មាតាបិតាគួរយល់ពីឧបនិស្ស័យកូន
ព្រះភគវាព្រះអង្គទ្រង់សម្ដែងក្នុងមង្គលសូត្រថា មាតាបិតុឧប្បដ្ឋានំ បុត្តទារស្ស សង្គហោ អនាកុលា ច កម្មន្តា ឯតម្មង្គលមុត្តមំ ប្រែថាកិរិយាបម្រើនូវមាតាមួយ កិរិយាបម្រើនូវបិតាមួយ…
ព្រះភគវាព្រះអង្គទ្រង់សម្ដែងក្នុងមង្គលសូត្រថា មាតាបិតុឧប្បដ្ឋានំ បុត្តទារស្ស សង្គហោ អនាកុលា ច កម្មន្តា ឯតម្មង្គលមុត្តមំ ប្រែថាកិរិយាបម្រើនូវមាតាមួយ កិរិយាបម្រើនូវបិតាមួយ សេចក្ដីសង្គ្រោះដល់បុត្រ និងភរិយាមួយ ការងារទាំងឡាយដែលមិនច្របូកច្របល់មួយ ទាំងបួននេះគឺជាមង្គលដ៏ឧត្ដម ។
ចំពោះការចិញ្ចឹមបុត្រធីតា មាតាបិតាក៏គួរយល់ផងដែរថាយើងបង្កើតកូនបានមែន តែយើងមិនអាចបង្កើតអធ្យាស្រ័យ និងឧបនិស្ស័យរបស់កូនបានទេ ការសន្សំឧបនិស្ស័យល្អ ឬអាក្រក់ កូនកើតមកជាអ្នកមិនស្ដាប់បង្គាប់មាតាបិតា នេះជារឿងឧបនិស្ស័យ ដែលបានសន្សំមករៀងៗខ្លួន ។ មានមាតាបិតាមិនតិចទេដែលកើតទុក្ខលំបាកចិត្តព្រោះតែកូនខូចមិនស្ដាប់បង្គាប់ខ្លួន ទាំងដែលខ្លួនឯងឪពុកម្តាយខ្វះការអប់រំទូន្មានបន្ទំឧបនិស្ស័យល្អផង ហើយនឹងមិនបានយល់ចូលចិត្តអំពីកម្ម និងវិបាករបស់កម្មនៃសត្វទាំងឡាយផង ដូច្នេះហើយទើបពីមួយថ្ងៃទៅមួយថ្ងៃតែងតែកើតទុក្ខដុតរោលចិត្តខ្លួនឯងឥតស្រាកស្រាន្ត ។
ពេលដែលមាតាបិតាបានយល់ពីឧបនិស្ស័យរបស់សត្វទាំងឡាយ បានដឹងច្បាស់លាស់ហើយ ប្រាកដជានឹងបានធូរមួយកម្រិតព្រោះយល់ថាបើកូនមិនអាចទទួលដំបូន្មានពីខ្លួនបានទេ កូនមិនស្ដាប់បង្គាប់ទេ នោះជារឿងរបស់កូន មិនមែនជាទោសរបស់ឪពុកម្តាយទេ ប្រៀបដូចព្រះសម្មាសម្ពុទ្ធដូច្នោះដែរ ព្រះអង្គគ្រាន់តែជាអ្នកចង្អុលបង្ហាញផ្លូវដល់មនុស្សអ្នកវង្វេងផ្លូវ ត្រង់ការដើរ ឬមិនដើរតាមការចង្អុរប្រាប់នោះ វាជារឿងរបស់អ្នកដើរ មិនមែនជាទោសរបស់ព្រះសម្មាសម្ពុទ្ធឡើយ ៕ សាន សារិន
ចែករំលែកព័តមាននេះ