បណ្តាសិល្បករជាច្រើនដែលបានចូលបួសក្នុងព្រះពុទ្ធសាសនា ភិក្ខុឆោម ប៊ុនយ៉ុង ជាអ្នកបួសបានយូរជាងអ្នកសិល្បករដទៃទៀតរហូតដល់ពេលនេះគឺបួសបានជិត១ទសវត្សរ៍ទៅហើយ ខណៈអ្នកសិល្បករខ្លះបួសបានត្រឹមតែមួយដង្ហើមចង្រិត គឺបានត្រឹមតែមួយរយៈពេលខ្លីប៉ុណ្ណោះ ។
ភិក្ខុឆោម ប៊ុនយ៉ុង បានលះបង់នូវភាពសប្បាយហ៊ឺហាស្រីស្រាល្បែងល្បាំនានា លះបង់នូវភាពស៊ីវិល័យឡូយឆាយសប្បាយក្អាក់ក្អាយក្នុងសង្គម លះបង់នូវអាជីពជាតារាចម្រៀងដ៏ល្បីល្បាញនៅក្នុងពិភពសិល្បៈមកជ្រកកោនក្រោមម្លប់ព្រះពុទ្ធសាសនាប្រតិបត្តិធម៌អាថ៌សិក្ខាវិន័យយ៉ាងស្ងៀមស្ងាត់តាំងពីអំឡុងចុងឆ្នាំ២០១២មកដែលរហូតមកដល់ពេលនេះមានរយៈពេលជិតដប់ឆ្នាំហើយ ។
នេះក៏ព្រោះព្រះអង្គមាននិស្ស័យខ្ពស់ក្នុងព្រះពុទ្ធសាសនា យកធម៌វិន័យជាមិត្តសម្លាញ់ ដែលអ្នកប្រាជ្ញខាងទស្សនវិជ្ជាពុទ្ធសាសនាពោលថា ជាអ្នកបួសពិតប្រាកដ បួសដើម្បីរួចចាកទុក្ខក្នុងសង្សារវដ្ត បួសដើម្បីប្រោសសត្វឱ្យរួចរដោះពីទុក្ខភ័យដូចជាខ្លួនដែរ គឺព្រះអង្គនៅស៊ូទ្រាំរស់នៅក្រោមម្លប់ព្រះពុទ្ធសាសនាបន្តទៀត បើទោះជាឆ្លងកាត់ការលំបាកយ៉ាងណាក៏ដោយ ។
ព្រះភិក្ខុឆោម ប៊ុនយ៉ុង មានថេរដីកាថា៖ «ការបួសជាព្រះសង្ឃរហូតមកទល់ពេលនេះមិនមែនជាការងាយស្រួលនោះឡើយ ពោលគឺព្រះអង្គបានឆ្លងកាត់ព្យុះភ្លៀង និងបញ្ហាលំបាកច្រើនជំពូកជាបន្តបន្ទាប់ ប៉ុន្តែនៅតែខំតស៊ូអត់ធ្មត់ក្នុងភេទជាបព្វជិតដើម្បីបានដើរលើផ្លូវព្រះធម៌រហូតពេលនេះ ។
រហូតមកដល់ពេលនេះភិក្ខុឆោម ប៊ុនយ៉ុង នៅមិនទាន់បានបង្ហាញជំហរជាថ្មីណាមួយថានឹងលះភេទជាអ្នកបួសសឹកមកជាគ្រហស្ថ វិញនោះទេ គឺព្រះអង្គនៅបន្តជីវិតជាបព្វជិតលើវិថីព្រះពុទ្ធសាសនាបន្តទៀត ។
បច្ចុប្បន្នព្រះភិក្ខុ ឆោម ប៊ុនយ៉ុង គង់នៅវត្តកោះមេត្តាពោធិវង្ស ស្ថិតនៅក្នុងភូមិកោះអណ្តែត សង្កាត់ទួលសង្កែទី២ ខណ្ឌឫស្សីកែវ រាជធានីភ្នំពេញ នៅមហាកុដិលេខ១៥ ដោយមានព្រះនាមក្នុងពុទ្ធចក្រថា ព្រះភិក្ខុ ឆោម ប៊ុនយ៉ុង ព្រហ្មប្បញ្ញោបញ្ញាវិនរោ ៕ សាន សារិន
ចែករំលែកព័តមាននេះ