រាជធានីភ្នំពេញ ៖ មន្ទីរពេទ្យកាល់ម៉ែត បានប្រារព្ធពិធីអបអរសាទរខួបលើកទី១០០ «ទិវាអន្តរជាតិនារី ៨ មីនា ២០១១» នៅសាលប្រជុំមន្ទីរពេទ្យកាល់ម៉ែត កាលពីព្រឹកថ្ងៃទី៤ មីនា ឆ្នាំ២០១១ ក្រោមអធិបតីភាពលោកឈាង រ៉ា ទីប្រឹក្សាសម្តេចអគ្គមហាសេនាបតីតេជោហ៊ុន សែន និងជានាយកមន្ទីរពេទ្យកាល់ម៉ែត មានការចូលរួមពីមន្ត្រីរាជការ បុគ្គលិក កម្មការិនីចំនួន៤២១នាក់ ។
លោកឈាង រ៉ា ទីប្រឹក្សាសម្តេចអគ្គមហាសេនាបតីតេជោហ៊ុន សែន និងជានាយកមន្ទីរពេទ្យកាល់ម៉ែត បានមានប្រសាសន៍ថា លោកមានសេចក្តីសោមនស្សរីករាយក្រៃលែង ដោយបានចូលរួមក្នុងពិធីអបអរសាទរប្រារព្ធខួបលើកទី១០០ នៃទិវាអន្តរជាតិនារី ៨ មីនា ២០១១ ដែលគណៈកម្មការនារី រួមសហការជាមួយសហជីពមន្ទីរពេទ្យប្រារព្ធធ្វើពិធីនេះឡើងនៅមន្ទីរពេទ្យកាល់ម៉ែត ដែលប្រព្រឹត្តទៅយ៉ាងអធិកអធមសប្បាយក្រៃលែង ។ នៅសាកលលោកក៏ដូចជាក្នុងព្រះរាជាណាចក្រកម្ពុជា នៅថ្ងៃទី៨ មីនា ជារៀងរាល់ឆ្នាំតែងតែប្រារព្ធទិវា៨ មីនា នេះឡើងដើម្បីរំលឹកដល់ខួបអនុស្សាវរីយ៍នៃការតស៊ូរបស់បងប្អូននារី រហូតទទួលបានជោគជ័យនូវសិទ្ធិជាមូលដ្ឋានក្នុងការចូលរួមដ៏សំខាន់ក្នុងការដឹកនាំប្រទេស ក្រសួង មន្ទីរស្ថាប័ន និងអង្គការនានា ពិសេសគឺការងារក្នុងសង្គមជាតិទាំងមូល ។
លោកបានថ្លែងអំណរគុណដ៏ជ្រាលជ្រៅបំផុតចំពោះគណៈកម្មកានារីមន្ទីរពេទ្យកាល់ម៉ែត ក៏ដូចជាមន្ត្រីរាជការ បុគ្គលិកកម្មកានារីទាំងអស់ ដែលកន្លងមកបានខិតខំរួបរួមសាមគ្គីគ្នាជាធ្លុងមួយបំពេញនូវបុព្វហេតុដ៏សំខាន់នៃភារកិច្ចពិនិត្យព្យាបាលថែទាំអ្នកជំងឺដោយប្រកាន់ខ្ជាប់នូវក្រមសីលធម៌វិជ្ជាជីវៈជាគ្រូពេទ្យ និងជាអ្នកថែទាំជំងឺល្អប្រសើរ សកម្មភាពដ៏ប្រពៃរបស់បងប្អូននារី ធ្វើឱ្យមន្ទីរពេទ្យកាល់ម៉ែត មានការរីកចម្រើនជាលំដាប់ឥតឈប់ឈររហូតបានក្លាយជាមន្ទីរពេទ្យបង្អែកថ្នាក់ជាតិក្នុងលំដាប់ខ្ពស់ ៕
ចែករំលែកព័តមាននេះ