញ៉ាតែ តាំងប៉រ ប្រធានសម្ព័ន្ធសហគ្រាសធុនតូច និងមធ្យមក៏បានឱ្យដឹងថា វិស័យសហគ្រាសធុនតូចនិងមធ្យម គឺពិតជាត្រូវការជួយជ្រោមជ្រែងពីគ្រប់ភាគី ទាំងរដ្ឋាភិបាល និងភាគីពាក់ព័ន្ធ ដើម្បីឱ្យវិស័យនេះមានសន្ទុះនិងបានចូលរួមចំណែកសេដ្ឋកិច្ចបន្ថែមទៀត ។
គួរបញ្ជាក់ថា វិស័យសហគ្រាសធុនតូចនិងមធ្យមកម្ពុជា កំពុងដើរតួនាទីសំខាន់ក្នុងការកសាងសេដ្ឋកិច្ច ដោយបានរួមចំណែកដល់ការផ្ដល់ការងារដល់ប្រជាពលរដ្ឋ ប្រាក់ចំណូល និងចំណូលសម្រាប់រដ្ឋផងដែរ ។ផលិតផលពីសហគ្រាសធុនតូចនិងមធ្យមក៏មានវត្តមានលើទីផ្សារកម្ពុជា និងលើទីផ្សារអន្តរជាតិជាច្រើនផងដែរ៕
ចែករំលែកព័តមាននេះ