រាជធានីភ្នំពេញ ៖ ទីបំផុតក្លឹបបាល់ទាត់ព្រះខ័នរាជ្យ បានក្លាយជាម្ចាស់ជើងឯកពានរង្វាន់សម្តេចតេជោហ៊ុន សែន លើកទី៥ ឆ្នាំ២០១១ ដូចជាការរំពឹងទុកមែន បន្ទាប់ពីបានយកឈ្នះលើក្រុមបៀលប្រាយយូណាយធីត ក្នុងលទ្ធផល ២-០ ប្រកួតនៅវគ្គផ្តាច់ព្រ័ត្រកាលពីរសៀលថ្ងៃ ទី១២ មីនា កន្លងមក ។
កីឡាករឃួន ឡាបូរ៉ាវី ពាក់អាវលេខ១១ខ្សែប្រយុទ្ធឆ្នើមរបស់ក្លឹបព្រះខ័នរាជ្យបាននិយាយទាំងក្តីរំភើបថា វាជាពេលវេលាដ៏ពិសេសសំរាប់ក្រុមរបស់គេដែលតំណែងមួយនេះ គេរង់ចាំអស់រយៈពេល៥ឆ្នាំមកហើយ។ ក្លឹបព្រះខ័នរាជ្យធ្លាប់ទទួលបានចំណាត់ថ្នាក់លេខ២នៅឆ្នាំ២០០៨ និងលេខ៣ នៅឆ្នាំ២០១០ ស្ថិតនៅក្រោមក្រសែភ្នែកអ្នកទស្សនាផ្ទាល់ប្រមាណជា ៥ពាន់នាក់ថា កីឡាករប្រធានក្រុមសំអែល ណាសា ពាក់អាវលេខ១ បាននាំសំណាងឱ្យក្លឹបព្រះខ័នរាជ្យដោយបានទាត់បញ្ចូលទី១គ្រាប់មុននៅនាទីទី៣៤ក្នុងតង់ទី១។ ការលេងសំរុកដាក់គ្នាយ៉ាងលឿនរវាងក្រុម២នេះទាំងសងខាងមានឱកាសគ្រប់គ្រងបាល់ប្រហាក់ប្រហែលគ្នា ប៉ុន្តែគ្រាន់តែបៀលប្រាយយូណាយធីតគ្មានសំណាងទាត់បាល់បញ្ចូលទីខាងព្រះខ័នរាជ្យបានសំរេចតែប៉ុណ្ណោះ។ ទោះបីការប្រកួតនៅក្នុងតង់ទី១ និងទី២ មានសភាពស្វិតស្វាញបន្តិចមែន តែទាំងសងខាងនៅតែអាចរក្សាកំលាំងទាំង១១នាក់បានល្អដូចគ្នា។ រីឯអាជ្ញាកណ្តាល លោកថោង កិត្យា មិនសូវមានការមមាញឹកក្នុងការផាកពិន័យឡើយ។
អ្វីដែលធ្វើឱ្យព្រះខ័នរាជកាន់តែមានភាពលំនឹងថែមទៀតនោះ គឺនៅពេលដែលកីឡាករឃួន ឡាបូរ៉ាវី តែតបាល់បញ្ចូលទីបាន១គ្រាប់ទៀតនៅនាទីទី៧៥។ ឃួន ឡាបូរ៉ាវី បានក្លាយជាម្ចាស់ស្បែកជើងមាស សរុបគ្រាប់ដែលគេរកបានមានចំនួន២១គ្រាប់លើសអ៊ិន វិច្ឆិកា ដែលរកបានតែ១៦គ្រាប់ប៉ុណ្ណោះ។ ក្នុងចំណោមកីឡាករឆ្នើមដែលរកបានគ្រាប់បាល់ច្រើនដូចជា អ៊ិន វិច្ឆិកា នៅក្លឹបគិរីវង់សុខសែនជ័យ ទៀប វឌ្ឍនៈ នៅណាហ្គាខបរកបាន១១គ្រាប់។ គួច សុកុម្ភៈ ភ្នំពេញក្រោនរកបាន១០គ្រាប់ និងកីឡាករហេង សុខលី រកបាន៨គ្រាប់។
បៀលប្រាយយូណាយធីតមិនដែលបានឡើងមកដល់លេខ២ម្តងណាឡើយនៅរាល់ការប្រកួត តែនៅឆ្នាំ២០០៨ ធ្លាប់ឡើងមកដល់លេខ៣ម្តង។ រីឯតំណែងលេខ៣បានទៅណាហ្គាខប។ ដោយឡែក ក្លឹបក្រសួងការពារជាតិធ្លាក់មកនៅលេខ៤ និងទទួលបានចំណាត់ថ្នាក់ Fair Play។ សំរាប់ប្រាក់រង្វាន់ដែលទទួលបានតាមលំដាប់ថ្នាក់នីមួយៗ គឺលេខ១ បាន៨០លានរៀល លេខ២បាន៤០លានរៀល និងលេខ៣ បាន២០លានរៀល។ លោកអភិបាលរាជធានីភ្នំពេញបានចូលរួមឧបត្ថម្ភដល់សហព័ន្ធកីឡាបាក់ទាត់កម្ពុជាក្នុងទឹកប្រាក់៥ម៉ឺនដុល្លារសហរដ្ឋអាមេរិក ៕
ចែករំលែកព័តមាននេះ