ព្រឹត្តិការណ៍សហគមន៍ ២៨ វិច្ឆិកា ៖ មនុស្ស១៤នាក់ហើយរកឃើញមានជំងឺកូវីដ១៩
- សៀមរាប
ខេត្តសៀមរាប ៖ សម្តេចតេជោ ហ៊ុន សែន បានថ្លែងនៅព្រឹកថ្ងៃទី៣០ ខែវិច្ឆិកា ឆ្នាំ២០២០ ពីក្រុងសៀមរាបថា លទ្ធផលធ្វើតេស្តរកមេរោគកូវីដ១៩…
ខេត្តសៀមរាប ៖ សម្តេចតេជោ ហ៊ុន សែន បានថ្លែងនៅព្រឹកថ្ងៃទី៣០ ខែវិច្ឆិកា ឆ្នាំ២០២០ ពីក្រុងសៀមរាបថា លទ្ធផលធ្វើតេស្តរកមេរោគកូវីដ១៩ ក្នុងព្រឹត្តិការណ៍២៨ វិច្ឆិកា បានបង្ហាញថា សរុបមនុស្ស១៤នាក់ហើយ ដែលបានរកឃើញមានជំងឺកូវីដ១៩ បន្ទាប់ពីរកឃើញចំនួន៦ករណីបន្ថែមទៀត ។ អ្នកធ្វើតេស្តពាក់ព័ន្ធ «ព្រឹត្តិការណ៍សហគមន៍២៨វិច្ឆិកា» នៅទូទាំងប្រទេស មានចំនួន៣,៣៣២សំណាក មកពី៧ខេត្ត ។
សម្តេចតេជោ ថ្លែងបញ្ជាក់ថា ប្រតិបត្តិការទប់ស្កាត់កូវីដ១៩ បានធ្វើលឿន ហើយក្នុងទ្រង់ទ្រាយធំ តែកន្លែងខ្លះមិនទាន់លឿននៅឡើយទេ ។
សម្តេចតេជោ បានមានប្រសាសន៍ថា «មកដល់ពេលនេះវាមានចំនួន១៤ករណី ហើយប្រសិនបើ ត្រូវបានអះអាងថា ទៅពីខេត្តសៀមរាបជាករណីឆ្លងមួយទៀត (កូនស្រីលោក ឆែម សាវុធ) គឺនឹងមានចំនួន១៥ករណី ប៉ុន្ដែសំណាកទើបនឹងធ្វើតេស្ដបានចំនួន២,២៤៧សំណាក់ ក្នុងចំណោម៣,៣៣២សំណាក់ ។
ថ្ងៃនេះនឹងយកសំណាក ជាង២ពាន់សំណាកបន្ថែមទៀត ក្នុងនោះតែនៅផ្សារអ៉ីអន១ ជាង១ពាន់សំណាក, ធ្វើនៅក្រសួងមហាផ្ទៃ និងធ្វើនៅកន្លែងដែលកូនចៅរបស់ឯកឧត្តម ឆែម សាវុធ បានទៅដល់រាប់ទាំងនៅកោះពេជ្រជាដើម» ។
សូមបញ្ជាក់ ៖ គិតត្រឹមម៉ោង៧និង០០នាទីព្រឹកថ្ងៃទី៣០ ខែវិច្ឆិកានេះ អ្នកជាសះស្បើយមានសរុបមានចំនួន៣០១នាក់ និងមានអ្នកវីរុសកូវីដ១៩ មានចំនួន៣២៣នាក់ ហើយអ្នកកំពុងតែសម្រាកនៅមន្ទីរពេទ្យមិត្តភាពខ្មែរសូវៀត មានចំនួន១៩នាក់ និងអ្នកកំពុងតែសម្រាកនៅមណ្ឌលអង្រែ រាជធានីភ្នំពេញ មានចំនួន ៣នាក់ ៕
ចែករំលែកព័តមាននេះ