ខេត្តកំពង់ឆ្នាំង ៖ ប្រជាកសិកររស់នៅក្នុងឃុំទឹកហូត ស្រុករលាប្អៀរ រីករាយសប្បាយចិត្ត ដោយសារតែបន្លែរបស់ពួកគាត់នៅមានតម្លៃថ្លៃល្អខុសពីឆ្នាំកន្លងទៅ បើទោះបីពេលនេះតម្លៃធ្លាក់ចុះបន្តិចមែន ប៉ុន្តែពួកគាត់នៅតែអាចទទួលយកបាន ហើយរំពឹងថា តម្លៃនឹងបន្តធ្លាក់ចុះជាងនេះបន្តិចទៀត នៅពេលប្រជាកសិករបានប្រមូលផលគ្រប់ៗគ្នាក៏ពួកគាត់នៅអាចទទួលយកបានដែរ ។
ជួបជាមួយភ្នាក់ងារកោះសន្តិភាព នៅព្រឹកថ្ងៃទី០១ ខែធ្នូ ឆ្នាំ២០២០ ស្ត្រីអ្នកធ្វើចំការឈ្មោះ ចាន់ អូន បាននិយាយឱ្យដឹងថា ថ្វីបើដីគាត់មានត្រឹម៣០អារ ក៏ពិតមែន តែគាត់បានជួលដីគេ ដើម្បីធ្វើចំការឱ្យធំ ។ ក្នុងចំការគាត់បានដាំបន្លែដូចជា ត្រសក់ ត្រឡាច សណ្តែកកួ ប៉ុន្តែបន្លែដែលគាត់ចាប់អារម្មណ៍ជាងគេ ព្រោះកំពុងមានទីផ្សារល្អ គឺដំណាំខ្ទឹម ដែលបច្ចុប្បន្នមានតម្លៃថ្លៃ៦ពាន់រៀល ក្នុង១គីឡូក្រាម ។
សម្រាប់ដំណាំខ្ទឹមរបស់គាត់ពេលនេះ មិនទាន់ប្រមូលផលក៏ពិតមែន តែគាត់សង្ឃឹមថា ៖ ពេលខ្ទឹមគាត់ប្រមូលផលអាចធ្លាក់ចុះដល់៥ពាន់រៀល ក្នុងមួយគីឡូក្រាម ក៏គាត់នៅតែអាចទទួលយកបានដែរ ។
បងប្រុសឈ្មោះ ប៉ាត សៅ មានទីលំនៅភូមិនាមទទឹង ឃុំទឹកហូត ស្រុករលាប្អៀរ ក៏បានបញ្ជាក់ដែរថា ៖ គាត់ជាអ្នកដាំខ្ទឹមនៅភូមិនេះយូរណាស់មកហើយ ថ្វីបើគាត់មិនបានចូលសហគមន៍បណ្ដុំបន្លែក៏ពិតមែន ប៉ុន្តែតម្លៃបន្លែរបស់ពួកគាត់នៅតែមានហាងឆេងល្អ ។
ជាក់ស្តែងខ្ទឹមគាត់ កាលពីទឹកឡើងថ្មីៗនេះ ខ្ទឹមរបស់គាត់អាចលក់បាន១ម៉ឺនរៀលក្នុងមួយគីឡូក្រាម ហើយក្រោយមកទើបតម្លៃធ្លាក់ចុះជាបន្តបន្ទាប់ រហូតបច្ចុប្បន្ននៅត្រឹម៦ពាន់៥រយរៀល គាត់នៅតែរីករាយសប្បាយចិត្ត ព្រោះតម្លៃនេះគាត់អាចទទួលយកបាន ហើយនៅពេលខាងមុខ ខណៈដែលខ្ទឹមកសិករធ្វើបានច្រើនគ្រប់ទីកន្លែង ខ្ទឹមអាចនឹងធ្លាក់ដល់៥ ពាន់រៀលក្នុងមួយគីឡូក្រាម ក៏គាត់នៅតែអាចទទួលយកបានដែរ ប៉ុន្តែកុំឱ្យតែចុះទាបជាងនេះ ។
យ៉ាងនេះក្តី បើតាមការបញ្ជាក់ពីលោក ងិន ហ៊ុន ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ឆ្នាំង បានឲ្យដឹងថា ៖ ជាការពិតណាស់ ដើមខ្ទឹមបានឡើងដល់ជាង ១ម៉ឺនរៀល កាលពីដើមខ្ទឹមអត់ គ្មានលក់ក្នុងទីផ្សារ ប៉ុន្តែពេលខ្លះខ្ទឹមបានចុះដល់ក្រោម ១ពាន់រៀលក្នុងមួយគីឡូក្រាមពេលដែលខ្ទឹមសំបូរពេក ហេតុនេះអាចនិយាយបានថា ៖ តម្លៃទីផ្សារមិនថេរនោះទេ ។ ដោយសារតែចង់រក្សាស្ថានភាព តម្លៃឱ្យស្ថិតស្ថេរ មន្ទីរកសិកម្មខេត្ត រៀបចំចងក្រងជាសហគមន៍បណ្ដុំ គឺប្រមូលផ្ដុំបន្លែ យកទៅដាក់លក់តែមួយកន្លែង ដើម្បីរក្សាតម្លៃឱ្យមានលំនឹង និងជាសវាងមានឈ្មួញ បន្តុះបង្អាប់ឲ្យតម្លៃថោក ។
ជាក់ស្តែងនៅភូមិត្រពាំងក្រពើ យើងបានបង្កើតសហគមន៍ ប្រមូលផ្តុំ ហើយដំណើរការបានជោគជ័យ ដល់សព្វថ្ងៃ ចំណែកអ្នកនៅភូមិនាមទទឹង ជាប់មាត់ទន្លេ ពួកគាត់មិនបានចូលសហគមន៍ក៍ពិតមែន តែពួកគាត់នៅឃុំជាមួយគ្នាដែលអាចទទួលចំហាយពីសហគមន៍នេះបានទើប បន្លែគាត់មានទីផ្សារល្អ ៕
ចែករំលែកព័តមាននេះ