ការវាយប្រហារអត្តឃាតមួយដែលអាចសម្លាប់មនុស្សរង្គាលត្រូវបានប៉ូលិសអេហ្ស៊ីបរារាំងកាលពីថ្ងៃទី១០ មិថុនា ក្នុងព្រះវិហារ KARNAK ក្រុង LOUXOR ដែលនោះជាការវាយប្រហារលើកទី២ សំដៅលើពួកអ្នកទេសចរក្នុងប្រទេសអេហ្ស៊ីប ចាប់តាំងពីកងទ័ពផ្តួលរំលំប្រធានាធិបតីអ៊ិស្លាមនិយមលោកម៉ូហាម៉េដ ម័រស៊ី ពីឆ្នាំ២០១៣ មក ។
ការវាយប្រហារភេរវកម្មកើតមានញឹកញាប់នៅអេហ្ស៊ីបចាប់តាំងពីការផ្តួលរំលំលោកម័រស៊ី មក ប្រព្រឹត្តដោយបណ្តាក្រុមជីហាដជាការសងសឹកចំពោះការបង្ក្រាបយ៉ាងបង្ហូរឈាមលើពួកអ្នកគាំទ្រក្រុមទាំងនេះ ។ ការវាយប្រហារទាំងនោះមកទល់បច្ចុប្បន្នតែងសំដៅលើកងកម្លាំងសន្តិសុខ ។
ការវាយប្រហារកាលពីថ្ងៃទី១០ មិថុនា ទោះពុំទាន់មានការប្រកាសទទួលខុសត្រូវ តែពួកអ្នកជំនាញការយល់ថា ពួកជីហាដបានផ្លាស់ប្តូរយុទ្ធសាស្ត្រ ហើយពេលនេះសំដៅលើពួកបរទេសពេលដែលរដ្ឋអំណាចថ្មីប៉ុនប៉ងទាក់ទាញពួកអ្នកទេសចរ និងពួកអ្នកវិនិយោគអន្តរជាតិដែលលែងសូវមកអេហ្ស៊ីបចាប់តាំងពី៤ឆ្នាំមកហើយ ។
នាព្រឹកព្រលឹមមនុស្ស៣នាក់បានជិះរថយន្តតាក់ស៊ីមួយមកឈប់ត្រង់ប៉ុស្តិ៍ត្រួតពិនិត្យត្រង់ច្រកចូលកន្លែងចតរថយន្តនៃព្រះវិហារ KARNAK ជាទីតាំងល្បីល្បាញបំផុតមួយរបស់អេហ្ស៊ីបសម័យកាលហ្វារ៉ាអុង ។ ប៉ូលិសម្នាក់ដែលស្លៀកពាក់ស៊ីវិលសង្ស័យលើមនុស្សទាំង៣នាក់នោះ ហើយបង្ខំឱ្យរថយន្តឈប់ ។ ភ្នាក់ងារប៉ូលិសបានបើកគូទរថយន្ត ហើយប្រទះឃើញថង់ធំ២ ។ ពេលប៉ូលិសឱ្យបើកថង់ទាំងនោះ បុរសម្នាក់ក្នុងចំណោមបុរសទាំង៣នាក់បានរត់គេច ហើយធ្វើឱ្យគ្រឿងផ្ទុះដាក់ជាប់ចង្កេះរបស់គេផ្ទុះឡើង ។ ចំណែកបុរស២នាក់ទៀតបានបើកថង់ហើយទាញយកកាំភ្លើងវាយលុក ។ ភ្លាមៗប៉ូលិសបានបាញ់ប្រហារសម្លាប់បុរសម្នាក់ ហើយម្នាក់ទៀតរបួសធ្ងន់ត្រង់ក្បាល។ អ្នកបើករថយន្តតាក់ស៊ីហាក់ដូចពុំមែនមនុស្សរួមដៃឡើយ ។ ប៉ូលិស២នាក់ និងជនស៊ីវិល២នាក់ត្រូវរបួសស្រាល ។ ក្រៅពីកាំភ្លើងវាយលុក២ដើម ប៉ូលិសរកឃើញបង់គ្រាប់ដែលមានគ្រាប់ពេញដល់ទៅ១៩ ក្នុងថង់ទាំងពីរ ។ ឧត្តមសេនីយ៍ប៉ូលិសក្រុង LOUXOR និយាយថា បើអ្នកទាំងនេះអាចចូលដល់ក្នុងព្រះវិហារនោះ ព្រះវិហារនេះនឹងក្លាយទៅជាទីលានសម្លាប់រង្គាលមួយមិនខាន ។
យោងតាមប៉ូលិសថា នាឱកាសនោះនៅព្រះវិហារ KARNAK មានអ្នកទេសចរដល់ទៅ៦០៤នាក់ ។
មានការវាយប្រហារអត្តឃាតមួយកាលពីខែកុម្ភៈ ឆ្នាំ២០១៤ នៅតំបន់ស៊ីណៃអីុ ស្លាប់អ្នកទេសចរជនជាតិកូរ៉េខាងត្បូង៣នាក់ និងអ្នកបើករថយន្តបឺសដឹកពួកគេ ។
ការវាយប្រហារសំដៅលើពួកបរទេសពិតជាកម្រមានចាប់តាំងពីខែកុម្ភៈ ឆ្នាំ២០០៩មក ពេលគ្រាប់បែកដៃមួយគ្រាប់ផ្ទុះសម្លាប់នារីជនជាតិបារាំងម្នាក់ក្នុងមជ្ឈមណ្ឌលប្រវត្តិសាស្ត្រក្រុងគែរ ។ ក៏ប៉ុន្តែក្នុងទសវត្សឆ្នាំ១៩៩០ មានការវាយប្រហារភេរវកម្មមួយចំនួនសំដៅលើពួកអ្នកទេសចរ ដែលធ្វើឱ្យប៉ះពាល់ខ្លាំងដល់សេដ្ឋកិច្ចអេហ្ស៊ីប ដោយទេសចរណ៍ជាផ្នែកសំខាន់មួយនៃសេដ្ឋកិច្ចប្រទេសនេះ ។
ក្នុងខែវិច្ឆិកា ឆ្នាំ១៩៩៧ ជនជីហាដ៦នាក់បានសម្លាប់ក្នុងទីក្រុង LOUXOR នូវជនជាតិស្វ៊ីស៣៥នាក់ អង់គ្លេស៦នាក់ អាល្លឺម៉ង់៤នាក់ កូឡុំប៊ី២នាក់ ជនជាតិជប៉ុន១១នាក់ និងជនជាតិអេហ្ស៊ីប៤នាក់ ៕
ចែករំលែកព័តមាននេះ