ខេត្តកំពង់ស្ពឺ ៖ ប្តីប្រពន្ធ២នាក់បានរងរបួសធ្ងន់ ត្រូវបានសាច់ញាតិដឹកទៅព្យាបាលនៅមន្ទីរពេទ្យឯរាជធានីភ្នំពេញ បន្ទាប់ពីត្រូវក្របីញីរបស់អ្នកស្រុកដាច់ខ្សែដេញវ័ធ ខណៈពេលកំពុងឈរនៅមុខផ្ទះ។
ហេតុការណ៍នេះបានកើតឡើងកាលពីវេលាម៉ោង៦ និង១០នាទីព្រឹក ថ្ងៃទី១០ មិថុនា នៅចំណុចភូមិព្រៃគុយ ឃុំត្រពាំងគង ស្រុកសំរោងទង។
ជនរងគ្រោះ២នាក់ប្តីប្រពន្ធដែលត្រូវក្របីញីវ័ធ ប្តីឈ្មោះចែម សុខ អាយុ៣៧ឆ្នាំ មុខរបរកសិករ និងប្រពន្ធឈ្មោះម៉ាញ ស្រី អាយុ៣៧ឆ្នាំ ទាំង២នាក់រស់នៅកន្លែងកើតហេតុខាងលើ ចំណែកក្របីញីមួយក្បាលដែលដេញវ័ធគេឯងនេះមិនទាន់រកម្ចាស់ឃើញនៅឡើយទេ។
តាមសម្តីរបស់សមត្ថកិច្ចបានឱ្យដឹងថា មុនពេលកើតហេតុជនរងគ្រោះទាំង២នាក់ប្តីប្រពន្ធបាននាំគ្នាឈរលេងនៅមុខផ្ទះ ស្រាប់តែក្របីញីមួយក្បាលមិនដឹងរត់មកពីណាទេ បានមកវ័ធពួកគាត់បណ្តាលឱ្យរបួសជើង ហើយក៏បន្តរត់ទៅវ័ធប្រជាពលរដ្ឋផ្សេងទៀត និងម៉ូតូដែលចតស្ងៀមបណ្តាលឱ្យដួលថែមទៀត។
បច្ចុប្បន្នក្របីញីនេះត្រូវបានសមត្ថកិច្ចសុំគោលការណ៍ថ្នាក់លើបាញ់សម្លាប់ហើយ ដោយសាររកម្ចាស់អត់ឃើញ និងដើម្បីកុំឱ្យមានគ្រោះថ្នាក់ដល់ប្រជាពលរដ្ឋផ្សេងទៀត៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ