AP ផ្សាយថា អង្គការសិក្សាស្រាវជ្រាវវិទ្យាសាស្ត្រ និងវប្បធម៌នៃអង្គការសហប្រជាជាតិ (UNESCO) បានសម្រេចនៅក្នុងកិច្ចប្រជុំក្រុងប៉ារីស ប្រទេសបារាំង កាលពីថ្ងៃទី១០ មិថុនា ២០១៥ ចុះបញ្ជីបឹង
AP ផ្សាយថា អង្គការសិក្សាស្រាវជ្រាវវិទ្យាសាស្ត្រ និងវប្បធម៌នៃអង្គការសហប្រជាជាតិ (UNESCO) បានសម្រេចនៅក្នុងកិច្ចប្រជុំក្រុងប៉ារីស ប្រទេសបារាំង កាលពីថ្ងៃទី១០ មិថុនា ២០១៥ ចុះបញ្ជីបឹង «អីុនឡេ» (Inle) ជាតំបន់អភិរក្សជីវសាស្ត្រ និងចាត់ទុកថាជាបេតិកភណ្ឌដំបូងរបស់មីយ៉ាន់ម៉ា ។
នៅក្នុងកិច្ចប្រជុំបានពិចារណាពីប្រព័ន្ធជីវសាស្ត្រចម្រុះ រួមទាំងការរស់នៅរួមគ្នារវាងអ្នកស្រុក និងធម្មជាតិ ក្នុងគោលបំណងដើម្បីអភិរក្សប្រព័ន្ធការរស់នៅ និងទ្រទ្រង់ដល់ការអភិវឌ្ឍផ្នែកសេដ្ឋកិច្ចដ៏យូរអង្វែង ។
បច្ចុប្បន្នតំបន់អភិរក្សប្រព័ន្ធជីវសាស្ត្រចម្រុះនៅទូទាំងពិភពលោក មានប្រហែល៦៣០កន្លែង ចំណែកបឹង «អីុនឡេ» មានទីតាំងស្ថិតនៅរដ្ឋឆាន ភាគខាងកើតប្រទេស ដោយមានក្រឡាផ្ទៃ៤៨០.០០០ហិកតា គឺជាទីជម្រករបស់បក្សីជាច្រើនប្រភេទ រួមទាំងត្រី និងសត្វព្រៃជាច្រើនទៀត ។ អ្នកស្រុកបានទាញប្រយោជន៍ពីផ្ទៃដីក្នុងការធ្វើកសិកម្ម និងនេសាទ ដោយមានលក្ខណៈលេចធ្លោ ពិសេសគឺធ្វើសួនបណ្តែតទឹក។ ចំណែកអ្នកនេសាទមានរូបភាពនៃការចាប់ត្រីខុសប្លែកពីគេ គឺប្រើជើងម្ខាងសម្រាប់ចែវទូក ។
ដោយសារសំបូរដោយធនធានធម្មជាតិ ធ្វើឱ្យបឹង «អីុនឡេ» ក្លាយជាផ្នែកមួយនៃប្រភពទេសចរណ៍ដ៏សំខាន់របស់មីយ៉ាន់ម៉ា ប៉ុន្តែក្នុងអំឡុងពេលជាច្រើនឆ្នាំកន្លងមកបឹង «អីុនឡេ» ជួបនឹងគ្រោះរាំងស្ងួតធ្ងន់បង្កឱ្យកម្រិតទឹកធ្លាក់ចុះ ក្លាយជាឧបសគ្គក្នុងការធ្វើចរាចរតាមផ្លូវទឹក និងប៉ះពាល់ដល់ជីវិតរបស់សត្វ ។ អ្នកជំនាញបញ្ជាក់ថា ផលប៉ះពាល់នោះបានកើតឡើងដោយសារបម្រែបម្រួលអាកាសធាតុនៅលើពិភពលោក និងការកាប់បំផ្លាញព្រៃឈើ ៕
ចែករំលែកព័តមាននេះ