រាជធានីភ្នំពេញ ៖ អាជ្ញាធររាជធានីភ្នំពេញ និងមន្ទីរសុខាភិបាលរាជធានីភ្នំពេញ បានបង្ហាញពីការមិនពេញចិត្ត ដោយធ្វើការព្រមានត្រង់ៗទៅលើម្ចាស់គ្លីនិកឯកជនក្នុងរាជធានីភ្នំពេញមួយចំនួនដែលមិនព្រមអនុវត្ត
រាជធានីភ្នំពេញ ៖ អាជ្ញាធររាជធានីភ្នំពេញ និងមន្ទីរសុខាភិបាលរាជធានីភ្នំពេញ បានបង្ហាញពីការមិនពេញចិត្ត ដោយធ្វើការព្រមានត្រង់ៗទៅលើម្ចាស់គ្លីនិកឯកជនក្នុងរាជធានីភ្នំពេញមួយចំនួនដែលមិនព្រមអនុវត្តតាមការណែនាំរបស់ក្រសួងសុខាភិបាលស្ដីពីការហាមឃាត់មិនឲ្យរថយន្តគិលានសង្គ្រោះគ្លីនិកឯកជនដឹកអ្នករងរបួសដោយគ្រោះថ្នាក់ចរាចរតាមដងផ្លូវ ។
ក្នុងកិច្ចប្រជុំជាមួយមន្ត្រីក្រោមឱវាទ សាលារាជធានីភ្នំពេញ នាព្រឹកថ្ងៃទី១១ មិថុនា ២០១៥ លោកសាស្ត្រាចារ្យ សុខ សុគន្ធ នាយកមន្ទីរសុខាភិបាលបានអំពាវនាវឲ្យមានកិច្ចសហការជាទូទៅក្នុងការទប់ស្កាត់មិនឲ្យមានរថយន្តគិលានសង្គ្រោះរបស់គ្លីនិកឯកជនចេញទៅដឹកជនរងគ្រោះដោយគ្រោះថ្នាក់ចរាចរទៀតទេ បើនៅតែមានទៀត មន្ទីរនឹងចាត់វិធានការផ្លូវច្បាប់ធ្ងន់ធ្ងរចំពោះអ្នករឹងរូសមិនអនុវត្តតាមលិខិតណែនាំលេខ០៤៩របស់ក្រសួងសុខាភិបាល ។
លោកបានបញ្ជាក់ថា រថយន្តគិលានសង្គ្រោះរបស់គ្លីនិកឯកជនមិនមានបំពាក់ឧបករណ៍បរិក្ខារពេទ្យឲ្យបានគ្រប់គ្រាន់នោះទេ ដូច្នេះជនរងគ្រោះអាចនឹងស្លាប់មុនទៅដល់មន្ទីរពេទ្យ ចំណែកឯតំលៃសេវាក៏ថ្លៃទៀត ។ ជាបទពិសោធន៍កន្លងមក គ្លីនិកឯកជនខ្លះបង្ខំឲ្យអ្នករបួសយកប្លង់ផ្ទះទៅបញ្ចាំ ដើម្បីបានប្រាក់មកឲ្យថ្លៃព្យាបាល ហើយបើលំបាកពេកយកមកបញ្ចាំនៅគ្លីនិករបស់ខ្លួនតែម្តងក៏បាន អំពើបែបនេះ មិនខុសអ្វីទៅនឹងអំពើចាប់ជំរិតដែលអសិលធម៌នោះទេ ។
ចំណែកលោកប៊ុន សេរី អភិបាលរងរាជធានីភ្នំពេញទទួលបន្ទុកសុខាភិបាលបានឲ្យដឹងថា ក្នុងរយៈពេលកន្លងមកអាជ្ញាធររាជធានីភ្នំពេញ ក៏ដូចមន្ទីរ និងក្រសួងសុខាភិបាល មានការណែនាំច្រើនដងមកហើយ ល្មមដល់ពេលត្រូវរឹតបន្តឹងវិធានការច្បាប់ចាប់ពីពេលនេះតទៅហើយ ៕
ចែករំលែកព័តមាននេះ