ខេត្តបាត់ដំបង ៖ អតីតទណ្ឌិត០២នាក់បងប្អូនដែលម្នាក់ៗធ្លាប់ជាប់គុកចំនួន០៣លើកទៅហើយ តែមិនព្រមរាងចាលឡើយ ពេលនេះ នឹងត្រូវកម្លាំងការិយាល័យព្រហ្មទណ្ឌកំរិតស្រាល ធ្វើការឃាត់ខ្លួនបញ្ជូនទៅកាន់គុកជាថ្មី កាលពីវេលាម៉ោង៦និង២០នាទីល្ងាចថ្ងៃទី២៦ វិច្ឆិកា នៅចំណុចភូមិវត្តលៀប…
ខេត្តបាត់ដំបង ៖ អតីតទណ្ឌិត០២នាក់បងប្អូនដែលម្នាក់ៗធ្លាប់ជាប់គុកចំនួន០៣លើកទៅហើយ តែមិនព្រមរាងចាលឡើយ ពេលនេះ នឹងត្រូវកម្លាំងការិយាល័យព្រហ្មទណ្ឌកំរិតស្រាល ធ្វើការឃាត់ខ្លួនបញ្ជូនទៅកាន់គុកជាថ្មី កាលពីវេលាម៉ោង៦និង២០នាទីល្ងាចថ្ងៃទី២៦ វិច្ឆិកា នៅចំណុចភូមិវត្តលៀប សង្កាត់ចំការសំរោង ក្រុងបាត់ដំបង ក្រោយពីរួមដៃគ្នាលួចយកម៉ូតូគេមួយគ្រឿងបានសម្រេច។
ប្រធានការិយាល័យព្រហ្មទណ្ឌកំរិតស្រាល លោក ឈឿង គឹមសុង បានឲ្យដឹងថា អតីតទណ្ឌិត០២នាក់បងប្អូនដែលត្រូវកម្លាំងរបស់លោកចាប់ខ្លួនជាថ្មីនេះ ម្នាក់ឈ្មោះ ជា ចាន់ថន អាយុ៣៥ឆ្នាំ និងម្នាក់ទៀតឈ្មោះ ជា ចាន់ថុល អាយុ៣១ឆ្នាំ ស្នាក់នៅបន្ទប់ជួល ក្នុងភូមិអូរខ្ជាយ សង្កាត់ព្រែកព្រះស្ដេច ក្រុងបាត់ដំបង។ លោកបានប្រាប់ថា ជនទាំង២នាក់នេះ ត្រូវបានកម្លាំងរបស់លោកតាមស្រាវជ្រាវឃាត់ខ្លួន ក្រោយពីសង្ស័យថា បានធ្វើសកម្មភាពកាច់សោរកលួចយកម៉ូតូមួយគ្រឿង កាលពីថ្ងៃទី២៤ វិច្ឆិកា នៅភូមិពុកឆ្មា ឃុំអន្លង់វិល ស្រុកសង្កែ ដែលម្ចាស់ឈ្មោះ លេង វត្ថា ភេទប្រុស អាយុ៤៤ឆ្នាំ។
លោកឈឿង គឹមសុង បានបញ្ជាក់ថា ជនដៃដល់០២នាក់បងប្អូននេះ ធ្លាប់ជាប់គុកម្នាក់ៗចំនួន០៣ដងទៅហើយ ពីបទប្រព្រឹត្តអំពើចោរកម្ម តែមិនរាងចាលទេនៅតែប្រព្រឹត្តបទល្មើសដដែល ទើបត្រូវឃាត់ខ្លួនជាថ្មី។ បើតាមចម្លើយបឋម នៅពេលមន្ត្រីជំនាញសួរនាំ ជនសង្ស័យ០២នាក់បងប្អូននេះ បានសារភាពថា ពួកខ្លួនពិតជាបានធ្វើសកម្មភាពលួចយកម៉ូតូជនរងគ្រោះ នៅភូមិពុកឆ្មា ឃុំអន្លង់វិលមែន។ ប៉ុន្តែក្រោយពីលួចបាន០២ថ្ងៃ ក៏ត្រូវសមត្ថកិច្ចតាមចាប់ពួកខ្លួនបាន។
បើតាមរបាយការណ៍ការិយាល័យព្រហ្មទណ្ឌកំរិតស្រាល ម៉ូតូដែលជនសង្ស័យ០២នាក់បងប្អូនលួចនេះ ម៉ាកហុងដាឌ្រីមសេ១២៥ ពណ៏ខ្មៅស៊េរីឆ្នាំ ២០១៨ ស្លាកលេខបាត់ដំបង 1AD-8405។ ជាមួយនឹងការឃាត់ខ្លួននេះ មន្ត្រីជំនាញបានដកហូតវិញហើយ ជាមួយនឹងម៉ូតូមួយគ្រឿងទៀតម៉ាកស៊ូស៊ូគី ស្លាកលេខ ភ្នំពេញ 1BA-6367 ដែលជនទាំង០២នាក់ជិះធ្វើសកម្មភាព។
លោក ឈឿង គឺមសុង ប្រធានការិយាល័យព្រហ្មទណ្ឌកំរិតស្រាល បានប្រាប់ថា ពេលនេះអតីតទណ្ឌិតទាំង០២នាក់បងប្អូន កំពុងត្រូវបានសួរនាំនៅក្នុងការិយាល័យជំនាញនៅឡើយ ហើយក៏កំពុងកសាងសំណុំរឿង ដើម្បីចាត់ការតាមនីតិវិធីដែរ៕
ចែករំលែកព័តមាននេះ