សម័យប្រជុំមហាសន្និបាតអង្គការសហប្រជាជាតិ (UNGA) លើកទី៦៥ ដែលរៀបំឡើងក្នុងទីក្រុងញូវយ៉ក សហរដ្ឋអាេមរិក កាលពីថ្ងៃទី១ មីនា កន្លងមក បានអនុម័តលើសេចក្តីសម្រេចចិត្តមួយផ្អាកភាពជាសមាជិករបស់ប្រទេសលីប៊ី ក្នុងក្រុមប្រឹក្សាសិទ្ធិមនុស្សរបស់អង្គការសហប្រជាជាតិ ។ មហាសន្និបាតនេះ ដែលមាន១៩២ប្រទេសជាសមាជិកបានផ្តល់ការអនុម័តលើសេចក្តីសម្រេចចិត្តនេះដោយសំឡេងភាគច្រើនបំផុត។
សេចក្តីសម្រេចចិត្តនេះចែងថា មហាសន្និបាតបានសម្រេចចិត្តផ្អាកសិទ្ធិជាសមាជិករបស់ប្រទេសលីប៊ី ក្នុងក្រុមប្រឹក្សាសិទ្ធិមនុស្សរបស់អង្គការសហប្រជាជាតិ ។ សេចក្តីសម្រេចចិត្តនេះដាក់ដោយប្រទេសលីបង់ជំនួសមុខឱ្យប្រទេសអាហ្វ្រិក និងប្រទេសនៅមជ្ឈិមបូព៌ា ហើយមហាសន្និបាតអង្គការសហប្រជាជាតិក៏បានសម្រេចផ្តល់ការអនុម័តដើម្បីផ្អាកភាពជាសមាជិករបស់ប្រទេសលីប៊ី ក្នុងក្រុមប្រឹក្សាសិទ្ធមនុស្ស ដែលត្រូវបានបង្កើតឡើងជិត៥ឆ្នាំមកហើយ ។
សេចក្តីសម្រេចចិត្តនេះបានបង្ហាញពីការព្រួយបារម្ភយ៉ាងខ្លាំងចំពោះស្ថានភាពសិទ្ធិមនុស្សនៅក្នុងប្រទេសលីប៊ី ដែលបានក្លាយជាសមាជិកក្រុមប្រឹក្សាសិទ្ធិមនុស្សកាលពីខែសីហា ឆ្នាំ២០១០កន្លងមក ។
ថ្លែងមុនពេលបើកសម័យប្រជុំមហាសន្និបាតនោះ អគ្គលេខាធិការអង្គការសហប្រជាជាតិ លោកបាន គីមូន បានអំពាវនាវឱ្យបណ្តារដ្ឋជាសមាជិកមហាសន្និបាតអនុម័តលើេសេចក្តីសម្រេចចិត្តផ្អាកសិទ្ធិជាសមាជិករបស់លីប៊ី ក្នុងក្រុមប្រឹក្សាសិទ្ធិមនុស្ស ។ លោកបាន គីមូន បានថ្លែងថា «ថ្ងៃនេះ ខ្ញុំទទូចសុំឱ្យមហាសន្និបាតចាត់វិធានការឱ្យបានត្រឹមត្រូវជាទីបំផុត» ។
ចំណែកលោក Josephr Deiss ជាប្រធានសម័យប្រជុំមហាសន្និបាតលើកទី៦៥ ថ្លែងថា ថ្ងៃនេះវាស្រេចតែលើពួកយើងក្នុងការធ្វើការងារទាំងឡាយ ។ យើងត្រូវតែបង្ហាញពីសាមគ្គីភាព និងការតាំងចិត្តដើម្បីលើកកម្ពស់តម្លៃរដ្ឋធម្មនុញ្ញជាសារវន្ត ។
លោក Joseph Deiss ថ្លែងទៀតថា វាជាកាតព្វកិច្ចរបស់ពួកយើងសម្រាប់បុរស និងស្ត្រីទាំងអស់ដែលចង់ឱ្យមានការគោរពសិទ្ធិគ្នាទៅវិញទៅមក ៕
ចែករំលែកព័តមាននេះ