រាជធានីភ្នំពេញ ៖ នៅថ្ងៃអាទិត្យ ទី១៤ មិថុនា ស្អែកនេះ កីឡាករជើងខ្លាំង២រូបគឺ ឆាំ រ៉ែម មកពីក្លិបព្រះខ័នរាជនៃកងរាជអាវុធហត្ថលើផ្ទៃប្រទេស និង ឆាយ មាស មកពីក្លិបសំរោងកោងកីឡាខេត្តបាត់ដំបង នឹងជួបគ្នានៅលើសង្វៀនស៊ីធីអិនក្នុងកម្មវិធីប្រដាល់ប្រចាំសប្តាហ៍របស់ស្ថានីយទូរទស្សន៍មួយនេះ។
រវាង ឆាំ រ៉ែម និង ឆាយ មាស សុទ្ធតែជាអ្នកប្រដាល់ជើងខ្លាំងដូចគ្នា និងធ្លាប់មានប្រវត្តិឡើងសង្វៀនរាប់ភ្លេច ទើបការជួបគ្នាលើកនេះមានការរំពឹងថា ពួកគេទាំងពីរនាក់នឹងធ្វើឱ្យកក្រើកសង្វៀនមិនខាន ។ តាមការសង្កេតការប្រកួតកន្លងមក ឆាំ រ៉ែម មានស្នៀតប្រយុទ្ធល្អទាំងផ្លែកែង និងផ្លែជង្គង់សុទ្ធតែអាចប្រើការបានយ៉ាងស្ទាត់ជំនាញ រីឯចិត្តក៏សឿងខ្លាំងណាស់ដែរ បុ៉ន្តែដោយសារមួយរយៈនេះគេបាត់មុខយូរ ទើបគេមិនហ៊ានអះអាងទុកមុនពីលទ្ធផលចុងក្រោយ ។
ចំណែក ឆាយ មាស ទោះបីមួយរយៈនេះមិនសូវឃើញលេចមុខនៅលើសង្វៀនឯរាជធានីភ្នំពេញ តែគេឃើញនៅសង្វៀនខេត្តជាយដែនជាញឹកញាប់ ។ ឆាយ មាស បើធ្វើការប្រៀបធៀបជាមួយ ឆាំ រ៉ែម គឺនៅស្ទើរភ្លើងខ្លាំងណាស់ ដោយសារស្នៀតប្រយុទ្ធរបស់គេមិនមានអ្វីគួរឱ្យបារម្ភទេ ។ ទោះបីយ៉ាងណា ឆាំ រ៉ែម មិនអាចមើលស្រាលការប្រកួតលើកនេះបានទេ ដោយសារ ឆាយ មាស តែងប្រែប្រួលវិជ្ជាគុនទៅតាមគូប្រកួតជានិច្ច បានន័យថា ជួបអ្នកខ្សោយគេក៏ខ្សោយ ជួបអ្នកខ្លាំងគេក៏ខ្លាំងមិនអាចធ្វេសប្រហែសបានឡើយ ។
ចាំមើល ឆាយ មាស អាចទប់ទល់ជាមួយ ឆាំ រ៉ែម បានប៉ុន្មានទឹក ។
នៅលើសង្វៀនដដែលក៏មានកីឡាករខ្លាំងៗជាច្រើនគូទៀតជួបគ្នាដូចជា ប្រាក់ រស្មី មកពីក្លិបតាឯកមានរិទ្ធខេត្តបាត់ដំបង ប្រកួតជាមួយ ផល សីហា មកពីក្លិបសុភានូមានជ័យ ។ ម៉ឺន មេឃា មកពីក្លិបកងយោធពលខេមរភូមិន្ទ ប្រកួតជាមួយ ស៊ិន រាជ មកពីក្លិបឃ្លាំងមឿងកីឡា ។ ម៉ន គឹមឡុង មកពីក្លិបការិយាល័យទី៥ កងទ័ពជើងគោក ប្រកួតជាមួយផន ភឿត មកពីក្លិបឃ្លាំងមឿងកីឡា ។ ភួង ពិសិដ្ឋ មកពីក្លិបខេត្តរតនគិរី ប្រកួតជាមួយ ម៉ន ខួច មកពីក្លិបការិយាល័យទី៥ កងទ័ពជើងគោក និង សិទ្ធ លីដា មកពីក្លិបសាមគ្គីកូនខ្មែរ ប្រកួតជាមួយ យ៉ាម វណ្ណា មកពីក្លិបរស្មីកុមារកំព្រា ៕
ចែករំលែកព័តមាននេះ