កន ចន្ថា និងម៉ន សាម៉េត ជួបកីឡាករថៃលើកនេះមួយណាសម្រេចគោលដៅ ?
រាជធានីភ្នំពេញ ៖ នៅយប់ថ្ងៃសៅរ៍ ទី១៣ មិថុនា កីឡាករកន ចន្ថា មកពីសមាគមកីឡាប្រដាល់ក្រសួងការពារជាតិ និងកីឡាករម៉ន សាម៉េត មកពីក្លិបការិយាល័យទី៥ កងទ័ពជើងគោក
រាជធានីភ្នំពេញ ៖ នៅយប់ថ្ងៃសៅរ៍ ទី១៣ មិថុនា កីឡាករកន ចន្ថា មកពីសមាគមកីឡាប្រដាល់ក្រសួងការពារជាតិ និងកីឡាករម៉ន សាម៉េត មកពីក្លិបការិយាល័យទី៥ កងទ័ពជើងគោក នឹងជួបកីឡាករថៃនៅលើសង្វៀនស៊ីធីអិន ។
ការប្រកួតនៅយប់នោះ កីឡាករកន ចន្ថា នឹងជួបប្រកួតជាមួយកីឡាករថៃ ឈោកឆៃ សរការ៉ាវ៉េត ក្នុងឋានៈជាគូដណ្តើមខ្សែក្រវាត់ក្រុមហ៊ុនភេសជ្ជៈគោជល់ក្នុងប្រភេទទម្ងន់៦៤គីឡូក្រាម ។ ចំណែកកីឡាករម៉ន សាម៉េត ជួបប្រកួតជាមួយកីឡាករថៃ ពើមពូន ថៃរុងរឿង ក្នុងនាមជាគូមិត្តភាពក្នុងប្រភេទទម្ងន់៥១គីឡូក្រាម ។
នៅក្នុងព្រឹត្តិការណ៍ប្រដាល់ដណ្តើមខ្សែក្រវាត់គោជល់ខាងលើនេះ កីឡាករថៃ ឈោកឆៃ សរការ៉ាវ៉េត ប្រកួតបាន២លើកឈ្នះទាំង២លើក ទើបលើកនេះគេត្រូវការឈ្នះមួយប្រកួតទៀតដើម្បីទទួលបានឱកាសឡើងទៅប្រកួតនៅវគ្គបន្ត ។ រីឯ កន ចន្ថា ដែលប្រកួតបាន៣លើកឈ្នះទាំង៣លើកនោះបានឡើងទៅប្រកួតនៅវគ្គពាក់កណ្តាលផ្តាច់ព្រ័ត្រជាបន្តដោយស្វ័យប្រវត្តិ ទោះបីលើកនេះចាញ់ ក៏គ្មានបញ្ហាសម្រាប់រូបគេដែរ ។ យ៉ាងណាក៏ដោយ កីឡាកររូបនេះនៅតែត្រូវការជ័យជម្នះដើម្បីរក្សាកេរ្តិ៍ឈ្មោះជាអ្នកប្រដាល់ជើងខ្លាំងនៅក្នុងពិភពប្រដាល់កម្ពុជាដដែល ។ តាមការសង្កេតការប្រកួតកន្លងមក កីឡាករឈោកឆៃ សរការ៉ាវ៉េត ពិតជាមានសមត្ថភាពខ្លាំងមិនធម្មតាទាំងកាយកាយសម្បទា ក៏អំណោយផលទៀត។ កីឡាករថៃរូបនេះចេះប្រើគ្រប់ស្នៀត ជាពិសេសស្នៀតកែង និងជង្គង់ ពេលវាយចេញម្តងៗបង្កគ្រោះថ្នាក់ខ្លាំងណាស់ ជាក់ស្តែងកន្លងមកគេបានយកឈ្នះជើងខ្លាំង ផាន់ គ្រាន់ មកពីក្លិបគជសារកីឡាដោយពិន្ទុយ៉ាងងាយ ។ ដូច្នេះ កន ចន្ថា ទោះបីខ្លាំងបុ៉នណា ក៏មិនត្រូវធ្វេសប្រហែស ឬមើលស្រាលកីឡាករថៃរូបនេះដែរ បើមិនដូច្នោះទេច្បាស់ជាទទួលការអាម៉ាស់មិនខាន ។ នៅក្នុងពូល B ក្នុងចំណោមអ្នកប្រដាល់ថៃទាំង៤រូប គឺមានតែកីឡាករឈោកឆៃ សរការ៉ាវ៉េត ម្នាក់បុ៉ណ្ណោះដែលមានពិន្ទុច្រើនជាងគេ ។ ដោយឡែកពូល A ក្រៅពី កន ចន្ថា នៅមាន ផល សោភ័ណ្ឌ មកពីក្លិបតាឡីដំរីមានរិទ្ធ ដែលមានពិន្ទុច្រើនដូចគ្នា ។ រីឯ ផាន គ្រាន់ ដែលប្រកួត៣លើក ឈ្នះ១ ចាញ់២លើក និង ទេស សំខាន់ មកពីក្លិបកងពលតូចលេខ៧០ ដែលចាញ់ទាំង៣លើកនោះមានតែផ្លូវធ្លាក់ត្រឡប់ទៅផ្ទះវិញប៉ុណ្ណោះ ។
ក្រៅពីគូដណ្តើមខ្សែក្រវាត់មួយគូនេះទៅនៅមានគូប្រកួតជាលក្ខណៈមិត្តភាពចំនួន៣គូទៀត ហើយគូដែលគេចាប់អារម្មណ៍ជាងគេ គឺការជួបគ្នារវាងកីឡាករម៉ន សាម៉េត និងកីឡាករថៃ ពើមពូន ថៃរុងរឿង ដែលទើបតែប្រកួតឈ្នះកីឡាករ ហែល វ៉ា មកពីក្លិបឃ្លាំងមឿងកីឡា កាលពីថ្ងៃសៅរ៍សប្តាហ៍មុន ។ គណៈកម្មការរៀបចំការប្រកួតបានសម្រេចដាក់ ម៉ន សាម៉េត មកពីក្លិបការិយាល័យទី៥ កងទ័ពជើងគោកឱ្យប្រកួតសងសឹកជំនួស ហែល វ៉ា ប៉ុន្តែគេមិនដឹងថា ម៉ន សាម៉េត មានសមត្ថភាពអាចសម្រេចគោលដៅបានឬយ៉ាងណាទេ មានតែរង់ចាំមើលការប្រកួតជាក់ស្តែងប៉ុណ្ណោះទើបអាចដឹងបាន។ ២គូចុងក្រោយតម្រូវទៅលើកីឡាករកំពែង ខ្មៅ មកពីក្លិបអប្សរាគុនខ្មែរ ប្រកួតជាមួយកីឡាករឡុង បញ្ញា មកពីក្លិបសាលវ័ន្តកីឡា និងកីឡាកររិទ្ធ ប្រាក់ប៊ិន មកពីក្លិបកងពលតូចលេខ៧០ ប្រកួតជាមួយកីឡាករសង គង់ មកពីក្លិបអេភូថងកីឡា ៕
ចែករំលែកព័តមាននេះ