ខេត្តកណ្តាល ៖ ពលរដ្ឋនិយាយថា ទិញដីអស់លុយហើយឥឡូវគេតម្រូវឱ្យបង់លុយថ្លៃ
ធ្វើផ្លូវបេតុងទៀត ហើយបើពលរដ្ឋគ្មានលទ្ធភាពបង់ទេ ម្ចាស់គម្រោងពុះដីឡូត៍លក់នឹងដាក់គ្រឿងចក្រកាយផ្តាច់ផ្លូវចូលផ្ទះ ក្រោមលេសកាយយកលូ ។បញ្ហាបញ្ច្រាសស្រកីនេះ ពិតជាកំពុងធ្វើឱ្យមានការលាតត្រដាងមួយដោយសារតែការហួសចិត្ត ។
ការកាយយកលូគេអត់លុបដីវិញទេ គឺគេទុកចោលរាប់ខែ ធ្វើឱ្យពលរដ្ឋ២គ្រួសារ ក្នុងនោះ១គ្រួសារដែលគាត់មានមុខរបរលក់ដូរបន្តិចបន្តួចគ្រាន់ចិញ្ចឹមជីវិតជួបការលំបាកជាខ្លាំង ជាពិសេសនៅពេលមានភ្លៀងធ្លាក់ម្តងៗទឹកដក់បែកភក់ធុំក្លិនស្អុយសាយភាយ គ្មានភ្ញៀវឯណាហ៊ានមកអង្គុយហូបអាហារឡើយ ។ ដោយមិនអាចទ្រាំទ្របាន គាត់បានចំណាយលុយផ្ទាល់ខ្លួនចាក់បេតុងទំហំ៣ម៉ែត្រគុណនឹង៤ម៉ែត្រសម្រាប់ធ្វើផ្លូវដើរចូលផ្ទះ ក៏ត្រូវម្ចាស់គម្រោងពុះដីឡូត៍នោះឈូសបំផ្លាញចោលអស់ដែរ ។
កត្តានេះធ្វើឱ្យពួកគាត់ជួបនូវវិបត្តិជីវភាពគ្រួសារប្រចាំថ្ងៃយ៉ាងធ្ងន់ធ្ងរ ពិសេសបញ្ហាប្រឈមនឹងការខ្វះលុយបង់ធនាគារឯកជនទៀតផង ។ ពលរដ្ឋដែលកំពុងប្រឈមនឹងការលំបាកនេះ បានសំណូមពរសូមឱ្យអាជ្ញាធរស្រុក ខេត្ត មេត្តាជួយសម្របសម្រួលដោះស្រាយជូនពួកគាត់ឱ្យរស់នៅបានសុខស្រួលផង ។
គម្រោងពុះដីឡូត៍លក់នេះ មានទីតាំងស្ថិតនៅក្នុងភូមិអង្គរជ័យ ឃុំបន្ទាយដែក ស្រុកកៀនស្វាយ គ្រប់គ្រងដោយឈ្មោះ លី ហេង និងឈ្មោះ តាឌី ដោយនៅក្នុងគម្រោងបានដាក់ថាមានផ្លូវបេតុង៨ម៉ែត្រទៅ៩ម៉ែត្រ មានផ្សារ មានប្រព័ន្ធទឹក ភ្លើងរដ្ឋ ប្រព័ន្ធលូ ជូនអតិថិជន ទៀតផង ។
ផ្ទុយទៅវិញ វាគ្រាន់តែជាការបោកប្រាស់ អតិថិជនប៉ុណ្ណោះ អ្នកខ្លះខំខ្ចីបុលគេយកមកទិញដីឡូត៍អស់លុយមួយវគ្គហើយ ស្រាប់តែម្ចាស់គម្រោងនេះតម្រូវឱ្យពួកគាត់បង់លុយថ្លៃផ្លូវបេតុងតាមក្បាលដី១ឡូត៍ប្រវែង៥ម៉ែត្រ បង់៥៧០ដុល្លារថែមទៀត ។បើតាមប្រភពខ្លះនិយាយថា គ្រាន់តែការតទឹកចូលផ្ទះក៏បង់ថ្លៃសេវាអស់២០០ដុល្លារដែរ។
គួរបញ្ជាក់ថា ម្ចាស់គម្រោងពុះដីឡូត៍លក់ខាងលើនេះ តាមការពិនិត្យមើលឃើញជាក់ស្តែង ក្រៅពីចាក់ផ្លូវបេតុងដើម្បីផលប្រយោជន៍ខ្លួនឯងហើយនោះ ពុំមានឃើញធ្វើការអភិវឌ្ឍអ្វីសោះដោយទុកដីចោលដុះសុទ្ធតែព្រៃចង់លិចក្បាលទៅហើយ ។ ឥឡូវប្រជាពលរដ្ឋមួយចំនួនដែលជ្រុលទៅទិញដីក្នុងគម្រោងនេះ មានខ្លះចាប់ផ្តើមដាក់លក់វិញបណ្តើរៗហើយ បើទោះបីជាខាតឬចំណេញបានបន្តិចបន្តួចក៏ដោយ ក៏ត្រូវតែបង្ខំចិត្តលក់ដែរ ដោយសារតែអស់ទំនុកចិត្តលើម្ចាស់គម្រោងដែលនិយាយបាតដៃខ្នងដៃ ។
មានពលរដ្ឋខ្លះលក់ខាតហើយត្រូវម្ចាស់គម្រោងនេះ តាមកាត់លុយថ្លៃផ្លូវបេតុងអស់២.០០០ដុល្លារទៅ៣.០០០ដុល្លារថែមទៀត បើមិនឱ្យគេកាត់ថ្លៃផ្លូវទេ ដាច់ខាតម្ចាស់គម្រោងមិនឱ្យលក់ឡើយ ។ពលរដ្ឋទាំងនោះបញ្ជាក់ថា គម្រោងដីឡូត៍លក់នេះ បានដំណើរការប្រហែល៣ឆ្នាំហើយ តែសម្រាប់ពួកគាត់២គ្រួសារនេះទើបមកទិញស្នាក់នៅប្រហែល២ឆ្នាំ ដោយ១ឡូត៍ក្បាលដីទទឹង៥ម៉ែត្រ បណ្តាយ២០ម៉ែត្រ តម្លៃ៥.០០០ដុល្លារ។
ចំពោះរឿងនេះ ពលរដ្ឋបានដាក់ពាក្យបណ្តឹងទៅសាលាឃុំបន្ទាយដែកចំនួន៣លើកហើយ តែភាគីខាងម្ចាស់គម្រោងដីឡូត៍ឈ្មោះ លី ហេង និងតាឌី មិនព្រមចូលខ្លួនដោះស្រាយតាមការអញ្ជើញរបស់អាជ្ញាធរឃុំឡើយ ដោយឱ្យតំណាងចូលហើយឆ្លើយរបៀបមិនទទួលខុសត្រូវថា បើមិនឱ្យលុយថ្លៃផ្លូវបេតុងម្នាក់៥៧០ដុល្លារទេ គេមិនឱ្យធ្វើផ្លូវចូលផ្ទះឬចាក់ដីមុខផ្ទះទេ ។
ជុំវិញករណីនេះ ចាត់ទុកជាសារមួយឱ្យបានដឹងដល់អាជ្ញាធរនិងមន្ត្រីជំនាញពាក់ព័ន្ធនៃខេត្តកណ្តាល និងក្រសួង សូមចុះមកត្រួតពិនិត្យមើលទីតាំងពុះដីឡូត៍លក់នេះថា តើមានច្បាប់ឬក៏អត់ច្បាប់ ? មានច្បាប់តើម្ចាស់គម្រោងត្រូវទទួលខុសត្រូវលើអ្វីខ្លះជូនអតិថិជន ដើម្បីឱ្យមានចំណូលចូលថវិកាជាតិផង និងជួយសម្រួលបញ្ចៀសកុំឱ្យប្រជាពលរដ្ឋដែលខ្លីលុយធនាគារឯកជនយកមកទិញដីក្នុងគម្រោងនេះកាន់តែវ័ណ្ឌក ។
ពាក់ព័ន្ធនឹងបញ្ហាខាងលើនេះ លោក ងិន ណឹម មេឃុំបន្ទាយដែក បានប្រាប់តាមទូរស័ព្ទកាលពីថ្ងៃទី២៦ ខែវិច្ឆិកា ឆ្នាំ២០២០ថា បើចង់ដឹងសួរទៅម្ចាស់គេ ព្រោះឃុំទទួលពាក្យបណ្តឹងពីពលរដ្ឋ៣ដងហើយ តែហៅខាងម្ចាស់គម្រោងគេមិនចូលខ្លួនដោះស្រាយទេ ។
ចំណែកលោក សុខ ពិសិទ្ធ អភិបាលរងស្រុកកៀនស្វាយ ថ្លែងថា គម្រោងដីឡូត៍នេះរូបលោកពុំបានដឹងច្បាស់ថា គេមានច្បាប់ឬអត់ច្បាប់នោះទេ បើចង់ដឹងច្បាស់សួរទៅខាងសុរិយាដី ។ ប៉ុន្តែខាងសុរិយាដីស្រុក ភ្នាក់ងារយើងមិនអាចទាក់ទងសុំការបំភ្លឺបានទេ រីឯភាគីខាងម្ចាស់គម្រោងពុះដីឡូត៍លក់ ក៏មិនអាចទាក់ទងសុំការបំភ្លឺបានដែរ ៕
ចែករំលែកព័តមាននេះ